Marko 4 - NEAJEEDA EESH BEA BUUNEESSEAN

Gissigala siida weah gwahista booga

¹ Gabiikta Yeesu gonealshi gichcha aba ghuutta basooda. Ghwasaabwan Emeettuw ea eanung' gawa jeeda maleambooda ak goopteada. Abeeda buuneeda gobiitpiit aba ghuutta basooda ng'eanyiida ghajaam.

² Hean goneali buuneeda ng'asheega saang'a nea gagalla geat ng'asheega. Gwayeeshsha abajeeda ginealshoodaannyi,

³ “Oalleaydiit! Ghayi ghang'eat sii gawa gwahista booga.

⁴ Hitta nea gwahista boagaaschi gwanda booga abitpissa heeda was naweeda buuneeda, iiduw ghwahidu dariidakka ak ghwaak.

⁵ Gwanda eara booga abitpissa heeda was badayda harearachcheanda heeda manda sigeemba huumwa. Boosu gabay gwardu aba gideaba eara sigeedeaba hoowa eang'ay.

⁶ Boosu iiduw ghwalas daknooda nea gudugwanda ghuusiga sigeeda, ak gabay ghaghajamiit aba gideaba manda sigeemba huumwa ang'ng'waay hawunga.

⁷ Gwanda eara booga abitpissa jeeda geediga halaghweanga, iiduw nea gwardu boogiga ea maji gil aba gideaba ghwariis geediga halaghweenga.

⁸ Gwanda eara booga abitpissa jeeda sigeeda miyaas, iiduw nea gwardu gwaji muuchchi. Ghealooniga meatteena booga diktam ea damanamughuush, suurja gweatta laadam nea suurja gweatta bughala.”

⁹ Iiduw nea gayghoabuut Yeesu ghuutta baloaldaannyi gwayeeshsha buuneeda, “Siida agar iitta adayiinya ng'asheesu ikkeasuun.”

Gissigalleewa geat ng'asheega

¹⁰ Iiduw nea gwandeawa Yeesu geaw, gaweesa Fukwachchi aleeysiit sea ginealangaaschi attamaniyyeenya ak geannyaash gidagwachchi baysiina gallodeaba geat bea ng'asheega.

¹¹ Ghwalamda Yeesu ak gwayeeshsha, “Agogeeni ghamneawa simeayneegwa makcheameeda Gheambalmeeda Aseetta. Amasunung' fugiga manda jedeaba gheambalmeeniin, saawa ng'asheega ijea erukkwiisa geaghus egalla geat.

¹² Ghoaw ramoraneeda ghayi sirukutta bea gideaba, ‘Fiisu gayghoang'wearda muuchchi, ak ea mayghwadaah gil, iidiga nyaawa gaygwayiing'shi muuchchi, ak ea manda gili jea gwajeeng'u. Ghang'wana gwachchi gwayamsa geat Aseetta ak gwasamsa ring'eega nyaawa.’”

Yeesu gwargu ganeega siida weah gwahista booga

¹³ Hean ghoanyaashta Yeesu ak gwayeeshsha, “Assagooga miyajeeng'ni eara ng'asheesu eagalli geadiini? Gajoammustaan ajeeng'ni ng'asheesu jea dagalla geadiin?

¹⁴ Siida weah gwahista booga gwahista ng'asheega Aseetta.

¹⁵ Boogiga abitpissa ghuutta naweedean Fugiga iiy ng'asheanda deagheatta ghwahidu Shattaani ak gageandeawa jeesinga nyaawa.

¹⁶ Booga abitpissa badayda harearachcheandean. Fugiga ama iiy ng'asheanda ghwadeapta nea gahoosan.

¹⁷ Ghanyea mandeawana hawunga issa ghanyi gageanu gheadi nuwaas iihidu sawanaduutka ea munyinda gabay ghwalagaan.

¹⁸ Boogiga abitpissa jeeda halaghweengean, Fugiga iiy ng'asheanda Aseetta,

¹⁹ iiduw ghwahidu mittagheasta muunda ng'eanyiida bea geaba gassooda baruureega, ea sechmeeda seach saawa gilinyoo ghwariis ng'asheandida, ghwanung' ea mudugwaji haghweega.

²⁰ Boogiga sihisa jeeda sigeeda miyaasiin, Fugiga iiy ng'asheanda ak ghoang'ng'waay ak gwaji haghweegeani. Ghealooniga meatteena booga diktam ea damanamughuush, suurja gweatta laadam nea suurja gweatta bughala.”

Gheaboong'nyeanda sidukutta

²¹ Gabiikta Yeesu ak gwayeeshsha, “Ghamneawa gheaboong'nyeanda ijea eapwaang'da gajeedukuteawa dahuuda ghana jea eayiin uutta bulaliida? Manda ameakghusa ak geayiin uhuumba gili?

²² Asi gilinyoo afunyaat gajeenung' ghwadajiit. Nuut gichcha gissudukuta gajeenung' ghabwar daknooda.

²³ Asi Ayiinya iyondeawi iidiga!”

²⁴ Gwayeeshsha Yeesu saawa, “Olleysiina iit muuchchi ng'asheesu oayinyiin! Gidottenniidi agooga gajettenneegwa nea geanung' ghwanaawda.

²⁵ Aba gideaba siisi agar gil gajeehheassa nea siitta meagara giliin, eara gidida mwanang' mideawean gajearreat.”

Gissigala bookcheanda rudu

²⁶ Hean gabalool Yeesu nea gwayi, “Gheambalmeeda Aseetta gajeegala siisi ghayi wea gwahista booga.

²⁷ Niny iissa ihidu eaweeda gawa gwalil, nea askweari ghoang'wearu, nea mwanala eara bookcheandida girritteayda.

²⁸ Funnooda bookcheanda goobal Sigeeda akghwahit. Iissa ghwanung' ghanyi gwasin mbearga, hean gabiissa ghwasar muhooga, iiduw muhoogiga ea nisin gheanyanga booga.

²⁹ Iiduw nea booga ea niheas, gaygawa seabwa ghwalach aba gideaba ghwadaa nihitta damanda lajitta.”

Gissigala ghajilleanda haradaali

³⁰ Iiduw gwayeeshsha Yeesu, “Ghamneawa Gheambalmeeda Aseetta gajeegala naaha? Iijea erukuna gajeegalana naaha?

³¹ Gaydagala ghajilleanda haradaali. Ghajilleandeaba geedi amwanang' ea ghwalaabwa hoowa ghajilleamba geat nuut.

³² Amaduw nea geayiin jeessigeeda gwardu ak gwaheedu ea ghoaw geetta gidahaw naawa geediga sean bea madamnyeanda. Iissa gwasin damealga duguuga hees ea ghamway jirooneadaannyi dariidakka.”

³³ Abeeda Yeesu inyoo gagasa gwarukuta giijastaannyi, inyeessa ng'asheega asaang'a gea galla suurja.

³⁴ Miighanyi gwarukuta ng'asheanji magalana nuut. Iiduw nea gwandeawa ginealangaaschi akghwahit, gwarukusa ganeega ng'asheega sean nea mwafnyana eara gil.

Yeesu gwareekusa silakghta basooda

³⁵ Shing'adedeaba eawettida gwayeeshsha Yeesu ginealangaaschi, “Eaniyean eakghaawana basooda eebu meatkweetta.”

³⁶ Goheelli geat emeetta sang'aan. Gaweay Ginealanga jeeda maleambooda ghwanyawa mida Yeesu ak gaweay nea ghwaat Yeesu. Abeeda gwanda hoowa maleambajeega suuk.

³⁷ Iiduw ghang'eat siilakghta aba jeeda basooda. Ghwalas maleambooda laweajajeega ak ghwanung' gwaneawwiida beega ea ghwannyiit jeeda maleambooda.

³⁸ Abeeda Yeesu gwalil aba hoowa bea uutta maleamboodean nea gwadiiwa uhuudaannyi hang'da was ghabuscheanda. Ghwaheat ginealanga nea gwayeeshsha, “Ginealshoochcheanda. Assang'iing'i eara nyariideanya miduuppi?”

³⁹ Ghang'eat Yeesu ak gwareekusa siilakghtida nea gwayeeshsha basooda, “Siinda! Eena saw!” Gwaregweesa jeammeeda. Gwayi basooda sean saw!

⁴⁰ Hean gwayeeshsha, Yeesu ginealangaaschi, “Ghoabealeagwaani? Mondeawani masaweega?”

⁴¹ Ghabeel muuchchi ak gonyeari geat, “Nii siisi urjiini? Siida nukkwa ghoawal gheang'da eara jeammeeda ea basooda?”