Marko 16 - NEAJEEDA EESH BEA BUUNEESSEAN

Dunnooda Yeesu

¹ Ng'atta ghwelmeeda Sabatto ghang'eat geaba Mariyaayda suguura Magadaleena ea Saloome ea Mariyaayda was gheamatta Yakkobo gaweay ghwasha nagheeda ng'andit jea ghwayeasha musta Yeesu.

² Hean imuchchu nea gudugorearu aseetta eaweeda jumwappiili gaweay Gadeemsu ea ghwahitta heeda bung'eeda.

³ Gaweay nea gabaloleada aba naweeda nea gwayeeshsha geat, “Ghamneawa gayghoarakghrakghtaang'a lagheaneetta haw bea ghuutta shoomanda bung'eedean?”

⁴ Ghoang'wearda ak ghwadaa lagheaneedida nea sigeanda, (Nea mii laghaana gil gidahaw muuchchi.)

⁵ Duugwasik ghuutta shoomanda bung'eeda ghwadaa Ghearemaneeni akkwa hang'deesh nea goopteada aba meatkweeda geattinda dugwa, Ghahamng'eanyi muuchchi.

⁶ Hean gwayeeshsha Ghearemaneeni gadeemgiga, “Ada ghahameegwa ng'eanyi. Ghanalli beadi ogaseadayyi Yeesuuyda Nasareetti, singoorsa uhuuda behiida. Siisi nuduudu eara hiji mudugwanda. Ang'ulla heeda siyiin.

⁷ Asi agooga aweayeena oattawa iidi ginealangiga ikkaschiin ea Betro gideaba nisheedeawaneegwa gawa Galilaaya. Iyoahitti hoowa gajadaakta gidaghayi rukutteayda.”

⁸ Ng'atta Ghabeawa hoowa bea bung'edean nea gwasalda, aba gideaba nubwaadan ak ea nung'ut muuwda nea ghahamng'eanyi. Eamudu gwarukusa sih ng'ashaan aba gideaba nibeal muuchchi. [

Yeesu gwaroonnyi Mariyaayda suguura Magadaleena

⁹ Ng'atta dunnooda Yeesu nea beashatta eaweetta jumapiili gil gohiimsa geaw Mariyaayda suguura Magadaleena, was gatmooda ghayi arutteawa Yeesu saseeda meangeeniga assispwa.

¹⁰ Gawa Mariyaayda Magadaleena, ak gawa gwarukusa fuga easuju mideaydooschi Yeesu, nea abeeda aba damandida Fukka goyyeawda nea gaguttu heareega.

¹¹ Iiduw nea Ghwayiiy gideaba Yeesu ea majeek ea gideaba nidaah Mariyaayda Magadaleena ea meamwasa.

Yeesu gwaroonnyi ginealan iyyeenya

¹² Hean imuchchu gohiimsa geaw Yeesu ginealan iyyeenya nea niyamwa deakta. Abeeda Ginealang'su gaweay madamnyeanda.

¹³ Eara Saawa gaweay ak gwarukusa suurja. Earappeadi surukusean ghanyea mwamwasa.

Yeesu gwaroonnyi ginealan damwanagi

¹⁴ Iiduw aba huydeanda gohiimsa geaw Yeesu ginealan damwanagi hitta Yeesu nea gweagiischi. Gowoowsa Yeesu saawa muuchchi aba hang'ooynachcheekka iheenga nyaawa, ea gideaba mwamwasa ng'asheegiga bea fugeadu iitta dunnoadannyyin.

¹⁵ Hean gabiissa Gwayeeshsha, “Aweayeena ng'eanyiissean ak gorukkwiidi Giijasta Miy aba heeda buneassean.

¹⁶ Nea siida mwas ak geppattiisan gayghaghu, nea siida mwamwasa gajergweaksa.

¹⁷ Ak abeeda eara gwadeagooda gaygodeaydooschi Fukka mideawa masawegean, aba gheawungeasu gaygoruutta meangeeniga ak gaygabaloola iit nuut.

¹⁸ Nea eara ghoang'ng'waany ichchipkeega ghana eara eabiiw siida gichchea ghabwar, ea manda gili jea gwahissa. Nea inyeessa Gayghoang'ng'waay iheenga fuga miyeani ak gaheaba.”

Yeesu gawa humng'eeda

¹⁹ Iiduw Ng'uttamiida was Yeesu gobalool saawa amahit, geanung' gawa humng'eeda gobiida meatkweeda geattinda dugwa bea Aseetta.

²⁰ Hean gaweay Ginealanga ng'eanyiissean nea gwarukkwiida Giijasta Miy. Gwasin Ng'uttamiida gadiyeeda sea saawa ak gomajeek Giijasi aba gwadeagooda adeaydooschi saawa.]