Marko 14 - NEAJEEDA EESH BEA BUUNEESSEAN

Geamwaal gichchea enuusta Yeesu

¹ Iimuchchu nea ghwashoada eawooji iyyeenya ak gayghwahidu ghwelmeeda Basakka ea dea mukkattajeega memmattawiitta. Abeeda gagasa ashoohoodiga hees sea ginealshoodiga diineeda Yahuudi gichchea ghoahaktaayda Yeesu akghoang'ng'waay ak gwanuus.

² Iiduw gwayi, “Adiiduw geang'ng'waanyi eaweechcheanji bea ghwelmeeda mideewa fuga sang'aan, gaygang'eessa fii buuneeda.”

Yeesu geayeasha nagheeda aba Beettaniya

³ Yeesu abeeda gwanda ng'eanyiida Beettaniya. Gwanda gheeh Simoneeda ghayi beardooschi udamusuura. Iiduw nea goopteada gweagiischi ghwahidu headaannyi Gatmooni eattuuna geadi dabichcheanda nyiit nagheeda haw sheayeat suguura nardo biissa ea ng'andit. Hidu goodalealsa uhuuda Yeesu nagheedida ng'andidiin.

⁴ Gwanda Fuga mwaatkwa nyareesi nea gwayi, “Nagheani geahhaak ng'eanyiida ghwasaan?

⁵ Nagheani ghwanyawa isishaayda ghoammu ghwanyas dinaaraji bughalaji samwagu. Nea lappiyeani ghwanyawa iisinyas gajeattawaada fuga barbari.” Gewwoowusa gatmoodida muuchchi.

⁶ Nea Yeesu niny gwayeeshsha, “Anung'waada gatmooni oagasean. Gotteawiissi naaha? Nii gwasinnean gittoabiiw.

⁷ Fuga barbari gondeaydoscheewi galeega sean. Abeeda iyoogasayi aweada gajaweada. Duukku Aniini ea maydeabiitta heedeang'wa galeegasean.

⁸ Niny gwasin gidida ammuun. Niny ghwayeashanaan nagheada nea gwadawwiisa saseedeanyu bunyitta.

⁹ Ak ghamneawa aba huumwa ghoanung' darukuneegwa, heeda wassean aba muunda ng'eanyiida jea eweay ak gerukkwiida Giijasta Miy, ng'asheanji sin gatmooniin gajeerukku ghoaw gichchea epkkeatta niny.”

Yuuda ghamwas ghwala bwadaw Yeesu

¹⁰ Hean gawa Yuudaayda Iskariyotti bea jeedeaba ginealangiga attamaniyyeenyean, ea gawa heeda ashoohoodiga hees nea gagasa ghwala bwadaw Yeesu.

¹¹ Nyas iidi ashoohoodiga gahoosan muuchchi nea gwayeeshsha Yuuda, “Eara lappiya gajegoona.” Hean gabiissa ghamwaal Yuuda gichchea ghwalaapta bwadaw Yeesu.

Yeesu ghang'aap hamitta Basakka sea ginealangaaschi

¹² Eaweetta madeeda bea ghwelmeeda mukkattajeega memmattawiitta, nea eaweetta sinuusa dayeenda gisilleanda bea ghwelmeeda Basakka gil, ghoanyaash Ginealanga Yeesu nea gwayeeshsha, “Gigasayi esinneey hamitta ghwelmeeda Basakka aba yeenu?”

¹³ Gojeakta Yeesu ginealangaaschi assiyyeenya nea gwayeeshsha, “Aweayeena ea ahitta jeeda mujiini. Gajaroonnyeewana siida sar sirbiida beega. Ghoayaachchi geeshta.

¹⁴ ea ghwahitta gheeda jea gawa jeeda, iyoahitti goyeeshshi siida bea gheeda, ‘Gwayi Ginealshochcheanda abwaara aba jeedeaba gheang'u ghooriini siyeaksi hamitta ghwelmeeda Basakka aniini ea ginealangeasu?’

¹⁵ Ak gayghoahimneegwa ghooriini haw ghayi sideeksa uhuumba nuut, nea sisin muuchchi ak goosissi jeani.”

¹⁶ Gaweay Ginealanga ea gaweay jeeda mujiini. Hitta ghwadaakta ng'asheega sean gidagwachchi rukutteayda Yeesu. Hean gwasin hamitta ghwelmeeda Basakka.

¹⁷ Huuw shing'ada ghwahidu Yeesu nea godeana ginealangaaschi attamaniyyeenya.

¹⁸ Iiduw nea geyeagiischi gwayeeshsha Yeesu, “Aba huumwa ghamneawa geayeeshshineegwa jeedeang'wa gwanda siida eambuchcheewi jea ghwalaabwan bwadaw.”

¹⁹ Ghang'ut giseaneega Ginealanga ak gaba nii anyaash Yeesu nea gwayeeshsha, “Ssiida aniini?”

²⁰ Gwayeeshsha Yeesu saawa, “Siida gwanda jeedeang'wa agoogeani attamaniyyeenyean. Nukkwa ghamneawa ghang'utta mukkatte sea aniini aba jeeda buurda.

²¹ Asi Balleanda siida gaygawa hechchea gawa gawuurji ginnyaashta Ng'ooruutka Ghaydit. Nea ea dashageada siitta jea ghwala bwadaw Balleanda Siidean. Siisi ghayi ghang'wana ea meeji.”

Hamitta Ng'uttamiida

²² Iiduw nea geyeagiischi ghwasng'u Yeesu mukkatte ak ghamwaash ghawooda. Hit gageanu gwalakkiisa ginealangaaschi nea gwayeeshsha, “Oang'ng'waanya ayaaga nii saseedeanyu gil.”

²³ Ng'atta Gageanu bayookta ak gabadiischeesa Aseetta, ak goheaksa saawa ak ghwaleayda sean.

²⁴ Gwayeeshsha Yeesu, “Suuh foojeandeanyu neajeeda ghayi sihhiida appadahuukka fuga saang'a gil.

²⁵ Aba huumwa, Mayguttali difaayeani was mideega haghweega musabiibuun, ea eaghus galannya dawa dali gea eashish aba jeeda Gheambalmeeda Aseetta.”

²⁶ Hean Gwasarman amahit gwaritta, ak gwascheeng'sa Gijeeda Masaytunajeega.

Yeesu gwarukusa Betro gideaba gayheawanaan

²⁷ Gwayeeshsha Yeesu ginealangaaschi, “Agooga gajamwachmwajaan ak ghoanung'wanaan heeda aba gideaba gwayi Ng'ooruutka Ghaydit, ‘Gaydabwar jeagiischochcheanda ak gayghwadarda gisilga.’

²⁸ Nea iiduw iyeaduudu gaydeasheedeawaneegwa dawa Galilaaya.”

²⁹ Ghwalamda Betro ak gwayeeshsha, “Eara ghamwachmwachnyi fiisu seaniin, ak gwanung'useey heeda aniini mayghanyi danung'waneey heeda.”

³⁰ Ghwalamda Yeesu ak gwayeeshsha, “Aba huumwa geayeeshshineey, aweani bea ghamneawean heeda mii goguula nghaghooda niba iyyeenya, gajeaniheawanaan niba samwagu.”

³¹ Gabiikta Betro gwayeeshsha nea goomajeek, “Adiiduw aniini maydaheawaneey, goobal emeewuudayeena, maydanung'useey heeda.” Ghwanyaashtunu eara ginealanga suurja.

Yeesu ghamwaash Aseetta aba Getsemaani

³² Geweay ea eahitta hiji suguura Getsemaani. Gwayeeshsha Yeesu aba girrukusa ginealangaaschi, “Oppitpiida aba hiji ghanyi damwaash Aseetta.”

³³ Gaguursa Betro ea Yakkobo ea Yohaana ak godeayi. Ghang'ut giseaneega nea ghawishaan uhuuda.

³⁴ Hean Gwayeeshsha saawa, “Ghwariikghta gwanuus guroroodeanyu giseaneega. Oppiidana hiji nea adoolilli, oang'ng'wearni.”

³⁵ Ghwaloat geash gili miigeaw ak gwajaksa geaw ng'eanyi, ak ghamwaash gideaba, nung' danaawa gheadi bea sawanadeedean.

³⁶ Ghamwaash Aseetta nea gwayeeshsha, “Ea Bwaabwa, Bwaabwa, ang'iing'i manda gida miimmuusi. Aniyean gischoarjaan bayookcheanji bea sawanadedean. Nea adaghoaw humeandeanyu, nung' ghoaw daang'u.”

³⁷ Iiduw nea Gabiikta hoowa ghwahitta nea ginealangiga assamwaguun ea nilil. Ghoanyaash Betro, “Ea Simon, Annilli? Mimmuussi ang'wearni eara gheadi nuwaasi?”

³⁸ Ng'atta gwayeeshsha ginealangaaschi, “Oang'ng'wearni nea ghoamwaashchi Aseetta ea mesmeegwa. Gurorooda gagasa amaduw saseeda ea manduurda.”

³⁹ Gabiikta gichcha ak ghamwaash Aseetta nea gwarukuta ng'asheega ghwanyawa rukkwiida.

⁴⁰ Iiduw Gabiikta gichcha hoowa bea ginealangaaschiin ak ghwahitta nea nilil. Eara gheanyanga nyaawa mudughoammu ghwajaat aba ruweanga ak amwanala eara gichchea gwarukutta.

⁴¹ Iiduw Gabiigu heannyaawa deaba samwagu ak gwayeeshsha, “Akkudandana jeeda ruweanga nea gofuufchi? Anung'waada gwadeenu! Nugul damanda! Nukkwa Balleanda Siida gajeayiin geattinga fuga ring'eega.

⁴² Asi ang'eatng'eada eebu. Oang'ng'wearda siitta jea ghwalabwan bwadawiin nineekkiit.”

Ging'ng'ooyda Yeesu

⁴³ Damanda duu gabaloola Yeesu, ghwahidu Yuuda nea gaba jeedeaba ginealangiga attamaniyyeenyean, ghwahidu nea goodeana emeettuw mideawa bwangajeega ea gulupkeakka. Fiisu abeeda gojeagu ashoohoodiga hees, ea ginealshoodiga diineeda Yahuudi ea gweargwa.

⁴⁴ Abeeda Yuudayda jea ghwala bwadaw Yeesu nirukusa emeeda gichchea goroorda. “Siida jea dasam gheatta abeeda niny gil ak ghoang'ng'waanyi nea goofurji.”

⁴⁵ Hidu Yuuda ghang'atta ama hitta heeda Yeesu gwayeeshsha, “Ea Ginealshochcheanda!” Nea ghwasam gheatta.

⁴⁶ Hean daa Emeeda ghang'eatng'eat ak ghoang'ng'waay Yeesu.

⁴⁷ Aba jeeda fuga ghwanyawa minaada sea Yeesu gafagu Sih bwaanga ak ghwalas soomjeanda ashoohoochcheanda haw ak gwalaksa ng'eanyi iitta.

⁴⁸ Hean gwayeeshsha Yeesu fugiga, “Ghamneawa goyeadu bwangajeega ea gulupkeakka aba ging'ng'ooydeanyu neada ghoanung' dawuurji mareanghweanda?

⁴⁹ Easuju nea geanealayi buuneeda aba jeeda Gheeda Sibatta Aseetta, anda mong'ng'onnyean. Ak gwasa ng'asheesu ghoaw gidanyaashta Ng'ooruutka Ghaydit.”

⁵⁰ Gamng'aw Ginealangaaschi sean ak gwasalda gwanung'usa heeda.

⁵¹ Abeeda gweattu geeshta Yeesu Balleanji mwanang' nea gookwa hang'da. Hean geegasa eang'ng'waay.

⁵² Iiduw ghamwanmwanda Balleanda ak gwanung'usa heeda hang'daannyi ak ghafwach nea dawiish.

Yeesu aba madeeda girgweageeda

⁵³ Geayaat Yeesu ea eayaat gheeda Ashoohoochcheanda Haw. Ghwahitta nea nibattiisa geat hoowa ashoohoodi suuk hees sea gweargwa sea ginealshoodiga Diineeda Yahuudi.

⁵⁴ Abeeda Betro gamaseaw Yeesu nea sheagi, gawa jeedeaba gheedida bea ashoohoochcheandida hawiin, gopteada ak ghoabwaal beasta sea furiischoodiga.

⁵⁵ Iiduw gagasa ashoohoodiga hees sea gweargwa girgweageeda siida jea gamuuwwu gidinyeanda Yeesu, ak abeeda gwanuus ak aamwanyasa.

⁵⁶ Abeeda gwanda Fuga saang'a muuwwu ng'asheega ng'uyyeega appadayda Yeesu. Amaduw ng'asheega nyaawa ea mudu gaweechchi.

⁵⁷ Gwanda Fuga suuk minaada ak gamuuwwu ng'uyyeega aba badayda Yeesu nea gwayeeshsha,

⁵⁸ “Ghayi Siyiinyi siisi nea gwayeena, ‘Gaydanyarja Gheawi Sibatta Aseetta ghayi sideasa geattingean, ak aba jeemba eawooji samwagu gaydadeas nuut dea meesnana geattinga buuneeda.’”

⁵⁹ Iiduw eara ng'asheega Nyaawa muuwwu ea meatteayyi.

⁶⁰ Ghang'eat ashoohoochcheanda haw aba madeeda buuneeda ak ghoanyaash Yeesu, “Mwayshaaha ng'ashaani? Fiisu gwarukuna naaha bwadaydaang'u?”

⁶¹ Ghwasiinda Yeesu marukuta eara ng'ashaanjagi. Gabiikta asohohoochcheandida ghoanyaash Yeesu nea gwayeeshsha, “Heappi ang'iing'i guwosi Gristoyda was Balleanda Aseetta Ghambidaadi?”

⁶² Gwayeeshsha Yeesu, “Ea ada geawoschi. Ghabwada nii gajadaaha Balleanji bea Siidean nea gobideada aba meatkweeda geattinda dugwa bea Aseetta hoauur, nea godeana shamoghuutka humng'eeda.”

⁶³ Ng'atta ghabwashaada ashoohoochcheanda haw hang'waakkaaschi ak gwayi, “Gudeegassa mushoodispa naaha?

⁶⁴ Noayiinyi gidang'eawwiida Aseetta! Goyeennyiin agooga?” Gwayi sean siisi gagasa enuus.

⁶⁵ Gwanda Fuga mwaatkwa ang'urriisa ng'usheega, geedukutta gheanyanga ak geabwar madeang'akka nea geyeeshsha, “Heappi rukuni siida lasnyi!” Eara Fuga gadiyeeda ghabwar madeang'akka.

Betro ghwashaang' Yeesu

⁶⁶ Damani duu gwandeawa Betro seammodean, ghwahidu Hudi gadiydooschchi aba gheeda ashoohoochcheanda haw.

⁶⁷ Iiduw nea ghwadaa Betro nea gwaju beasta, gong'weersa ak gwayeeshsha, “Eara ang'iing'i gindeaydooscheewi Yeesuyda Nasareetti.”

⁶⁸ Ghwashaang' Betro nea gwayeeshsha, “Mwaanali, anda eara gidurgu mwaanali!” Ng'atta ghang'eat Betro ak gawa ea gawa hoowa bea dooshtean. Miighoaw gil ea niguul nghaghooda.

⁶⁹ Ghwadaah Hudideani Betro gichcha ak gwayeeshsha fiisu ghwanyawa minaada, “Eara siisi gaba jeeda fuga easuju adeaydooschi Yeesu.”

⁷⁰ Iiy Betro gabiikta ghwashaang' gichcha. Miighoaw gil geyeeshsha Betro aba girrukusa Fiisu ghwanyawa minaada, “Aba huumwa eara ang'iing'i gibeahi jeedeaba fugiga aba gideaba guwosi siida Galilaaya.”

⁷¹ Ghamwaashta geaw Betro nea ghwaak habeawooda nea gwayeeshsha, “Aniini siisi orukku iittannyiin mwaanali.”

⁷² Miighoaw gil gabiikta goguul nghaghooda deaba iyyeenya. Hean gabiissa ghoapkaat Betro gidaheetta rukusa Yeesu bea gideaba, “Heeda miigabiikta nghaghooda giguleandeaba iyyeenya gajaniheawanaan niba samwagu.” Hean gabiissa Betro goorareang'u dabeakka goyyeawda.