Marko 11 - NEAJEEDA EESH BEA BUUNEESSEAN

Yeesu ghwahitta Yerusaleemu ak geadeaptaawa hoseaneega

¹ Iiduw nea gwanekkiissa Yerusaleemu, ghwahitta mujiinajeega Betfaage ea Beettaniya nekkeewa gijeeda mida geediga suguura Masaytunajeega. Gageanu Yeesu ginealan iyyeenya aba jeeda ginealangaaschi ak gojeakta gosheeda.

² Nea gwayeeshsha, “Aweayeena ea ahitta gharang'dida mida mwadiin. Iyoahitti gajanyasana hoowa digeeda migwaheedu ghayi eara ginealda miyeannaal. Gajadaaha nea radaat ak goottinnyi, ak gorjeanu.

³ Ideeppa ghoanyasheagwa buuneeda gideaba ghwasaan andagottinnyi goyeeshshi gagasa, ‘Ng'uttamiida nea gaygabay godeelu.’”

⁴ Gaweay Fugiga ak ghwanyasa ghuutta naweeda digeeni sirassa geetta dooshta. Hitta nea goottinu

⁵ ghwadaa Fiisu ghwanyawa mida ghuutta naweeda ak ghoanyaash nea gwayeeshsha, “Digeeni goottissi naaha?”

⁶ Gwarukuta Ginealanga ng'asheega sean ghwanyawa rukusa Yeesu. Geesiksa ghoarjaanda.

⁷ Gearjaanda digeeda ea ghwahitta heeda Yeesu. Gegeanu hang'weakka ak geayiin badayda digeeda amahit gwading'da Yeesu badayda ak goopteadawa.

⁸ Gageanu Fukka saang'aan ak ghoabwarghaan hang'weakka nyaawa aba naweeda, nea buuneeda suurja gaweay jeesinga madameega gwalagu seenga geediga ak ghoabwarghaan aba jeeda naweadaannyi.

⁹ Gwasim Buuneeda gaweay nea heeda measheedeawana Yeesu suurja gahuuydeana nea gwayi sean, “Oakghambiida Aseetta! Sibadischeesa siisi wuna gheawunga Ng'uttamidean!

¹⁰ Sibadischooweey ea gheambalmeeda sugoochcheanda ghayi was ghweandeanya siyi Dawdi. Oakghambiida Aseetta mida humng'eeda.”

¹¹ Ghwahitta Yeesu mujiineeda Yerusaleemu ak gawa jeeda Gheeda Sibatta Aseetta. Hitta ghoang'wearda gwasikteawa haleanjeessean. Iiduw ghwadaa niiw shing'ada. Ghang'eat gawa ng'eanyiida Beettaniya nea godeayi ginealangaaschi attamaniyyeenya.

Yeesu ghamwaashta shabogheechcheanda

¹² Muchchu nea gwanda naweeda gwaleabu ng'eanyiida Beettaniya ghwayeachchi Yeesu.

¹³ Ang'wearda ghwadaa shabogheechcheanda nea gudeasheagi nea gwandeawa seenga saang'a. Gaweesa ghwadaa eajeaghwanyasa haghweega. Hitta heeda nea gwasikteawa ghwadaa geaghus seenga nea gwasin gideaba miighwahitta damanda jea gwalakna haghweega.

¹⁴ Gwayeeshsha Yeesu mtineedida, “Maygudughwaganeey sih haghweega ea ghoaw gweanynyeekka manda mudeanooda.” Gwarukuta ng'asheandida nea abeeda ghwayiiy ginealangaaschi.

Yeesu gawa jeeda gheeda sibatta Aseetta

¹⁵ Ghwahitta Yeesu Yerusaleemu ak gawa jeeda gheeda Sibatta Aseetta, ak goruutta jarooda fuga gwachchi shaayda ea gea shah haleanjeeda. Ghoadandaarda haleanjeeda fuga ghwanyawa nyarja lappiya ea hoorgajeega fuga ghwanyawa shaayda ghariibajeega.

¹⁶ Ea mwanung' ghang'atta sih gwasik jeeda Gheeda Sibatta Aseetta nea ghwaada geadi gil.

¹⁷ Hit gabiissa Ghoanaal buuneeda nea gwayeeshsha, “Ghayi Aseetta gwayi aba jeeda Ng'ooruutkaaschi, ‘Gheawi itteanyuun gayghoaw heechchea gabattewean emoojiga sean.’ Ak ghoanung' ghoaw gwaleeda jea gafunnya geat mareanghooga!”

¹⁸ Iiy Ashoohoodiga hees ea ginealshoodiga Diineeda Yahuudi gabiissa ghamwaal gichchea gwanuusta. Iiduw Geawwal gheang'da idaah gidaduupta emeeda ginealshoadaannyi.

¹⁹ Iiduw nea niiw shing'ada ghang'eat Yeesu nea godeayi ginealangaaschi ak gaweay ghang'amwa jeeda mujiini.

Gidanaal fii shabogheechcheanda ghajamiit

²⁰ Iimuchchu nea gaweshiit damanda ng'attaawa ghwadaa shabogheechcheanda nea nighajamiit sean ea gagul hawunga.

²¹ Apkaat Betro gidaheetta surukusa shabogheechcheanda gwayeeshsha Yeesu, “Ea Ginealshoochcheanda, ang'wearda! shabogheechcheanda heetta imwaashtiin nighajamiit!”

²² Ghwalamda Yeesu ak gwayeeshsha, “Agooga amwasa Aseetta.

²³ Aba huumwa Gaydarukuneegwa gideaba, ‘Ghamneawa siida eashsha,’ gijeeni loadaadawana hiji ak guwi jaksiina geaw jeeda basooda nea siisi gwarukuta ng'asheanji nea mwanyeaha jeadaannyi, ak ghamwas gideaba ng'asheega sean rugu gaygwasa, ng'asheanji gajeesissa.

²⁴ Asi Gaydayeeshshineegwa, iyoamwaashchi nea goomuschi gil, amwasa gideaba noanyaschi, ak gajegooneegwa.

²⁵ Ghabwada iyoaminaadi nea gajamwaasha gil, daba siisi samsa gidinyeanda wassean deeppa ea nismaneey sih. Abeeda eara ghweandeang'wa mida humng'eeda gaygwasamsa gidinyeannyeekkeagwa. [

²⁶ Ama mosammisiini gidinyeannyeekka simmeweega buuneeda eara Ghweandeang'wa mida humng'eeda ea maygwasamsa gidinyeannyeekkeagwa.]”

Geannyaash Yeesu heeda nyasa gheambalmeadaannyi.

²⁷ Gaweay ea ghwahitta gichcha Yerusaleemu. Iiduw nea gwaneayeewa Yeesu jeedeaba Gheetta Sibatta Aseettean, gaweay headaannyi ashoohoodiga hees ea ginealshoodiga diineeda Yahuudi ea gweargwa.

²⁸ Geannyaash nea geyeeshsha, “Ak gheambalmeeni ittang'u isinni ng'asheesuun anneeda? Gagoonnyi ng'eaha gheambalmeeni isinni ng'asheesuun?”

²⁹ Ghwalamda Yeesu ak gwayeeshsha, “Ommeasa eara agooga gaydanyasheagwa ng'ashaanjagi, iyoashaayi ng'asheanji eara aniini gaydarukuneegwa heeda leabu gheambalmeeni itteanyu easinni ng'asheesuun.

³⁰ Heappi Arukunean gibattiisanda ghayi eadu Yohaana gwarinna yeenu? Gwaleabu heeda Aseetta ghana leabu heeda siida?”

³¹ Hean Gabiissa gwasheang'nyi nea gwayi, “Ghamneawa isiyeeshshi, ‘Ghayi gwaleabu humng'eeda, gaygwayi, Anda ak amoamwasi ng'asheega Yohaana?’

³² Ama Siyeeshshi, ‘Ghayi gwaleabu heeda buuneeda.’” (Ada geawwalli buuneeda aba gideaba ghamwas sean gideaba Yohaana sibaneeda gil.)

³³ Hean iiduw ghwalamda Saawa ak gwayeeshsha Yeesu, “Aseasa meanali.” Ghwalamda Yeesu ak gwayeeshsha, “Eara aniini ea maydarukuneegwa heeda leabu gheambalmeeni itteanyu easinni ng'asheesuun.”