Lukka 9 - NEAJEEDA EESH BEA BUUNEESSEAN

Yeesu gojeakta ginealan damaniyyeenya

¹ Hean gaguursa ginealangaaschi attamaniyyeenya ak ghoadaw uurda ea gheambalmeeda jea goobala meangeenda sean ea giheapta geyoonung'weakka,

² Goojeakta gaweay gwarukkwiida sugoochcheandumeeda Aseetta, nea ghoahaap fuga miyeani.

³ Gwayeeshsha saawa, “Adoayaadi geadi gil iyoweayi bareannyeekka, eara haleanjeeda, ghana shageeda, ghana mukkatte, ghana lappiya ak ea adolassi hang'weakka iyyeenya.

⁴ Gheeda jea ahitta wassean, oppiidana, ea eaghus ea noang'ami ng'eang'da nyaawa.

⁵ Nea iyoahitti heeda meegasseegwa, iyooritteawi mujiineedida ghoalalakti birjeanda mida geeshangeagwa ak gayghoaw muwwunooda appadahuukka nyaawa.”

⁶ Hean ghang'eatng'eat gaweay gharang'weakka gwarukkwiida Giijasta Miy nea ghoahaap fuga miyean aba hiji nyoo ghwahitta.

Heroode moapta ng'eanyi

⁷ Hean iiyiy sugoochcheanda was Heroode iitta ng'asheega sean sisin, hean gwahirbaban, aba gideaba gwayi fuga mwaatkwa sittuuna Yohaana jeeda miyeeda,

⁸ nea mwatkwa gwayeena niihiimu geaw Eliya, nea suuk gwayeena niduudu sibaneeda bea gea ghayi bea garayi.

⁹ Nea Herode niny gwayeena, “Yohaana ghayi nalaji gheatta; nii ghamneawa gajea ng'eaha eaying'si badayda ng'asheesu seaniin?” Hean gagasa ghwadaah.

Yeesu ghoang'aatta fii sagalamnyooji muut

¹⁰ Muchchu ea nibiigu Giijasoodigaaschi gwarukusa iitta ginnisin. Ghwaat saawa ea ghwahitta mujiineeda suguura Betsayda.

¹¹ Iiduw nea gwajeeng'u emeetuw, geayaat geeshta; ama sihitta ghwadeapta saawa ak goobaloola iitta sugoochcheandumeeda Aseetta, ak ghoahaap fuga gasa giiheapta.

¹² Iiduw nea niriikghta gamikta; ghapka ginealanga ak gwayeeshsha niny, “Siksiina buuneeda gaweay gharang'weakka ea jeeda ng'eanyiida gagasa gichchea ghwaak; aba gideaba hiji geendi heeda manda sih.”

¹³ Gwayeeshsha saawa, “Oattawa agooga buuneeda gichchaghwaak.” Geeyeeshsha, “Mendeawani gil geaghus mukkataji muut ea ghweayi iyyeenya. Geaghus eweaya eashaaha hamitteaba fiisu seaniin.”

¹⁴ Abeeda fiisu headiga akghwahit ea sagalamnyooji muut. Hean gwayeeshsha ginealangaaschi, “Anung' gobiitpiit nea gwasna gharmuchcheekka eatta fii haradam adamanamughuush.”

¹⁵ Ak gwasinda gidarukteayda, ghwanung' goobiitpiit sean.

¹⁶ Ng'atta gageanu mukkattajeekka ghwanyawa ammuudiin ea ghweayeekka ghwanyawa assiyyeenyean ak gagatgat gheanyangaaschi gogeal humng'eeda, ak gabadiischeesa ak ghabanajaada, ak ghoadaw ginealangaaschi ghoang'attaawa emeeda.

¹⁷ Gweagiischi sean ea gwalang'u. Gewweamu gheaptanga banajanga ak ghwannyiit sooscheew damaniyyeenya.

Betro goodeaga geaw Yeesu

¹⁸ Eaweechcha nea ghamwaash Aseetta nea gabwageaw, nea abeeda gwandeayi sea ginealangaaschi; hean ghoanyaash nea gwayeeshsha saawa, “Heappi buuneeda ibalool gwayeena geawoschi ng'eaha?”

¹⁹ Ghwasha Saawa nea gwayeeshsha, “Gwayeena guwosi Yohaaneeda Abattiisachchi; gwayeena suurja Eliya; nea suuk gwayeena guwosi siyagi aba jeeda sibanga ghayi bea garayi nuduudu.”

²⁰ Hean gwayeeshsha saawa, “Ama agooga goyeennyi geawoschi ng'eaha?” Ghwasha Betro nea gwayeeshsha, “Ang'iing'i guwosi Gristoyda Aseetta.”

Yeesu gabaloola iitta sawanadeadaannyi ea miyeadaannyi

²¹ Gwareekusa nea gwayeeshsha, adiidu goorukusi sih ng'asheanji,

²² Gwayeeshsha, “Balleannda Siida gayghwanyas sawanadeeda ng'waan muuchchi, nea gayghaheawa gweargwa ea ashoohoodiga hees ea ng'oorshoodiga, ak gajeenuus, ak gaygwaduudu eaweetteaba samwagu.”

²³ Ak gwayeeshsha buneasean, “Siida wassean iigasa gweadu geeshteanyu, ea ada gwasamsa geaw, ak gageanu behiidaannyi ghwasar galagasean ak gweadu geeshteanyu.

²⁴ Aba gideaba siida wassean iigasa gwalealu eaweagaaschi gaygabeagu, nea siida hutteawi aweagaaschi aba badaydeanyu gaygwalealu.

²⁵ Siida gaygwaloossa naaha iinyas haleanjeessean bea muunda ng'eanyiida ak gahutteawi eaweegaaschi?

²⁶ Siida isinnean gheanyanga ea ng'asheegeasu, eara ninyi gaygwasissa gheanyanga Balleanda Siida, damanda jea ghwahinna aba giighaambiittaanyi ea dea Bwaabwa ea dea malaykajeega ghaydidi.

²⁷ Aba huumwa gaydarukuneegwa gideaba aba jeeni itteang'wean gwanda fuga miinaada aba hiji maygwasamu miyeeda ea eaghus anidaah sugoochcheandumeeda Aseetta.”

Yeesu ghwayamwa ormeeda

²⁸ Ng'atta eawooji sis nea ghoahiit baloolda gaguursa Betro ea Yohaana ea Yakkobo, hean gaweay uhuumba gijeeda ghamwaash Aseetta.

²⁹ Damani Mwasheewa Aseettean, ghwayamwa ormeeda nea eara hang'wakkaaschi gaweeriidi muuchchi ea gameeng'meeng'i.

³⁰ Hean gabalool sea fii iyyeenya, Muusa ea Eliya,

³¹ fiisu ghwahidu nea godeana gigheambiitta ak gabaloola badayda miyeadaannyi, jea gwasa aba Yerusaleemu.

³² Aba damani Betro ea oorjooga suurja ea ning'ng'waay ruweanga muuchchi, ama ng'eatng'eat ghwadaa gigheambiittaannyi ea fuga assiyyeenya miinaada sea ninyi.

³³ Iiduw nea gwasimsa fiisu beatta gwayeeshsha Betro Yeesu, “Siida haw ghwanyawa gahaguuw ameang'amwani hiji; anda meesni udahabeascheew samwagu aba hiji, dea mabeanyi ang'iing'i nirja gaba Muusa nea niirja gaba Eliya;” nea niny abeeda mwanala eara gidarukta.

³⁴ Damani baloolean, ghwahidu shamoghooda ak gwadukuta; ghabeal iidaa nea gwadukuta shamooghooda.

³⁵ Ghwanya ghuutta nyaasha jeeda shamoghooda, nea gwayi, “Nii Balleandeanyu aloachchi, olleeysiiniit niny.”

³⁶ Ng'atta nyeashi, geadaah Yeesu akghwahit. Hean ghwasiinda ak ea meruksina sii aba eawoojikka ng'asheega daa.

Yeesu ghoahaap balleanda bearji meangeenda

³⁷ Muchchu nea ghwararang'aana uhuuda gijeeda, gwaroonnyi emeeda saang'a.

³⁸ Ng'ulla, gwarinna Sih jeeda emeeda ak goojuur nea gwayi, “Ginealshoochcheanda, geamuscheey ang'weersiina balleannji itteanyu was haghasheedean;

³⁹ ng'ulla inyeessa ibalaksa meangeenda ghwanung' goojuur, ak ghoahiil nea gwarinna ghuutta furghooda, ak gwasawan muuchchi, nea magassa gwaritteawa.

⁴⁰ Iyeayeeshshi ginealangaagu orruutta, ghwaraay.”

⁴¹ Ghwasha Yeesu nea gwayeeshsha, “Ea fuga mandeawana masaweega was jeachcheenga rodeadi, ak gaydeabiitta heedeang'wa ea ghoaw eeju? Eanni balleanji hiji.”

⁴² Damani wunaan, ghwanung' meang'nyeandeenda ghoabeada ak ghoahiil. Ak gojuursa Yeesu meangeenda muy, ak ghahaabwa balleandida ak ghoadaw ghwaan.

⁴³ Ghahamng'eanyi sean isiidaa uurda haw bea Aseetta. Damani duu ghahamwang'eanyi aba haleanjeeni siniin, gwayeeshsha ginealangaaschi,

Yeesu gabiikta gabaloola ng'asheega miyeadaannyi

⁴⁴ “Anung' gaweay ng'asheesu jeesinga iidigeagwa; aba gideaba Balleanda Siida gajeayiin geattinga buuneeda.”

⁴⁵ Ea mwanala ng'asheanji surukusean, aba gideaba sufnya saawa, ak abeeda ea majeeng'na; ak ghoawal ghoanyaash niny iitteaba ng'asheanji.

Siida haweewa sean ng'eaha?

⁴⁶ Iiduw ghoaptu sheang'nyeeda eegasa eanal siida jea gwaheedu aba jeannyaawa.

⁴⁷ Hean gwajeeng'u Yeesu gidabaloola guroruunatka nyaawa, gaguursa jeebi mwanang' ak ghwayiin murdeadaanyi,

⁴⁸ ak gwayeeshsha saawa, “Siida deaptaawa gheawunngeasu jeepta uurji nii ghwadeaptanaan aniini, nea siida deaptanaan aniini ghwadeapta siida ghayi ajeaknean; aba gideaba siida mwanang'eewaneegwa oagasean ahaweewaneegwa oagasean.”

Siida mwahasheasa gaba meatkwedeanya

⁴⁹ Ghwasha Yohaana nea gwayeeshsha, “Siida haw, sidaayi siida arutta meangeenda aba ghawungaagu, ak geeyeeshshi nung'waada aba gideaba siidida mabwaheasa.”

⁵⁰ Gwayeeshsha Yeesu niny, “Adagudoaheawi; aba gideaba siida mwahasheasa siisi gaba meatkweedeanya.”

Fuga Samariya ghaheawa ghwadeapta Yeesu

⁵¹ Iiduw nea nineekkiit eawoojiga jea ghabeawa humng'eeda hean gamanya beatta Yerusaleemu.

⁵² Goojeakta buuneeda goosheedeawa niny, ak gaweay gharang'da Samariya, gwasissin heechchea gobiida;

⁵³ ak ghaheawa Fugeaba hoowa ghwadeapta niny, aba gideaba ghoang'ng'waay naweeda gawa Yerusaleemu.

⁵⁴ Daa ginealangaaschi was geaba Yakkobo ea Yohaana gwayeeshsha, “Ng'uttamiida, gigaasay eguursiina beasta jea gwaleabu humng'eeda ak gwadulu fiisu?”

⁵⁵ Gwayamsa geaw saawa ak gwareekusa.

⁵⁶ Ghang'eatng'eat gaweay gharang'da nuut.

Fuga gasa ghwaat geeshta Yeesu

⁵⁷ Iiduw nea gudugwanda naweeda gwayeeshsha Siih niny, “Gaydeadu geeshtaang'u aba hiji uwi sean.”

⁵⁸ Gwayeeshsha Yeesu niny, “Fureayoonga gwandeawa shoomeanga, nea dariidakka gwandeawa ghoorajeega nyaawa, nea Balleanda Siida ea mandeawaana eara heeda jea ghwayiin uhuudaannyi.”

⁵⁹ Gwayeeshsha siinuut, “Eanni geeshtteanyu.” Ak gwayeeshsha, “Ng'uttamiida, nyoo siksean ghanyi dawa dabuy ghweandeanyu.”

⁶⁰ Gwayeeshsha niny, “Nung'waada muscheekka gabuy muscheekka nyaawa; ak ang'iing'i, guwi rukkwiida sugoochcheandumeeda Aseetta.”

⁶¹ Gwayeeshsha sii nuut, “Aniini gaydeadu geeshtaang'u, Ng'uttamiida; nea gidamadeeda ginyoo goonean gheatta dawa dahealli fugeaba gheenyu.”

⁶² Gwayeeshsha Yeesu niny, “Manda siida jea ghoang'ng'waay mageemng'eanda ak goong'weersa bwadaw jea ghwahit aba sugoochcheandumeeda Aseetta.”