Marko 13 - NEAJEEDA EESH BEA BUUNEESSEAN

Yeesu gabaloola nyarjeawda Gheeda Sibatta Aseetta

¹ Damanda ritteawa Yeesu jeeda Gheeda Sibatta Aseetta gwayeeshsha siyagi was Ginealaneadaannyi, “Ea Ginealshoochcheanda, ang'wearda gealsu hesiin gissam, ea lagheanga ghayi sideasa!”

² Ghwalamda Yeesu ak gwayeeshsha, “Ghamneawa gidaahi gealsu heesiin? Lagheang'su ghayi sideasaan manda dea jea enung'usa heeda aaragi. Gajeeng'ng'adeadu sean.”

Sawanadeeda ea ghabasta

³ Eaweechcha Yeesu goopteada aba uhuuda Gijeeda Masaytunajeega deaschi Gheeda Sibatta Aseetta gaweay geaba Betro ea Yakkobo ea Yohaana sea Andereya ak ghoanyaash Yeesu nea gaba geat gideaba,

⁴ “Aniyean rukuneasa ng'asheesu gayghoaw eeju? Ak gajerroorda naaha aba hinnoodeaba ng'asheesu.”

⁵ Gwayeeshsha Yeesu saawa, “Ashageada adagwareenganneegwa sih.

⁶ Aba gideaba gayghapka Fuga saang'a jea ghapkaana gheawungeasu nea gwayi, siida aniini gil! Ak aba sareani gaygwareengani fuga saang'a.

⁷ Iyoayiinyi ng'asheega ng'uchcheadinga ea gijuureanda ng'uchcheeda ea adoohirbabannyi. Ng'asheesu mayghwashiy hinnooda, duukku mudeanooda ea miighoaw.

⁸ Gaygaba ng'eanyiini ng'uchchi nuut, gaygaba Sugoochcheanji ng'uchchi nuut, gaygwasaw ng'eanyiida gichcha ak gaygang'eeda gejeadinga. Ng'asheesu seaniin gaygawuurji lajooda gatmooda jea gwaji.

⁹ “Asi agooga ashageada, aba gideaba gayghwadeagwa Buuneeda gheeda sirgweachcha, nea geabwareagwa aba jeesinga ghoorajeega sinnealshachcheewa. Gajeayadeagwa madeeda fuga hees ea madeeda sugoodiga appadaydeanyu, ak abeeda gajahuuwa mushoodigeasu aba madeannyaawa.

¹⁰ Nea hinnooda jea ghwahidu mudeanooda ng'eanyiida, abeeda gajeasurukusa buuneessean Giijasta miy.

¹¹ Nea eara isiyadeagwa gheeda sirgweachcha, ea adoohirbabannyi, appadayda ng'asheega jea arukuta, ihidu damandida, arukuta ng'asheanda wassean sinyunneegwa, aba gideaba mii agooga gil fuga jea gabalool, gaygabalool Gurorooda Ghaydit.

¹² Nea Siida gayghwala bwadaw oorjeeda ghaamwat ak genuus, nea Bwaabwa gayghwala bwadaw orjeadaannyi, eara Diibiga gayghabwar ghweaniga nyaawa ak gwanuuseada.

¹³ Ak agooga gayghwasteagwa Buuneeda aba gheawungeasu. Nea siida jea ghamilikghta ea gagul damandida bea mudeanoodean, siisi gayghaghu.”

Gidamuy jea gweadu nyariida

¹⁴ “Asi iyoadaayi gidamuy jea gweadu nyariida nea niminaada aba heeda mahaguuwsiina, (Siida assoamwa ea dajeeng'na gidawas) asi abeeda fuga mida ng'eanyiida Yudeeya ea dasalsiina iheenga heayeeniga.

¹⁵ Abeeda siida deeppa eanyasa uhuuda gheeda adaghwararang'aan, aduwi geanni eara gidamida gah jea aadana geadi.

¹⁶ Siida deeppa eanyasa jeeda madamnyeanda eara hang'da badayda ghwanyawa nung'wa ghoah adaghamwaghaada.

¹⁷ Eshshiina gadeemga was bungaroodiga ashageada, ea gadeemga reer diibiga aba damandida!

¹⁸ Gomoorayi ea mwahinna ng'asheesu munyasiin damandida bea gorogedean.

¹⁹ Aba gideaba damandida gaygwanda sawanadeeda manda dea jea eegala ghang'eada deaghayi nubwada Aseetta ng'eanyiida ea gagul ghamneawa. Ak ea maygudu gabiigu gichcha dea jea gawuurji nih.

²⁰ Inyeeda gwachchi ea moong'ayiida Ng'uttamiida askwearjoojikka ghanyeamanda siisi jea ghwalalaan. Amaduw appadahuukka fuga loossa geaw anisuuy Ng'uttamiida askwearjoojikka.

²¹ “Asi iyeeshshineegwa Siida, ‘Ang'wearda Gristo gwanda hiji,’ ghana gwayi, ‘Gwanda hoowa,’ adoamwaschi.

²² Aba gideaba gayghwahidu Fuga was Gristohajeega ng'uyyeega ea sibanga ng'uyyeega, gayghoahiimu gwadeagooda ea ng'asheega deamdeameadi, aba hutteawda fuga loat Aseetta.

²³ Asi agooga ashageada. Aniini nearukuneegwa ng'asheega sean heeda mii ghwahinna.”

Hinnooda Balleanda siida

²⁴ “Asi askwearjoojigiga nea ning'atta ng'asheandida ng'waaniin, gaygwattuudu gheang'da Aseetta nea eara sheeda ea maygudu goboong'u.

²⁵ Nea miinga humng'eeda gaygoobittu nea gaygwaduumduum uurda humng'eeda.

²⁶ Ak gajeadaah Balleanda Siida nea gwashubeana jeeda shamoghuutka nea gaygwandeawa uurda haw ea gigheambiitta.

²⁷ Ak Gaygoojeakta giijasoodigaaschi bea humng'eeda godearsa meadajeega assang'wan bea ng'eanyiida gaweay goweamu fuga loossa geaw, ghang'eada mudeanooda ng'eanyiida ea ghoaw mudeanooda humng'eeda.”

Gidanaal fii shabogheechcheanda

²⁸ “Agooga ang'ulla shabogheechcheanda. Gwanda gichchea ghoanaleagwa. Iyabit seenga nea ghafiirfiir gea nyawiiri gajanala gideaba domeelda nineekkiit.

²⁹ Gwasnu eara agooga iyoadaayi ng'asheesu nea ghwahindu, anala gideaba Balleanda Siida nineekkiit muuchchi.

³⁰ Gearukuneegwa aba huumwa, Seaygeani bea ghamneawean mayghwanaawda nea miyadaaha ng'asheesu.

³¹ Humng'eeda ea ng'eanyiida gaygammudean. Duukku ng'asheegeasu ea maygammudean.

Manda siinnal askearjeanda ghana damanda

³² “Dukku askwearjeandida, ghana damandida manda siida nal. Eara giijasoodiga humng'eeda, ghana Balleanda Aseetta. Siinnal geaghus Bwaabwa akghwahit.

³³ Ashageada nea ghoang'ng'wearu, aba gideaba mwoanali damanda jea gawaseewa.

³⁴ Gawuurji Siisi ghayi wea bareannyeekka ak gwaruuda nea ghwanung'wa gheeda fuga gadiyeeda. Nea nigeanu ak gaba siisi adaw gichchea gwasin ak gageanu ghwayiin furiischochcheanda jea gafur dooshta nea gwayeeshsha milmiliida.

³⁵ Asi oang'ng'wearni adoolilli aba gideaba mwoanali eaweetta jea ghwahinna siida bea gheeda, gwadeeppa ghwahidu shing'ada, ghana gwadeeppa ghwahidu eaweedagweena, ghana gwadeeppa ghwahidu beashatta, ghana gwadeeppa ghwahidu nea gorearu Aseetta.

³⁶ Asi oang'ng'wearni gajiiduw gwashameegwa ak ghabwardaneegwa ng'eenyi nea goondi jeerruweanga.

³⁷ Gichchea darukuneegwa oagasean, gaydayi, Oang'ng'wearni, adoolilli!”