Lukka 3 - NEAJEEDA EESH BEA BUUNEESSEAN

Girrukkwiida Yohaaneeda Abattiisachchi

¹ Aba gweaydeaba damana muut bea Diberio Gaisaari, nea abeeda Bondio Bilatto ea sugoochcheanda ng'eanyiida Yudeeya gil, nea Heroode abeeda ea sugoochcheanda ng'eanyiida Galilaaya, nea oorjeeda ghaamwat suguura Filippo ea sugoochcheanda Idureeya ea Dirakonit, nea Lasaniya, abeeda ea sugoochcheanda Abileeni,

² Nea abeeda aba damanda waseewa Anaasi ea Gayafa ashoohoodiga heesi, ghwahidu ng'asheanda Aseetta heeda Yohaana balleanda Sakkariya aba dareapchcheeda;

³ Hean ghang'eat gawa ng'eanyiissean neaweesa Yordaan, nea gwarukkwiida gibattiisanda samsiinda ring'eega.

⁴ Gawuurji gidasung'waarda aba jeeda gittabooda ng'asheega sibaneeda suguura Isaaya gideaba, “Ghwanya ghuutta siida nyearra dareapcheenda; nea gwayeena asissina naweeda Ng'uttamiida, olleappa naweadingaaschi.

⁵ Nea geeng'alsa ghalalayeekka sean, ak geahiing'u giijeega ea heayeeniga, nea heeda ghwana gajeattoabiiw nea naweadinga gudung'nyoojiga gajeesin gamiyeasiidi;

⁶ Ak gilinyoo ea sihi gayghwadaah lealnooda Aseetta.”

⁷ Gwarukusa fuga saang'a buwa heedaannyi eppattiisan, ak gwayeeshsha, “Ea dayeega udang'usheega! Gwareekuseegwa ng'eaha ea amng'awa ea mwanyaseagwa nyarasta jea ghwahidu?

⁸ Asi ajiila haghweega miisa dukkuunooda, ak ea adooyeenniisi geat, ‘Geendeawi ghweandeanya nea Abrahaamu,’ Asi geayeeshshineegwa ghoammu Aseetta ghwayam lagheang'su ghoaw diibiga Abrahaamu.

⁹ Ak ghamneawa joommooda asiyiin gumsheakka geediga, ak geediga maji haghweega miyaas gajealach ak geejaksa jeeda beasta.”

¹⁰ Ghoanyaash emeeda nea gwayeeshsha, “Abeeda gajeesna naha?”

¹¹ Ghwasha niny nea gwayeeshsha, “Siida mideawa hang'weak iyyeenya, dadawa hang'agi siida mandeawana, nea siida mideawa hamitta ea dasindunu.”

¹² Ghapka eara fuga ang'ng'oonyi gwaadi eppattiisan, ak eara saawa gwayeeshsha, “Gajeesna naaha aseasa Ginealshoochcheanda?.”

¹³ Gwayeeshsha saawa, “Adoong'ng'oonyayi gwadeeda haweawa dea sirukuneegwa.”

¹⁴ Eara shirikkara ghoanyaash nea gwayeeshsha, “Ama aseasa gajeesna naaha?” Gwayeeshsha, “Adoareachchi siida gidaannyi aba urda ghana oahhaakta aba ng'uyyeega, akghusa mushahareedeang'wa.”

¹⁵ Damanda duu gwandeewa buuneeda jeeda furdeaydean, gonyeari geat buneassean aba jeesinga nyaawa aba iitta Yohaana, gideaba gwadeeppa ea Gristohi,

¹⁶ ghwasha Yohaana nea gwayeeshsha buuneessean “Aniini geabattiisananeegwa beega; nea siida jea ghwahidu gaburdeawean uurda, mammiisean geattineadi deanga geakkaaschi; nea niny gaygobattisananeegwa Gurorooda Ghaydit ea beasta.

¹⁷ Gida aleella booga gwanda geattindaannyi, ak gobuus heeda jea goleelsa, ak iiduw ghwayiin booga silleal jeeda gijigooda, nea looyda ghaghwarda aba jeeda beasta maygamis.”

¹⁸ Gwareekusa nea goobaloola buuneeda ng'asheega saang'a nea gwarukkwiida Giijaasta Miy.

¹⁹ Iiduw gowoowsa Heroodeeyda was sugoochcheanda, nea gowoowsiina gheenda Heroodiya, was gatmooda oorjeeda ghaamwat, ea badayda ng'asheega munyas saang'a sina Heroode,

²⁰ ea mwaara gil gwasin dea muy nuut gwajaksa Yohaana ghealooniga.

Gibattiisanda Yeesu

²¹ Hit gibattiisanda buuneeda sean, ea dea Yeesu nea ghamwaash Aseetta ghajaada bugusta humng'eeda,

²² ak gwashubeesa uhuudaannyi Gurorooda Ghaydit wunnda ghariibajeanda ak ghwanya ghuutta nyaasha humng'eeda nea gwayeeshsha, “Ang'iing'i guwosi balleandeanyu abwariinyi gwadan jeedeanyu.”

Roproobanga jiilu Yeesu

²³ Yeesu ghoang'eat ginealshoadannyi nea gaba gweannyeew diktam ea damanamughuush, nea abeeda (geaghay) gideaba niny balleanda Joseefeeda Eeli,

²⁴ Eeli gaba Mattari, Mattari gaba Laawi, Laawi gaba Meelgi, Meelgi gaba Yanayi, Yanayi gaba Yoseefu,

²⁵ Yoseefu gaba Matattiiya, Matattiya gaba Amos, Amos gaba Nahum, Nahum gaba Esli, Esli gaba Nagayi,

²⁶ Nagayi gaba Maatti, Matti gaba Madattiya, Madattiya gaba Shemeyi, Shemeyi gaba Yoseefu, Yoseefu gaba Yuuda,

²⁷ Yuuda gaba Yoana, Yoana gaba Reesa, Reesa gaba Serubabeeli, Serubabeeli gaba Shaltieli, Shaltieli gaba Neeri,

²⁸ Neeri gaba Meelgi, Meelgi gaba Adi, Adi gaba Goosam, Goosam gaba Elimadaamu, Elimadaamu gaba Eeri,

²⁹ Eeri gaba Yoshuwa, Yoshuwa gaba Elieseri, Elieseri gaba Yoorim, Yoorim gaba Matatte, Matatte gaba Laawi,

³⁰ Laawi gaba Simon, Simon gaba Yuuda, Yuuda gaba Yoseefu, Yoseefu gaba Yonaamu, Yonaamu gaba Eliyakkiimu,

³¹ Eliyakkiimu gaba Meleeya, Meleeya gaba Meena, Meen gaba Matatta, Matatta gaba Nattani, Nattani gaba Dawdi,

³² Dawdi gaba Yeese, Yeese gaba Obedi, Obeedi gaba Boasi, Boasi gaba Saala, Saala gaba Nashooni,

³³ Nashooni gaba Aminadabu, Aminadabu gaba Admiini, Admiini gaba Araamu, Araamu gaba Hesroon, Hersoon gaba Bereesi, Bereesi gaba Yuuda,

³⁴ Yuuda gaba Yakkobo, Yakkobo gaba Isakka, Isakka gaba Abrahaamu, Abrahaamu gaba Deera, Deera gaba Nahoori,

³⁵ Nahoori gaba Seruugi, Seruugi gaba Reewu, Reewu gaba Beleegi, Beleegi gaba Ebeeri, Ebeeri gaba Sheela,

³⁶ Sheela gaba Genaani, Genaani gaba Arfosaadi, Arfosaadi gaba Sheemu, Sheemu gaba Nuuhu, Nuuhu gaba Lameek,

³⁷ Lameek gaba Metusela, Metusela gaba Henookko, Henookko gaba Yareedi, Yareedi gaba Mahaleeli, Mahaleeli, gaba Genaani.

³⁸ Genaani gaba Enooshi, Enooshi gaba Seetti, Seetti gaba Adaamu, Adaamu gaba Aseetta.