Marko 10 - NEAJEEDA EESH BEA BUUNEESSEAN

Nung'wischooda

¹ Hean ghabeawa Yeesu hoowa ak gawa ea gawa ng'eanyiida Yudeeya, ea ghwahitta gigheawda eenda suguura Yordaan. Goreemsa emeetuw headaannyi gichcha. Hean gabiissa goneali buuneeda ng'asheega gichcha gawuurji gideasuju sina.

² Ng'atta gaweay fuga Farisaayo heeda Yeesu ak gwasim nea gwayeeshsha, “Heappi ghwadoabiiwi gideaba gayghwanung' siida gatmoadaannyi?”

³ Gwayeeshsha Yeesu saawa, “Deawedeeda ghayi goneegwa Muusa anneeda gil?”

⁴ Gwayeeshsha Saawa, “Muusa ada ghayi gagoaneasa gheatta nea gwayi siida dang'waara barawajeanda jea ghwanung'wa gatmoadaannyi.”

⁵ Gwayeeshsha Yeesu saawa, “Muusa niny ghayi gagooneegwa gheadi nea gweagu hang'ooynachcheekka jeesingeagwa.

⁶ Nea aba gidaghayi subwatta ng'eanyiida, gwasin Aseetta ng'edeeda ea gatmooda.

⁷ Asi aba dascheani Siida gaygwaheelli ghwaan ea ghaamwat ak gaygodeayi sea gatmoadaannyi,

⁸ Fiisu assiyyenyean gayghoaw siyagi. Asi fiisu mudea fii iyyeenya gil niiw siyagi.

⁹ Asi fuga niroochchi Aseetta adagoheelli sih.”

¹⁰ Iiduw nea gabiikta gichcha gah ghoanyaash Ginealanga itteaba ng'asheanji.

¹¹ Ghwalamda Niny ak gwayeeshsha, “Siida nung'usa heeda gatmoadaannyi ak ghaghi nuut godiiysa gatmoadaannyi aba mealuleega.

¹² Gwasnu eara Gatmooda nung'wa heeda siyeadaannyi ak gawa gheemba siinuut gatmoani gamealuul.”

Yeesu ghoadaw diibiga manang'i ghawooda

¹³ Muchchu gweadu Buuneeda diibiga manang'i heeda Yeesu ghoang'ng'waay iheenga, ak gowoowusa Ginealanga buuneeda.

¹⁴ Daa Yeesu gissin ginealangaaschi gwanyareeksa ak gwayeeshsha, “Anung'waada diibiga ghapka hedeanyu adoakghuumnyi, aba gideaba Gheambalmeeda Aseetta gammiisa fuga uurji suh.

¹⁵ Aba huumwa Gearukuneegwa gideaba siida mwamwastta ng'asheega Aseetta jeepta mwanang' siisi maygawa jeedeaba Gheambalmeani.”

¹⁶ Iiduw Ghwadeapta diibiga ak gabeashsa geattingaaschi ak ghoang'ng'wanyaada iheenga, ak ghoadawaada ghawooda.

Siisi was meanang'ochcheanda

¹⁷ Ng'eat Yeesu nea gaygawa bareannyeakkaaschi, gafaju sih ama hidu gwatkuy aba madeadaannyi ak gwayeeshsha, “Ea Ginealshoochcheanda waam, akkaydasin naaha ijadanyas eaweega manda mudeanooda?”

¹⁸ Gwayeeshsha Yeesu, “Ghwasaan inyas gigurewean siida Waam? Siida waam geaghus Aseetta.

¹⁹ Digheannyeekka ginali, ‘Adimealuuli, adinuusi siida, adijagwadiischi, adinabayi ng'uyyeega, adireenganayi siida, sisiina mureeda gweanu ea geamadu.’”

²⁰ Gwayeeshsha Siidida, “Ea Ginealshoochcheanda, digheannyeeksu miighanyi danaawa eara ghayi aba jeepcheandumedeanyu”

²¹ Hean gong'weersa Yeesu siidida nea nubwariiy ak gwayeeshsha, “Ghwashoadeaweey gilagi, una akkishaaydi halanjeadaang'u indeawi sean amahit gigeanu lappiyeedida ak gidawaadi fuga barbari. Abeeda gaynyasa baruureega aba humng'eeda. Hit ginyuunyi eanni geeshtteanyu.”

²² Iiy Siidida ng'asheanji gafu duwunda ak ghang'eat gawa nea nigiisan, nea gwasin gideaba abeeda siidida meanang'ochcheanda gil.

²³ Ghwasach ghaat Yeesu gang'ula ginealangaaschi ak gwayeeshsha, “Ghamneawa ghoanalli gidahang'waayda beatta jea gaweay meanang'oodiga jeeda Gheambalmeeda Aseetta!”

²⁴ Iiy Ginealanga ng'asheanji ghahamng'eanyi. Nea Yeesu niny gabiikta ak gwayeeshsha, “Ea diibigeasu ghamneawa ghoanalli gidahang'waayda beatta jeeda Gheambalmeeda Aseetta.

²⁵ Beatta jea gawa meanang'ochcheanda jeeda Gheambalmeeda Aseetta ahang'waay ea ghang'wana eara beatta jea gwasik nngamiya gheang'da sidageeda.”

²⁶ Aba dascheani ghahamng'eanyi ginealanga muuchchi. Gonyeari geat nea gwayi! “Abeeda iisunu gwanda siichchea ghaghu?”

²⁷ Gwayeeshsha Yeesu saawa nea gang'ula gheanyanga nyaawa, “Huumwa gil aba siida mwadaagha ng'asheanji maygwaroochchi. Nea aba Aseetta nii ea miigili. Aseetta manda gichchea gwadilna.”

²⁸ Ghwalamda Betro ak gwayeeshsha, “Ama aseasa? Ang'wearda sinung'wi heeda haleanjeedeanya sean ak geyeadu geashtaang'u!”

²⁹ Ghwalamda Yeesu ak gwayeeshsha, “Aba huumwa geayeshshineegwa, Siida wassean nung'usa heeda gheeda, ghana oorjooga ghaamwat ghana haweega ghaamwat, ghana ghaamwat, ghana ghwaan, ghana diibiga, ghana madameega appadaydeanyu ea Giijasta miy,

³⁰ aba damani bea ghamneawean, gajeattaw niba bughala, ea ghwanaawa damani bea ghamneawean gheeda, ea oorjooga ghaamwat, haweega ghaamwat, ghaamwat, diibiga, ea madameega ea sawanadeeda ama damanda jea ghwahidu gayghwanyas eaweega manda mudeanooda.

³¹ Amaduw Fuga saang'a mida madedeaba suurja, gaygahuydeana sean. Nea fuga saang'a huydeanayyi, imuchchu gayghoaw fugeaba mwadi.”

Yeesu gabiikta deaba samwagu gabaloola miyeeda ea dunnoadaannyi

³² Abeeda nea gwanda naweeda Yeesu sea ginealangaaschi nea gagal Yerusaleemu, nea abeeda gosheedeawa Yeesu saawa. Ghang'ut ginealangaaschi muuwda nea eara fuga aat geeshta anung'ut muuwda. Ghwasach Yeesu gichcha fukka attamaniyyeenya was ginealangaaschiin, ak gabiissa gwarukusa ng'asheega jea ghwanyas.

³³ Gwayeeshsha, “Heappi oalleaydiit! Ghamneawa Geweayi Yerusaleemu. Nea aba hoowa Balleanda Siida gajeayiin geattinga ashoohoodiga hees ea ginealshoodiga diineeda Yahuudi. Fiisu gayghoahaakta enuus ak geayiin geattinga fuga emoojiga.

³⁴ Ak gaygwajuuga, nea gong'urriisa ng'usheega nea geabwar aba mughoowooda ak gwanuus. Amaduw eaweetteaba samwagu gaygwaduudu.”

Gidamus Yakkobo ea Yohaana

³⁵ Hean gaweay geaba Yakkobo ea Yohaana was oorjooga Sebedaayo ama hitta heeda Yeesu gwayeeshsha, “Ea Ginealshoochcheanda, gwanda gili sigasayi emuseey.”

³⁶ Ghwalamda Yeesu ak gwayeeshsha, “Googasayi dasinneegwa naaha?”

³⁷ Ghwalamda Saawa ak gwayeeshsha, “Aniyean nung' goobiida siyagi meatkweadaang'u bea geattinda dugwa, nea goobiida niirja meatkweadaang'u bea geattinda ghadaam eaweetta sikghambidaneey.”

³⁸ Ghwalamda Yeesu ak gwayeeshsha, “Agooga eara gidaghamneawa oomuschi moanali! Heappi ghoammuuschi aleayda bayokteanyu bea sawanadeeda? Ama gibattiisandida jea eppattisanan aniini agooga gajeeppattisaneegwa?”

³⁹ Gwayeeshsha Saawa Yeesu, “Ea geammuuschi.” Gwayeeshsha Yeesu, “Huumwa gil bayookta jea daleayda eara agooga ghoammuschi gideaba gajaleayda Eara gibattisandida jea eppattisananiin gajeeppattisananeegwa eara agooga.

⁴⁰ Ak gajea ng'eaha siida jea goobiida meatkweedeanyu bea geattinda dugwa, ghana meatkwedeanyu bea geattinda ghadaam. Nii mii gadiyeedeanyu jea dasin gil, geaghus eattaw fuga ghayi bay gwararsa Aseetta.”

⁴¹ Iiy Ginealanga suurja attamanamughuush gwanyareesi idaah gissin Yakkobo ea Yohaana.

⁴² Gaguursa Yeesu ak gwayeeshsha, “Ghoanalli gideaba fukka sighay gili sugoodiga emoojigeani iissa ghoahaghwiida fuga nyaawa uurda, nea fiisu hesiin iissa goombala fuga nyaawa gharbeeda.

⁴³ Duukku agooga ea mii gichchea awurjeewana. Aba siida gasa hawunda aba jeedeang'wa doawa siideang'wa bea gadiyeeda.

⁴⁴ Siida gasa ghang'atta mwadi gayghoaw soomjeanda buuneessean.

⁴⁵ Aba gideaba Balleanda Siida ghayi mwoani egadiyeesa. Ghayi ghwaan Niny gagadiyeesa buuneeda nea ghwaan gabeagu eaweegaaschi aba gittinnooda fuga saang'a.”

Yeesu ghoahaap siisi ng'oaw suguura Bartimayo

⁴⁶ Geahitta mujiineeda suguura Yerikko, iiduw ghang'eet Yeesu sea ginealangaaschi ghabeawa hoowa nea godeayi emeetuw. Geanyasa gheatta naweeda siisi ng'oaw musiisachchi suguura Bartimayo was oorjeeda Dimaayo.

⁴⁷ Hean iiy gideaba ghang'atta Yeesuuydida leabu Nasareettiin gabiissa Gojuur nea gwayeeshsha, “Ea Yeesu Balleanda Dawdi, aniyean bwaydanaan!”

⁴⁸ Gojuursa fukka sang'aan nea geyeeshsha, siinda, sirukusa ghoaraanya gijureanda muuchchi nea gwayeeshsha, “Ea Balleanda Dawdi, aniyean bwaydanaan.”

⁴⁹ Hean gawus Yeesu ghaminaada ak gwayeeshsha buuneeda, “Agursiina.” Hean geguursa siidida ng'oawiin nea geyeeshsha, “Ammiinni uhuudaang'u ng'eada ak guwi gaguuru.”

⁵⁰ Gwajaksa ng'eanyi hang'daannyi. Gotkweal ak gawa ea gawa heeda Yeesu.

⁵¹ Ghoanyaash Yeesu nea gwayeeshsha, “Gigasayi dasinneey naaha?” Gwayeeshsha Siitta ng'oawiin, “Ea Ginealshoochcheanda, aniini geagasayi dabiikta dang'wearda.”

⁵² Ghwalamda Yeesu ak gwayeeshsha, “Una, ang'iing'i nihaapnyi masaweagaagu.” Miighoaw gil gabiikta gichcha Siidida ng'oawiin ghoang'wearda ghang'eat ak ghoang'ng'waay naweeda ghwaat geeshta Yeesu.