Marko 15 - NEAJEEDA EESH BEA BUUNEESSEAN

Yeesu gwanda madeeda Bilatto

¹ Iimuchchu nea gudughaghar gayeew gabalool Ashohoodiga hees sea gweargwa, ea ginealshoodiga diineeda Yahuudi ea girgweageeda sean, ak ghwarat Yeesu aba biingu, ak ghwaat ea ghwayiin geattinga Bilatto.

² Ghoanyaash Bilatto Yeesu nea gwayeeshsha, “Assang'iing'i guwosi sugoochcheanda Yahuudi?” Ghwalamda Yeesu ak gwayeeshsha Bilatto, “Girgu ang'iing'i.”

³ Ghoahaktaawa ashoohoodiga hees Yeesu ng'asheega duguuga saang'a.

⁴ Gabiikta Bilatto ghoanyaash Yeesu nea gwayeeshsha, “Anda ang'iing'i mirukuni gil? Iinya ng'asheega surukuna badaydaang'u gitteenna.”

⁵ Amwaasha Yeesu ng'ashaan ea ghwanung' ghahamng'eanyi Bilatto.

Yeesu gergweaksiina miyeeda

⁶ Abeeda iissa iinyoo ghwahitta damanda ghwelmeeda Basakka inyeessa Bilatto gwasiksa siyagi aba fuga mida ghealooniga gasa buuneeda.

⁷ Abeeda damandida gwanda ghealooniga siisi suguura Baraba nea geeraduudayi fii suuk ghayi nuseada buuneeda nea ghwanung' ghaghoakghoayda emeeda.

⁸ Ghaghoayda Emeeda gaweay heeda Bilatto ama sihitta geyeeshsha, Aniyean sinneasa gidagweannyekka sean.

⁹ Ghoanyaashta Bilatto nea gwayeeshsha saawa, “Heappi googasayi deattinneegwa sugoochcheanda Yahuudi?”

¹⁰ Abeeda niny ghwanyaashtunu aba gideaba ashoohoodiga hees ghoahaktaawa Yeesu sichcheeda.

¹¹ Nea ashoohoodiga hees saawa ghoang'waalng'waal buuneeda nea gagasa gideaba gaygamus buuneeda gwasiksa Baraba.

¹² Hean ghoanyaash Bilatto buuneeda gichcha nea gwayeeshsha, “Googasayi dahinndaan siisi oguuri sugoochcheanda Yahuudiin?”

¹³ Gabiikta Buuneessean gojuur nea gwayeeshsha, “Angoorsiina uhuuda behiida.”

¹⁴ Gwayeeshsha Bilatto aba girrukusa buuneeda, “Nea gidinyeandeaba siisi ea naaha gil?” Gabiikta Buuneeda gojuur muuchchi nea gwayeeshsha, “Angoorsiina uhuuda behiida!”

¹⁵ Hean Bilatto aba gassooda gasa ghoammiidu gheanyanga emeeda, gageanu ak gwasiksa Baraba. Hit ghwanung' egeanu mughowooda ak geabwar Yeesu amahit geayaat enngoorsa uhuuda behiida.

Shirikkara gwajuuga Yeesu

¹⁶ Ghwaat Shirikkareedida Yeesu ea eahhiitta heeda suguura Braytoriyo was seammooda gheeda sugoochcheanda. Hean ghapka eara Shirikkara suurja ak gabassa geat hoowa.

¹⁷ Gegeanu ak gekkwealsa Yeesu hang'da oomu. Gegeanu ng'oroorga eanaaw ak geayiin uhuuda eanung' ghoaw shiipka uhuudaannyi.

¹⁸ Hean Geguursa nea geyeeshsha, “Seayuu sugoochcheanda Yahuudi!”

¹⁹ Gealas uhuuda Yeesu aba digheechcheanda nea gong'urriisa ng'usheaga. Geetkuy aba madeadaannyi ehinda gili siittaw mureeda.

²⁰ Ng'atta jukkooda gegeanda hang'da ghwanyawa oomu sikkwealsa ak gekkuumsa hang'weakkiga ikkaschiin. Ng'atta Geayaat engoorsa uhuuda behiida.

Yeesu gengoorsa uhuuda behiida

²¹ Geweay aba naweeda ea eroonnyi siisi suguura Simoneeda ng'eanyiida Girene. Niny ghweanda geaba Aleksanda bea geaba Rafo gil, nea aba damani gwaleabu madamnyeanda. Gediing'sa aba uurda ghwasar behiida Yeesu.

²² Geayaat Yeesu ea eahhiitta hiji suguura Golgootta nea ghwanyawa isiyam ghuut gajeguura, “Deageapkeeda uhuuda.”

²³ Gegeanu difaayi ak geng'ng'olng'olsiinnyi sea manemane. Geattaw nea geyeeshsha leaha. ak ghaheawa ghwali.

²⁴ Ng'atta hean Gengoorsa uhuuda behiida, ama hit gegeanu hang'waakkaaschi ak geelaja, nea geng'alealleesa hang'daannyi eadaa siida jea gageanda.

²⁵ Gengoorsa uhuuda behiida nea gaba aseetta samwagu.

²⁶ Nea gissihaktaawa geang'waar gideaba, “Nii sugoochcheanda Yahuudi.”

²⁷ Gengoorsa iheenga beehajeega eara fii iyyeenya abeeda was mareannghooga. Dea meanung' ghwalaabwa Yeesu meatkweeda geattinda dugwa niirja ghwalaabwa meatkweeda geattinda ghadaam. [

²⁸ “Ak gwasa gidaghayi nyaah Ng'ooruutka Ghaydit nea gwayi, ‘Sinung' gwandeayi sea fuga munyas.’”]

²⁹ Nea abeeda Fuga ng'atta aba naweeda gong'eawi nea godiindiil iheenga nea geyeeshsha, “Asi! Siida jea gwanyarja gheeda Sibatta Aseetta ak ghwadeas aba jeeda eawoojiga assamwagu!

³⁰ Asi ayyaawa geaw! Hing'aanana uhuuda behiida.”

³¹ Eara ashohoodiga hees sea ginealshoodiga diineeda Yahuudi gwajuuga nea gwayi, “Ghoaghu buuneeda, ak ghwaraay ghoaghu geaw!

³² Asi geeyi nii Gristoyda was sugoochcheanda Israeeli! Asi dahing'aana aba uhuuda behiida eadaaha ak geamwaschi.” Eara fukwachchi singoruudayi ninyiin earaga gong'eawi.

Miyeeda Yeesu

³³ Hean iiduw nea ghabwarbwara aseetta gwaduk ng'anyiissean misaneeda ea gaba aseetta shageash.

³⁴ Gul aseetteaba shageash ghwanya ghuutta Yeesu nea gojuur nea gwayi, “Elooyi, Elooyi, laama sabatkaani?” Nea gideaba, “Ea Aseetteanyu, Ea Aseetteanyu, andang'iing'i ninung'usean heeda?”

³⁵ Fiisu ghwanyawa neekki iyiiy ghuutta Yeesu gwayi, “Ayiinya! Gaguursa Eliya.”

³⁶ Ghafwach Sih ak gageanu gili was ghabuschcheanda ak ghang'uda jeeda beega ng'weani bea haghweega geetta. Ghoahaaktaawa digheechcheanda ak ghoadaw Yeesu ghamit nea gwayeeshsha buuneeda, “Ommeasa eadaaha Eliya eajea ghwahidu ghoang'aamwa uhuuda behiida.”

³⁷ Ghwanya ghuutta Yeesu nea gagis daghatta muuchchi ak ghoabitta.

³⁸ Hean ghabwaasha bugusta hang'dida subwaasha jeeda Gheeda Sibatta Aseettean, ak ghoaw iyyeenya ghang'eada uhuuda ea gagul ng'eanyi.

³⁹ Abeeda Shirikkarajeanda haw ghwanyawa ghaminaada aba hiji gang'uleadayyi Yeesu. Daa gidabittaayda siida gwayi, “Siisi aba huumwa ghayi Balleanda Aseetta gil!”

⁴⁰ Gwanda eara Gadeemsu abeeda ang'weerru nea sheagi. Jeedeaba gadeemsu gaba geaba Mariyaayda suguura Magadaleena, ea Saloome, ea Mariyaayda was gheamatta geaba Yakkoboyda mwanang' ea Yose.

⁴¹ Gadeemsu ghayi gabay godeaydooschi Yeesu damanda mideewa Galilaaya nea gagadiyeesa. Abeeda gwanda eara gadeem suuk saang'a adeana Yeesu Yerusaleemu.

Bunyitta Yeesu

⁴² Damanda huweewa shing'ada bea eaweettida, nii abeeda eaweeda sitting'ding'deawa gil nea imuchchu ea eaweetta Sabattohi.

⁴³ Ghang'eat nisiih Yoseefu was siida ng'eanyiida Arimattayu. Niny abeeda gaba gweargwa girgweageeda nea geawwal gheang'da muuchchi. Easuju eara niny goolla gafurriida Gheambalmeeda Aseetta. Siisi ghang'eat ak ghabwadakta ak gawa heeda Bilatto ghang'al musta Yeesu.

⁴⁴ Ghahamng'eanyi Bilatto iyiiy gideaba Yeesu nigeawiit ghami. Gaguursa shirikkarajeanda haw ak ghoanyaash Yeesu ea nigeawiit ghami.

⁴⁵ Iiduw nea ghwanyas Bilatto iitta aba heeda shirikkerajeanda gideaba Yeesu nigeawiit ghami, gwayeeshsha Yoseefu aada musta Yeesu.

⁴⁶ Gawa Yoseefu ak ghwasha hang'deesh, hit gawa ama hitta goorareang'u musta. Gokkwealsa hang'dida eeshiin akghwaat ea ghwayiin jeemba bung'eeni ghayi sighurghur nihit mida jeemba laghaana. Hean gooreakreaksa lagheaneeda haw ghuutta shoomanda.

⁴⁷ Abeeda Mariyaaydida suguura Magadaleena sea Mariyaaydida was gheamatta Yosehiin abeeda saawa ghwadahaada heeda siyiin musta Yeesu.