Lukka 5 - NEAJEEDA EESH BEA BUUNEESSEAN

Yeesu gaguursa ginealanga madeeda

¹ Eaweechcha nea gwanda murdeeda basooda Genasareetti gwaneaweesa buuneeda nea goleeysiit ng'asheega Aseetta.

² Ghwadaa maleambaji iyyeenya aba murdeeda basooda, nea abeeda ea nuweay fiibwa gohuun gheareedanga nyaawa sing'ng'oonnya ghweayeega.

³ Gawa jeemba maleamboonagi was dea Simon, gwayeeshsha seabwa nung' gosiipta maleambooda gil mwanang' gawa jeeda basooda ak goopteada ak ghoanaal buuneeda nea gwanda jeeda maleambooda.

⁴ Rat ghuutta baloolda, gwayeeshsha Simon, “Asiipsiina heeda saang'a beega, ak ghoapputti ghearedangeagwa alealni ghweayeega.”

⁵ Ghwasha Simon nea gwayeeshsha, “Siida haw, geegadiyi aweasean ak ea meang'ng'waanyi gil! Ama ninyaashtunu gaydabuutta gheareedanga.”

⁶ Iing'atta sinoodeaba nii, ghoang'ng'waay ghweayeega saang'a; ea ghwariikghta gang'ada gheareedanga nyaawa,

⁷ Gang'wachsa geadi fiisu mida jeemba maleambooni neekki ghapka ghaweat. Geegawusa maleambajeega duwaaw ea gwaramagu gwalik beega.

⁸ Daa Simon Betro ng'asheanji, gobeedeaysa madeeda Yeesu nea gwayeeshsha, “Ea Ng'uttamiida, asiipteawana heedeanyu, aba gideaba geabea riing'a.”

⁹ Ghahamng'eanyi sea fukka sean mideayiin, aba ghweayeega siing'ng'waay;

¹⁰ nea abeeda gwanda Yakkobo ea Yohaana was balloojiga Sebedaayo sinuudayi gadiyeeda sea Simon. Ng'atta gwayeeshsha Yeesu Simon, “Adibeali; ghang'eada ghamneawa gaylealluuni buuneeda.”

¹¹ Aruunna maleambajeega nyaawa jeeda basooda ghang'eatng'eat gwanung'sa heeda haleanjeessean ak geayaat geeshta.

Yeesu ghoahaap siida

¹² Eaweechcha nea gwanda jeemba mujiinajean, ghwahidu headaannyi Siisi bearji udamusuura, daa Yeesu, gobeedeasa madeadaannyi ak gamus nea gwayeeshsha, “Ng'uttamiida, iigasayi gimmuusi amminnaan.”

¹³ Ghoahaakta geadi Yeesu ak ghawaas nea gwayi, “Geagasayi; miinni.” Deagheatta gwaritteaysa udamusuura.

¹⁴ Ghamiin gheang'da ea marukusiina sih; nea gwayeeshsha, “Una ahimsiina geaw ashoohoochcheanda, ak gisabi geadi haleanjeeda siyeada ghadooweeda was gidaghayi rukuteayda Muusa, asi abeeda gajeadaah gideaba simminneey.”

¹⁵ Ak gageawiit iitta aba daroorakka sean, ak ghapka Emeeda headaannyi goleeysiit nea ghoahaap fuga bearji geyoonung'weakka.

¹⁶ Iiduw gwajireada ak gawa dareapcheeda ghamwaash Aseetta.

Yeesu ghoahaap siida abittu damealga

¹⁷ Eaweechchanjagi aba jeedeaba eawoojikka gonealshi, abeeda goobiitpiit Farisayajeega ea ginealshoodiga deaweeda leabu gilinyoo ea gharang'da Galilaaya, ea Yudeeya ea gealeabu Yerusaleemu; nea gwandeawa uurda Ng'uttamiida ak ghoahaap buuneeda.

¹⁸ Asi ng'ulla, ghapka Buuneeda nea gwasareenna muunda siisi abittu damealga, ak geegasa gichchea eayaatta gah, ak geeyiin madeeda Yeesu;

¹⁹ iiduw nea mwanyasa gheatta gichchea gweetteayda gah aba seang'ayda emeeda, gwading'da uhuuda gheeda ak geerrareang'u sea muundaannyi gwasku seawadeeda ea eayiin madeeda Yeesu.

²⁰ Daa masaweega nyaawa gwayi, “Siida, sisamsa ring'eegaagu.”

²¹ Gonyeari geat Farisayaajeega ea ng'oorshoodiga nea gwayeena, “Siisi ng'eaha ang'eawi Aseetttean ghanyeamanda siisi ammu gwasamsa ring'eeda geaghus Aseetta akghwahiit.”

²² Jeeng'u Yeesu ng'asheega anyeari geat gwayeeshsha, “Ghwasaan anda gonnyearayi geat ng'asheesu aba guroruunatkeagwa?

²³ Awussis anneeda, gideaba dayi, ‘Ring'eegaagu sisasmsa,’ ghana dayi, ‘Ng'eada ak guwi?’

²⁴ Asi geagasayi anala gideaba Balleanda Siida gwandeawa gheambalmeeda aba jeeda ng'eanyiida jea gwasamsiina ring'eega iiduw gwayeeshsha siitta abittu damealgeani, geayi, ng'eada, sareana muundaang'u ak guwi ghoah.”

²⁵ Deagheatta ghang'eat siidida aba madeennyaawa, ak ghwasar muundaannyi ak gawa ghoah nea ghoaghambiit Aseetta.

²⁶ Ghahamng'eanyi sean, nea geakghambiit Aseetta nea ghang'uut muuwda nea geeyi, “Eannean sidaayi ng'asheega deamdeameadi.”

Yeesu gaguursa Laawi

²⁷ Iiduw gwaritta jarooda ak ghwadaa siisi ang'ng'oonyi gwaadi suguura Laawi, nea goopteada aba gheeda sing'ng'waanya gwadiin; ak gwayeeshsha, “Eanni geeshteanyu.”

²⁸ Ghang'eat ak gwanung'usa heeda halanjeasean, ak ghwaat geeshta.

²⁹ Gwasissa Laawi ghwelmeeda haw aba gheannyi; ak gweagiischi nea gambuuchchi fuga saanga ang'ng'oonyi gwaadi ea buuneeda suurja.

³⁰ Hean goniiksa Farisayajeega ea ng'oorshoodiga nyaawa ginealangaaschi, nea gwayeeshsha, “Ghwasaan anda goyeagiischi nea goleeshi sea fuga ang'ng'oonyi gwaadi ea fuga ring'eega?”

³¹ Ghwasha Yeesu nea gwayeeshsha, “Fuga majeekcheewi magaseadayyi bwanamwagaanga geaghus gagasa gea miyeani.

³² Aniini mwaawuni daguursa fuga doobiiweadi, ghawunnyi daguursa fuga ring'eega gwadukkuuna ring'eega nyaawa.”

Iitta giluuldeaydeaba geaw

³³ Hean geeyeeshsha, “Anda ginealanga Yohaana goluulliida geat nea ghamwaash Aseetta, ak eara ginealanga Farisayajeega gwasiniidunu, nea gaagu gweagiischi nea gwaleeshi.”

³⁴ Gwayeeshsha Yeesu, “Ghoammu gwaliilda rabasta nyeangiida nea gwandeayi sea siida geeshshi?

³⁵ Amaduw gwanda eaweetta jea egeandeawa siida geeshshi aba jeennyaawa, eaweechcheanji gaygwaliilda.”

³⁶ Hean gwarukusa galeega nea gwayeeshsha, “Manda siida jea ghabwaash weasta hang'deesh ak ghawaasa hang'da waas, iisindunu gayghabwaash dea eesh, ak abeeda weastida bea hang'deeshiin maygweatteayyi sea dea waas.

³⁷ Ak ea manda siida jea ghwayiin difaayeeda mii ghwaheas jeesinga ghadeatka woosi; iisindunu, gaygwanyarjeaweada difaayeeda mii ghwaheas ghadeatka ak gaygaweay difaayeeda, ak gwanyara ghadeatka.

³⁸ Difaayeeda mii ghwaheas geaghus eyamsa jeesinga ghadeatka eashiish.

³⁹ Ea manda siida jea iing'atta leeyda difaayeeda heeseadi jea gagasa gea mii heeseadi; aba gideaba gaygwayi, ‘Gea heeseadi amiyaas.’”