Lukka 4 - NEAJEEDA EESH BEA BUUNEESSEAN

Gidasisimsimda Yeesu

¹ Iimuchchu nea ninyas Yeesu Gurorooda Ghaydit, gabiikna Yordaan ak ghoadoabiiw Gurorooda

² gobiida dareapchcheeda askwearjooji haradam nea gwasimsim Meangnyeandeenda. Amwaaga gil eawoojusu seaniin; ng'atta askwearjoojusu, ghwayeachchi.

³ Gwayeeshsha meang'nyeandeenda, “Iiwosi Balleanda Aseetta ginung' ghoaw lagheaneeni mukkatte.”

⁴ Ghwasha Yeesu nea gwayeeshsha, “Geang'waar gideaba, ‘Siida moammu goobideewa ng'eanyiida mukkatte akghwahit.’”

⁵ Ghwaat Meang'nyeandeenda ak goodiing'da heeda miy ghaang' ak goohiimsa daroorakka sean bea ng'eanyiida gili nuwaas.

⁶ Ak gwayeeshsha, “Gaydagoonnyi gheambalmeani seaniin ea gigheambiitta nyaawa; aba gideaba sigoonan, ak gaydaadaw siida wassean eagasayi.

⁷ Iighadoawannyaan, gayghoaw haleanjeeni seaniin gaagu.”

⁸ Ghwasha Yeesu nea gwayeeshsha, “Geang'waar gideaba, ‘Ghadoawana Ng'uttamiida was Aseetttaang'u, nea gigadiyeesi niny akghwahit.’”

⁹ Hean ghwaat Yerusaleemu, ak godiing'da uhuuda gheeda sibatta Aseetta heeda geaw, ak gwayeeshsha, “Iiwosi Balleanda Aseetta, ging'adaattaawi geaw hiji;

¹⁰ aba gideaba geang'waar, ‘Gaygoojeagu malaykajeagaaschi ak gafurnyi,’

¹¹ Ea gideaba, ‘Gayghwadeabwaneey geattinga nyawa, ea mwalasa geeshtang'u lagheaneeda.’”

¹² Ghwasha Yeesu nea gwayeeshsha, “Ghayi geeyi, ‘Adisimsimi Ng'uttamiida was Aseetttaang'u.’”

¹³ Hean ahiit meang'nyeandeenda giliwas simsimda, ghanyi gawa ea ghwanyas gheatta damannuut.

Yeesu ghoang'eat gadiyeadaannyi aba Galilaaya

¹⁴ Iiduw gabiigu Yeesu aba uurda Gurorooda ak gawa Galilaaya, ak gageawiit iitaannyi aba daroorakka sean neekki.

¹⁵ Goonealshachi aba jeeda ghoorajega nyaawa sinealshachcheewa, nea ghooghambiit buuneessean.

Yeesu geaheawa aba Nasareetti

¹⁶ Iiduw ghwahidu Nasareetti, heeda ghayi hissiina heeda, ak gawa jeeda ghooriida sinnealshachcheewa, gawuurji gideajusu bea geallaan, aba eaweeda sabatto. Ghamiinaada ak ghoassoamwa;

¹⁷ geattaw gittaabooda sibaneeda suguura Isaaya. Ghoayyaaw gittaabu ak ghwanyas heeda sing'oorsa gideaba,

¹⁸ “Gurorooda Ng'uttamiida gwanda badaydeanyu, aba gideaba nimwaaran dawa darukkwiisa fuga barbari Giijasta Miiy. Gojeaknean darukusa fuga mida ghealooniga siksiinda nyaawa nea fuga ng'oowwi gayghoang'wearda, ak gojeaknean dalealu fuga sighabwas,

¹⁹ nea gearukuti gweayda sumwas bea Ng'uttamiida.”

²⁰ Hean ghwarat gittaabu, ak ghoadaw siida gadiyeeda, ak goopteada; ak gohang'ooysa ghaang' buuneessean mida jeeda ghooriida sinnealshchcheewa.

²¹ Ghoang'eat baloaldaannyi nea gwayeeshsha, “Eannean ng'ooruussu nisa aba jeeda iidigeagwa.”

²² Gabaloola sean ng'asheega miyaas appadaydaannyi nea geahamng'eanyi isiyiiy ng'asheega dagheerjeandumeeda baloola. Ak geeyi, “Neada siisi ea mii balleanda Yoseefu?”

²³ Gwayeeshsha saawa, “Geasikteawi gideaba gajoorukuneani ghwasildeanga gideaba, ‘Bwanamwagaanga, ahaabwa geaw'; ng'asheega siyiinyi ghayi isni aba Gapernaumu, sina earaba ng'eanyiidaang'u.’”

²⁴ Ak gwayeeshsha, “Aba huumwa geayeeshshineegwa manda sibaneeda jea eamwas aba jeeda ng'eanyiidaannyi.

²⁵ Asi aba huumwa geayeeshshineegwa, ghayi gwanda masiinung'weega saang'a ng'eanyiida Israeeli aba damanda Eliya, damanda roada roopta gweannyeew samwagu ea shealaah, ak ghwahidu gejeeda haw jeeda ng'eanyiisean;

²⁶ eara Eliya ea mechcheakta gawa hichpa nuut, geenung' gawa heeda masiinung'weanda assagi mida Serepta, mida ng'eanyiida Sidoni.

²⁷ Abeeda gwanda fuga saang'a bearji udamusuura aba ng'eanyiida Israeeli gweayda waseewa Eliisha sibaneeda; ak ea meammiinna eara siyagi, geaghus Naamaneeda ng'eanyiida Sirya.”

²⁸ Iyiiy ng'asheanji Fuga mida jeeda ghooriida sinnealshachcheewa gwanyareesi sean.

²⁹ Ak ghang'eatng'eat erruteawa mujiini, ak geayaat mareetta heayeeda sideeksa mujiineeda nyaawa, nea geegasa eang'ng'adattaawa uhuuda heayeeda.

³⁰ Ghang'eat ak ghwalach bugusta nyawa ak gawa.

Siida beardooschi meangeenda

³¹ Ak ghwararang'aada gawa Gapernaumu, was mujiineeda Galilaaya. Ak ghoanaal saawa eaweeda Sabatto;

³² ghahamng'eanyi buuneeda aba ginealshoadaannyi, aba gideaba ng'asheandaannyi gwandeawa gheambalmeeda.

³³ Nea aba jeedeaba ghooriitta sinnealshachchewean gwanda Siisi mideawa gurorooda meangeenda muy hean; gojuur muuchchi aba ghuutta haw,

³⁴ “Seh! Akayhindaneasan ang'iing'i Yeesuuyda Nasareetti? Ghwasaan anda gineayaneasa? Ghanalli siiduwosi guwosi dea Ghaydit bea Aseetta.”

³⁵ Goojuursa Yeesu niny nea gwayeeshsha, “Siinda, ak giritteawi siisi!” Ghwanung' Meangeenda ghoabeada siida aba bugusta buuneeda, ak gwaritteaysa siidida nea mii gwasawan.

³⁶ Hean ghahamng'eanyi sean ak gaba nii eshsha nuut, “Nii ana ng'ashaani? Iissa Gwarukutteawa uurda ea gheambalmeeda nea gwayeeshsha meangeenda aritta ak gwaritta.”

³⁷ Gageawiit iittaannyi aba jeedeaba ng'eanyiitta seaniin eageng'oojiga.

Yeesu ghoahaap fuga saang'a

³⁸ Iiduw ghang'eat ak gwaritteawa jeeda ghooriida sinnealshachcheewa, ak gawa gheeh Simon. Nea abeeda gheamatta agweaji Simon ghamnyaan, gabearji sheagheeda ng'waan ak geemus ghoahap.

³⁹ Gawa heeda mida gheamattida ak ghamiinaada aba murdeadaannyi, ak goojursa sheagheeda, ak ghahabwa gheamatta sheagheadaannyi; deagheatta ghang'eat ghoang'aatta saawa.

⁴⁰ Damanda mikteawa aseetta, ghapka Buuneeda sean headaannyi nea gweadu fuga miyean bea siisi bearji geeyoadaannyi, ak ghwayiin geattingaaschi iheenga fuga miyeani ak gaheaba sean.

⁴¹ Gwaritteaysa fuga saang'a meangeenda nea gojuuri nea gwayi, “Ang'iing'i guwosi Balleanda Aseetta!” Gowoowusa saawa, ak ghwarat ghuusiga ea mabaloola aba gideaba eara saawa ghwanal niny Gristo gil.

Yeesu gwarukwiida ng'asheega aba ghoorajeega sinnealshachcheewa

⁴² Muchchu sakteayda ghang'eat gawa heeda manda sii, ak gagaseada Buuneeda ama sihiitta heeda geegasa eatteal ea manung'usiina heeda;

⁴³ gwayeeshsha saawa, “Gaydawa darukkwiida Giijasta Miy bea sugoochcheandumeeda Aseetta aba mujiinajeega suurja, aba gideaba suu gea sichcheaknaneani.”

⁴⁴ Abeeda gwarukkwiida Giijasta Miy aba jeeda ghoorajeega sinnealshachcheewa aba ng'eanyiida Yudeeya.