Lukka 7 - NEAJEEDA EESH BEA BUUNEESSEAN

Yeesu ghoahaap siida gadiyeeda gheamatta lugooda bea Ruumi

¹ Iiduw ahiit Yeesu baloaldaannyi sean gasa ghwayiiy buuneeda gawa Gapernaumu.

² Damandida gwanda ngeanyiitta shirikkarajeanda haw mideawa siidaannyi bea gadiyeeda bwariiy muuchchi, nea abeeda ghabwar miyeeda.

³ Iiyiiy iitta Yeesu, goojeakta gweargwa Yahuudi headaannyi eemus ghwahidu ghoahaap siidaannyi bea gadiyeeda.

⁴ Hitta heeda Yeesu gemeermeerani nea geyeeshsha, “Siisi gammiisa weattaang'u.

⁵ Aba gideaba siisi ghabwariiy emeedeanya ak gwadeekneasa ghooriida sinnealshachcheewa.”

⁶ Goodeayi Yeesu saawa. Geeyi bwak ama neekkiisa gheeda, goojeakta shirkarajeanda hawfuga duupchi eyeeshsha, “Ng'uttamiida adideawiidi geaw aba gideaba mammisean gideaba gay hinni jeedeaba gheenyu.

⁷ Aba gideaba mammiisean dahidu heedaang'u, ang'iing'i rukuni ng'asheanjagi ak gay ghahaap siideanyu bea gadiyeeda.

⁸ Aniini geawoschi siida mideawa gheambalmeeda ak geaballi shirkara, inyeessa iyeayeeshshi akkalealla, ‘Una,’ gawa; nea nuut iyeayeeshshi, ‘Beenni,’ ghwaan; ak eara siideanyu bea gadiyeeda iyeayeeshshi, ‘Sina gili,’ gwasin.”

⁹ Ghahamng'eanyi Yeesu iiyiiy ng'asheesu hean gwayamsa geaw emeeda gwachchi eattu geashtannyiin, ak gwayeeshsha “Earaba jeeda ng'eanyiida Israeeli mii dadaah siida mideawa masaweega huumwa uurjunu.”

¹⁰ Iiduw nea gabiikta fukka gwachchi sichcheaktean ghoah, ghwahitta nea ea nihaap siitta bea gadiyeedean.

Yeesu gooduudu balleanda masiinung'weanda

¹¹ Iiduw ghang'eat Yeesu gawa mujiineeda suguura Naini, nea goodeayi ginealangaschi ea emeetuw.

¹² Iiduw nea geneekkiissa ghuutta mujiini, hean geroonnyi sea sareenda eadu muspa balleanji was ghaamwat masiinung'weanda, ak ea balleanda ghus ghaamwat gil nea goodeana emeettuw bea mujiineetta.

¹³ Daa Ng'uttamiida gatmoodida ghabwayda ak gwayeeshsha, “Adiiyyeawudi.”

¹⁴ Gawa ama neekkiissa ghwoang'ng'waay ghabearanga ak ghamiinaada buuneeda ak gwayeeshsha, “Geeyi ng'eada baleanda.”

¹⁵ Gwaduudu Siida nimi ak goopteada ak gabalool ak ghwoadaw Yeesu ghaamwat.

¹⁶ Ghabeal buuneassean; ak geakghambiit Aseetta, nea geeyi, “Nirinna ng'eang'deanya sibaneeda haw! Ak eara Aseetta ea nihidu gabareessa fugaaschi.”

¹⁷ Gageawiit iittaannyi aba ng'eanyiida Yudeeya ea geng'oojigaaschi.

Fuga ajeagu Yohaaneeda Abattiisachchi

¹⁸ Gweassa Ginealanga Yohaana iitteaba ng'asheesu seaniin.

¹⁹ Hean gaguursa Yohaana ginealangaaschi iyyeenya ak gojeakta heeda Ng'uttamiida ghoanyaash gideaba, “Ang'iing'i guwosi siida ghayi jea ghwaani ghana jea eammuukghuna nuut?”

²⁰ Gaweay ama hiitta heeda geeyeeshsha, “Goajakneasa Yohaaneeda Abattiisachchi nea gwayi, ‘Ang'iing'i guwosi siitta ghayi jea ghwahiduuni ghana jea eammuukghuna nuut?’”

²¹ Ak aba damandida ghoahaap fuga saang'a miyeani ea gea bearji meangeenda, ak eara fuga ng'oowwi aniimmu ghoang'wearda.

²² Ghwasha nea gwayeeshsha, “Aweayeena ak goorukusi Yohaana ng'asheesu oayinyiin ea gea oadaayi, Fuga ng'oowwi niimmu ghoang'wearda, fuga badoojiga gaweelweel, fuga udamusuura siimmiidu, fuga miinyi niyiing'shi, muschcheekka siittuuttu, gea barbari geerukusa Giijasta Miy.

²³ Ghang'wana siitta mwamwachmwajaniin.”

²⁴ Iiduw nea gabiikta fuga gwachchi ajeagu Yohaana ghang'eat goobalool emeeda aba badayda Yohaana nea gwayeeshsha, “Gwachchi goweayi ong'ng'wearsiina naaha aba dareapcheeda, mudayeanda ayuuk jeammeeda?

²⁵ Abeeda gooweayi adaaha naaha? Siida akkwaa hang'weakka bumbuni miyaasi? Ang'ulla, gideaba buuneeda mideawa hang'weaka miyaas ak ghwaak miyeenooda gwanda gealga sugoodiga.

²⁶ Abeeda gooweayi adaaha naaha? Sibaneeda? Huumwa gil, geayeeshshineegwa, ahaweawa eara sibaneeda.

²⁷ Nii siida ghayi sibean eergu aba jeeda ng'ooruutka gil gideaba, ‘Ng'ulla, geajeagu giijasoochcheandeanyu ghwaan madeadaang'u, jea gwasin naweadaang'u aba madeadaang'u.’ Aba

²⁸ Asi geayeeshshineegwa aba jeeda diibiga jih gadeemga manda dea haweewa Yohaana; ak eara gwasa siida mwanang' muuchchi aba jeeda sugoochcheandumeeda Aseetta ahaweewa niny.”

²⁹ (Iiduw nea ghwayiiy fukka ng'asheesu sea fuga ang'ng'oonyi gwadiin geamwas dobiiwnatta Aseetta aba gideaba fiisu fuga ghayi sippattiisan aba gibattiisanda Yohaana;

³⁰ nea Farisayajeega ea diinagoojiga ghaheawa ng'asheega gasa Aseetta bea badahuukka nyawa, aba gideaba ghaheawa goobattiisan niny.)

³¹ “Gaydagala naaha fiisu bea jeachcheeng'suun, suuh fuga urjiini?

³² Gawurji diibiiga abiitbiit aba jeanaadi ak gaguurriisa geat nea gwayi, ‘Gealaschi igeambooda ak amoang'wasi; geennyahushshi ak ea mooyyeawdani.’

³³ Aba gideaba Yohaaneeda Abattiischchi ghwahidu ak ea mwaaga mukkatte nea mwali difaayeeda ak gooyeennyi, ‘Gwandeawa meangeenda.’

³⁴ Ghwahidu Balleanda Siida ak gweagiischi nea gwaleeshi; ak gooyeennyi, ‘Ang'ulla, gitteaw ea leyeanda, fugaaschi gea ang'ng'oonyi gwaadi gil ea fuga ring'eega!’

³⁵ Nea weaghuumeeda ea nidaajiit gideaba ea doabiiwnatta aba heeda diibigaaschi sean.”

Yeesu gwanda gheeh Simoneeda was Farisayajeanda

³⁶ Gaguursa siyagi bea Farisaayu goombuuchchi niny, gawa gheawi bea Farisaayuun ak goopteada gweagiischi.

³⁷ Hean iiy gatmoomba riing'a mida mujiineedida, gideaba gwanda gheeda Farisayajeanda gweagiischi, gweadu gideeshteayda nyiit nagheeda ng'andit,

³⁸ hean ghamiinaada appwadaw aba murdeeda geeshangaaschi ak gooyeawda, ea goobitpissa dabeakkaaschi geeshanga ak gobuus aba buudeagaaschi uhuudaannyi ak ghwasam geeshanga nea ghwayeasha nagheedida.

³⁹ Daa siitta was Farisayajeandida guursean gissin goottemshi nea gwayi, “Inyeeda siisi gwachchi ea sibaneeda gil, gwachchi gayghwanal gatmoani waasiin giduurji aba gideaba gaba ring'a.”

⁴⁰ Ghwasha Yeesu ak gwayeeshsha niny, “Simon, gwanda ng'asheanji jea darukuneey.” Ghwasha niny ak gwayeeshsha, “Naaha gil, Ginealshoochcheanda?”

⁴¹ “Siyagi ghayi gwandeawa fii iyyeenya mideawa sileadaannyi; akkalealla gwandeawa sileemba dinaaraji bughalaji muut, nea niirja gwandeawa haradam ea damanamuughuush.

⁴² Iiduw nea niraay gidaydeayda, gwasamsa fiisu seaniin. Asi ghamneawa aba jeedeaba fiisu dea jea ghabwariiy muuchchi anneeda?”

⁴³ Ghwasha Simon nea gwayeeshsha, “Ghaaghanyi gajea siitteani sisamsiina gasaang'aani.” Gwayeeshsha niny, “Asi nirgu huumwa.”

⁴⁴ Gwayamsa geaw Yeesu gatmoodida ak gwayeeshsha Simon, “Gung'ulayi gatmooni? Ghawunnyi gheang'u, ak ea miigoona beega jea deahuuna geeshangeasu, nea niny ghwanung' gobitpissa dabeakkaaschi geeshangeasu ak gobuus buudeegaaschi.

⁴⁵ Ang'iing'i mii samwaan nea niny dea naahinni hiji ea miighwanung'waada samitta geeshangeasu.

⁴⁶ Miyeashana uhuudeanyu nagheeda nea niny ea niyeasha geeshangeasu nagheeda.

⁴⁷ Asi gaydayeeshshineey, ring'eegaaschi saang'a sisamsa, aba gideaba ghabwariiy muuchchi, nea dea sisamsa gilimwanang' gayghabwariiy gilimwanang'.”

⁴⁸ Ak gwayeeshsha niny, “Sisamsa ring'eegaagu.”

⁴⁹ Iyiiy fukkeanji agiischiin mideayi sea ninyiin gaba nii eeshsha geaw, “Siisi ng'eaha jea gwasamsa riing'eemba nuudiin?”

⁵⁰ Ak gwayeeshsha gatmoodida, “Nighuunyi masaweagaagu; una nea gibeahi hoyyoo.”