Marko 12 - NEAJEEDA EESH BEA BUUNEESSEAN

Gissigala fuga aragan madamnyeanda misabiibu

¹ Ng'atta gobalool Yeesu saawa nea gagalla geat ng'asheega nea gwayeeshsha, “Ghayi sih ghabwar madamnyeanji ittaannyi ak gang'eapsa misabiibu. Hit goneaweesa madamnyandannyi hilooga, gageanu ak gwasin healadeeda jea emurriisa difaayeeda was mideega haghweega misabiibu, ak gwasin eara madalooda jea efurra madamnyeanda. Hean ghwanung' gooragan Buuneeda madamnyeandannyi. Ng'atta iiduw gawa Siidida ea gawa daroorakka sheagi.

² Damandida bea lajittean Gojeakta soomjeanji ittaannyi heeda fuga aragan madamnyeanda, gweadu booga sinyas bea madamnyeanda was heeda dobiiwsa niny.

³ Ghoang'ng'waay Fugiga soomjeandida ak ghabwar amang'atta geanung' gabiikta nea mwaada gil.

⁴ Gojeakta gichcha soomjaan nuut, earada geesawan nea geesma ng'asheega munyas.

⁵ Gabiikta gichcha Siidida bea madamnyeandeen gojeakta soomjaan nuut, amaduw gwanuus fukka aragan madamnyeandeen. Eara fuga suuk sichcheakta earaga mwaatkwa geabwar nea mwaatkwa genuseada.

⁶ Abeeda ea sippuussa heeda siyagi, nea jeaptaannyi bwariiy gil. Iiduw Gojeakta ada nea gwayeeshsha geaw, ‘Gajeawwal gheang'da.’

⁷ Hean gwayeeshsha geat Fukka, ‘Nii siida jea numuji gwahearaniischi gil asi enuusa, ak abeeda gaygabwaheasa hearaniischooda!’

⁸ Hean geang'ng'waay ak genuus amahit geejakta musta eannaawa hilooga madamnyeanda.

⁹ “Asi gaygwasin naaha siida bea madamnyeanda? Gayghwahidu ak ghwalas uhuudeaba fukka ghayi aragan madamnyeandean amang'atta gayghwanung' gooragan fii suuk madamnyeanda misabiibu.

¹⁰ Assagooga miyoassoamwana gissung'waar bea gideaba, ‘Lagheaneani aneawwa ghaang' deekshoodiga, ghamneawa aniiw lagheaneeda haw akkar gheeda.

¹¹ Nii gidaghayi sin Ng'uttamiida, Ak adamdamwaat aba hedeanya.’”

¹² Iiduw Ashoohoodiga ea ginealshoodiga diineeda Yahuudi ea gweargwa gagasa ghoang'ng'waay Yeesu aba gideaba saawa nijeeng'u ng'asheega ghwanyawa rukku beadi sigala saawa. Hean geegasa eang'ng'waay, amaduw ghoawal emeeda. Ghang'eat ng'eat ak gwanung'usa heeda.

Giruutteayda gwaadi

¹³ Gechcheakta buuneeda mwaatkwa was Farisaayajeega, ea fuga duuba Heroode gaweay gobalool Yeesu nea gagasa gichchea eaghasta aba ng'asheagaaschi.

¹⁴ Geapka headaannyi ak geyeeshsha, “Ea Ginealshoochcheanda, aseasa geanalli gideaba guwosi siida doabiwaat rukkwiida humeannyeekka nea ghanyea miiwali gheang'ba sih. Nea eara hawunda siida ghanyeamiduuppi, ak ginealayi ng'asheega naweeda Aseetta bea huumwa. Heappi Rukuneasa ea ghwadoabiiwi gideaba gerruutta gwaadi eattaw Gaysaari ghana manda? Gajeattawa ghana mwajeattawa?”

¹⁵ Gwajeeng'u Yeesu gidammittaayda geat ak gwayeeshsha, “Anda agooga googasayi gichchea aghastanaan? Heappi ayeanni lappiyeeni suguura dinaariin dadaah.”

¹⁶ Gehhiimsa ak ghoanyaash saawa, “Uhuuni ea gheawung'su gabeang'a?” Geyeeshsha, “Gaba Gaysaari.”

¹⁷ Gwayeeshsha Yeesu saawa, “Oattawa Gaysaari gida was dea Gaysaari ak ghoattawji Aseetta gida was dea Aseetta.” Ghwanung' ghahamng'eanyi muuchchi buuneeda.

Ng'asheega dunnooda

¹⁸ Ghapka heeda Yeesu Sadukkayajeega mwamwasa gideaba gaygwaduuttu buuneeda, ak gwayeeshsha,

¹⁹ “Ea Ginealshoochcheanda, ghayi Muusa gwayeashshineasa, ‘Siida iimeah nea gwanung'usa heeda gatmooda miigwaji, gatmooni was masiinng'weandean gaygwajiila diibiga oorjeeda ghamasiyeadaannyi. Nea diibiga iisiji gajegushteawa ghweanda nyaawa ghayi meah.’

²⁰ Ghayi gwanda oorju ispwa bea ghamwadagi. Gageeshshi oorjeeda haw amaduw ghami nea ghwanung'wa hiji gatmooda miigwaji.

²¹ Iiduw masiinng'weandida gwahearan oorjeeda bassa. Iiduw ghami earada nea gatmooda ea miigwaji. Gabiikta gwahearan gatmooda orjeedeaba samwagu.

²² Iiduw gatmoodida gwahearan Oorjookka seaniin nea gameewwa agi ea goosha sean ispeannyaawa nea gatmoodida ea miigwaji. Muchchu aba huydeanda eara gatmootta ghami.

²³ Asi heappi eaweeda dunnooda gatmooni iiduw gaygaba ng'eaha? Gatmooda nighi buuneeda ea ghwahitta ispwa.”

²⁴ Gwayeeshsha Yeesu saawa, “Agooga noaramwaschi muuchchi aba gideaba moanali ginnyaah ng'ooruutka Ghaydit ghana uurda Aseetta.

²⁵ Aba gideaba eaweettida iduuttu buuneeda ea maygageeshshi nea majeegeena, gaygawuurji giijasoodiga humng'eeda.

²⁶ Asaha aba ng'asheesu bea dunnoaniin ghayi needa ea miyoassoamwana aba jeeda gittabooda Muusa heeda sung'waar ng'asheega geetta mughuush yeada beasta jeeda? Ghayi aba hoowa Aseetta gwayeeshsha Muusa, ‘Aniini geawoschi Aseetta Abrahaamu ea Aseetta Isakka ea Aseetta Yakkobo.’

²⁷ Niny mii Aseetta fuga nimeewa gil. Niny Aseetta fuga duugwanda. Agooga noaramwaschi muuchchi.”

Digheanda haw

²⁸ Deagheatta ghwahidu Ginealshoochcheanda diineeda Yahuudi ak goleysiit sheang'nyeeda nyaawa. Daa gideaba Yeesu ghwasha ng'asheega nyaawa nea ghoadoabiiw, ghwaan ak ghoanyaash, “Aba jeeda digheannyyeekka sean ahaw anneeda?”

²⁹ Hean gwayeeshsha Yeesu, “Dea madeeda nii gil, ‘Aniyean aleaydiit Israeeli! Ng'uttamiida Aseetteanya gil. Ng'uttamiida niny gil nea gaba geaw.

³⁰ Bwariinya Ng'uttamiida was Aseettaang'u aba jeadaang'u sean ea aba guroroadaang'u sean, ea aba fughareadaang'u sean, ea aba urdaang'u sean.’

³¹ Ng'asheanda haw bea iyyeenya gwayi, ‘Bwariiyda gischeewoochcheandaang'u gidubwariiydi geaw.’ Manda digheannyeekka hees naawa suu assiyyenyean.”

³² Gwayeeshsha Ginealshoochcheandida bea Diiniin Yahuudiin, “Asi huumwa gil ginealshochcheanda! Aba hiji girgu huumwa gideaba Aseetta aagi, ak ea manda nuut geaghus niny nea gaba geaw.

³³ Ea huumwa gil siida geaghus ghabwariinya Aseetta jeadaannyi sean ea aba fughareadaannyi sean ea aba urdaannyi sean. Ea huumwa gil siida geaghus ghabwariiyda gischeewoochcheandannyi gidabwariiyda geaw. Ng'asheesu assiyyeenyean ea majeekcheewi ea ghwanaawa eara gisilleanda ghadooweeda ea haleanjeeda suurja sisappa geadi sigadoowanniida.”

³⁴ Daa Yeesu girrukutteayda ng'asheega nea gomajeek gwayeeshsha, “Ang'iing'i ghanyeamuwosi sheageewa Gheambalmeeda Aseetta.” Ng'atta balooli ea mudugwanda siisi badaksa Yeesu ghoanyaash ng'asha suuk.

Iitta Gristo

³⁵ Damanda anealsheewa Yeesu aba jeeda Gheeda Sibatta Aseettean, ghoanyaashta nea gwayeeshsha, “Ghwasaan anda ginealshoodiga Diineeda Yahuudi gwayeena Gristo Balleanda Dawdi gil?

³⁶ Damandida gwayi Dawdi aba uurda Guroroada Ghaydit ghwanung' gwayi, ‘Ng'uttamiida gwayeeshsha Ng'uttamiideanyu, Beenni abiidana meatkweedeanyu bea geattinda dugwa, ea danung' allaapta ng'eanyi fuga was weajoodigaagu.’

³⁷ “Dawdi niny gaguura Gristo Ng'uttamiida. Asi abeeda Gristo gayghoawattaan jeaptaannyi?” Abeeda Emeeda goleeysiit ng'asheega Yeesu nea gahoosan.

Yeesu gwayeeshsha buuneeda ashageada ginealshoodiga diineeda Yahuudi

³⁸ Gwayi Yeesu aba jeeda ginealshoadaannyi, “Ashageada ginealshoodusu bea Diineeda Yahuudiin. Fuga bwariiy gwaleammideawa hang'weakka geawwi, nea geyeenniisa seayu aba mureeda aba naada. Fuga ama hitta ghoorajeega sinnealshachcheewa gwajiir hoorgajeega madeeda.

³⁹ Nea eara Iweay gealga ghwelmeeda ghwanyoahaada hoorgajeega madeeda.

⁴⁰ Fuga iissa ghwaak haleanjeeda masiinng'weega nea iissa ghamwaash ghawooda nea gogeawiit! Eaweeda girgweaksiinda gayghwanyas ghoorjooda haw.”

Gidasabwa geadi gatmooni was masinung'weanda.

⁴¹ Muchchu goopteada Yeesu aba jeeda Gheeda Sibatta Aseetta nea nekkeewa sandakwajeanda siyiina haleanjeeda ghadooweeda. Gang'ula gidiinda Buuneeda lappiya jeeda sandakwajeanda siyiina haleanjeeda ghadooweeda. Ghwadaah meanang'oodiga inyeessa ghabwaang'da lappiyeassaang'a.

⁴² Deagheatta ghwahidu Gatmoanagi bwarbwar was masiinung'weanda, ak ghoadayda heelaji iyyeenya akghwahit.

⁴³ Hean gaguursa Yeesu ginealangaaschi ak gwayeeshsha, “Aba huumwa geayeeshshineegwa, gatmoani was masiinung'weanda bwarbwariin, nii ghamneawa ghoadayda gidahaw ea ghwalaabwa hoowa buuneessean iin lappiya jeeda sandakwajeanda siyiina haleanjeeda ghadooweedean.

⁴⁴ Aba gideaba Buuneeda suurja ghoadayda gidabinna jeeda baruureega nyaawa. Sunung' Masiinung'weanji earappeadi bwarbwariin niidayda gidamideawa sean. Niidayda daghwardaannyi sean.”