Lukka 23 - NEAJEEDA EESH BEA BUUNEESSEAN

Yeesu aba madeeda Bilatto

¹ Ghang'eatng'eat Fukka sean bea girgweageedean ak ghwaat madeeda Bilatto.

² Geang'ng'eat giheakteayda nea geeyi, “Geadaayi siisi nea ghoaschoarda emeedeanya, aba gideaba ghoaghuumwaneesa ea meattai Gaysaari gwaadi nea gwayeena niny Gristoyda was sugoochcheanda gil.”

³ Ghoanyaash Bilatto nea gwayeeshsha, “Assang'iing'i guwosi sugoochcheanda Yahuudi?” Ghwasha niny ak gwayeeshsha, “Gidirukuteaydi ang'iing'i gil.”

⁴ Gwayeeshsha Bilatto Ashohoodiga hees, ea emeeda, “Mwadaahi ng'asheanji muy aba badaydeaba siisi.”

⁵ Godiiktiiksa muuchchi nea gwayeenniisa, “Siisi ghoang'waal buuneeda aba ginealshoadaannyi aba ng'eanyiida Yahuudi sean, ghang'eada Galilaaya ea ghwahidu hiji.”

Yeesu geayaat madeeda Heroode

⁶ Iiy Bilatto ng'asheesu ghoanyaashta siisi ea gaba ng'eanyiida Galilaaya.

⁷ Nyas iitta gideaba gwanda ng'eanyiida sugoochcheanda siyi Heroode, ghwaat heeda Heroode aba gideaba damandida gwanda Yerusaleemu.

⁸ Gahoosan Heroode muuchchi idaa Yeesu, aba gideaba ghayi nigeawiit gagaseadayyi deaktaannyi, aba gideaba ghayi ninyas iittaannyi nea gagasa ghwadaa gwadeagooda jea gwasin.

⁹ Ghoanyaash ng'asheega saang'a; ak ea mwasha.

¹⁰ Ghang'eatng'eat ashoohoodiga hees ea ng'oorshoodiga ak ghoahaakta muuchchi aba urda.

¹¹ Gafool Heroode sea shirikkareadaannyi ak gwajuuga, ak gekkwealsa hang'i mideawa ormeeni miy ak geatealda heeda Bilatto.

¹² Ghang'eada damandida gwaduupchi Heroode ea Bilatto, aba gideaba ghayi ammwadi gwanda fuurjeeda dageascheeda nyawa.

Yeesu gergweaksiina miyeeda

¹³ Iiduw gaguursa Bilatto ashoohoodiga hees sea fuga ahaaghwa ng'eanyiida ea buuneeda,

¹⁴ ak gwayeeshsha saawa, “Siisi goyeadu heedeanyu nea goyeennyi nischoarda buuneeda. Iiduw nea geasikteawi ng'asheanji aba madeedeang'wa, ea mwaadaahi aba headaannyi gidinyeanda was sean oahaaktaawi;

¹⁵ nea eara Heroode godelneasa siisi aba gideaba mandeawana gidinyeanda miisa miyeeda;

¹⁶ aba sareani gaydanung' eabwar ak geasiksi gawa.” [

¹⁷ Aba gideaba iissa gammiisa gideaba gaygoottissa siyagi mida ghelooniga aba damanda ghwelmeeda.]

¹⁸ Hean gojuur sean nea gwayi, “Geanda siisi ak gisiksi Baraaba,”

¹⁹ nea niny ea siida sijaksa ghealooniga aba gideaba ghwanung' ghaghoakghoayda emeeda mujiini ea gideaba gwanuus siida.

²⁰ Gabiikta Bilatto gobalool saawa nea gagasa gwasiksa Yeesu;

²¹ gojuur nea gwayeeshsha, “Angoora, Angoora niny!”

²² Gwayeeshsha gichcha deaba samwagu, “Nea gidinyeandeaba siisi ea naaha gil? Mwadaahi ng'asheanji jea enuusa, asi gaydabwar ak geasiksi gawa.”

²³ Gojuur muuchchi aba uurda nea gagasa engoor. Ea gwajoriischi gijureanda nyawa.

²⁴ Gorgweaksiinda Bilatto gidagassiida buuneeda.

²⁵ Gwasiksa siitta ghayi sijaksa ghealooniga nung' ghaghoakghoayda buneedean, ea gideaba ninuus siidean, was dea gasa saawa; ak ghoadayda Yeesu aba gidagassiida saawa.

Yeesu gengoor

²⁶ Iiduw nea geayaat, geroonnyi Simoneeda ng'eanyiida Girene, nea abeeda gwaleabu neayeeda, ak geang'ng'waay ak geanung' ghwasar behiidida nea ghwaat Yeesu geeshta.

²⁷ Ak ghwaat geeshta emeetuw, ea gadeemga aat geeshta nea gaguuttu heareega nea gooyyeawda.

²⁸ Gwayamsa geaw Yeesu ak gwayeeshsha, “Haweega Yerusaleemu, adoyyeawdaneani, oyyeawda geat ea diibigeagwa.

²⁹ Asi ang'ulla, gayghwahidu eawoojiga jea gwayeena, ‘Ghang'wana gea was sonung'weega, ea jeesinga moang'ng'wa gwaji, ea gidinga miiyereer!’

³⁰ Hean gaygwayeeshsha giijeega, ‘Oppedeayseasa;’ ea heayeeniga, ‘Afunyeesa.’

³¹ Aba gideaba isisissa ng'asheesu geetta shabwaat, gaygawuurjiin aba geetta ghajaam?”

³² Hean geayaat eara fii iyyeenya adiiy enuusuudayyi niny.

³³ Iiduw nea sihitta hiji suguura Geapkeeda Uhuuda, gengoorsa uhuuda behiida, sea fukka adiiyiin, dea manda geattinda dugwa niirja gwanda geattinda ghadaam.

³⁴ Ak gwayi Yeesu, “Bwaabwa, eaniiyean samsiina fiisu; aba gideaba mwanala gissin.” Hean geelaja hang'wakkaaschi ak geng'alealleesa.

³⁵ Ghaminaada buuneeda nea geeng'ula, nea fukka ahaaghwa ng'eanyiidean gang'ula nea gwashka nea gwayeena, “Gwalealu suurja, asi dalealna geaw, iiwas Gristoyda Aseetta loat niny!”

³⁶ Eara fuga shirikkara gwashka ak gaweesa ak ghoadaw beesu ng'weani,

³⁷ nea geeyeenniisa, “Iiwosi sugoochcheanda fuga Yahuudi, gilealu geaw!”

³⁸ Gwanda ng'ooruutka uhuuda behiidaannyi sung'waar, “Nii sugoochcheanda Yahuudi gil.”

³⁹ Gwayeeshsha siyagi adiiy gwachchi singooruudayyi sea niny, “Ang'iing'i muwosi Gristohi? Asi lealni geaw ak gilealneasa eara aseasa!”

⁴⁰ Hean gowoowsa niirja nea gwayeeshsha, “Ang'iing'i miiwali eara Aseetta, nea eara ang'iing'i gindi jeedeaba girgweaksiini?

⁴¹ Nii gammiiseasa aseasa, aba gideaba geanyaschi gimeardeanya aba gissisinnyi, nea siisi ea miigwasin gidamuy wassean.”

⁴² Ng'atta gwayeeshsha, “Yeesu apkaadaan ihitti jeeda sugoochcheandumeadaang'u.”

⁴³ Ak gwayeeshsha, “Aba huumwa geayeeshshineey askweareeni, gajendeayesiina nyeamus.”

Miyeeda Yeesu

⁴⁴ Geeyi bwak ama gul aseetteaba lah gwaduk ng'eanyiissean misaneeda ea gaba aseetta shageash,

⁴⁵ iiduw nea gagarbiit aseetta; hean ghang'at bugusta hang'dida subwaasha jeeda gheeda sibatta Aseettean nibiyyeenya.

⁴⁶ Ng'atta goyyeawda Yeesu nea gojuur muuchchi nea gwayi, “Bwaabwa, nayiinnyi guroroodeanyu geattingaagu!” Ahiit balooli ghoabitta.

⁴⁷ Daa shirikkarajeanda haw gwaduumsheesa Aseetta nea gwayi, “Aba huumwa siisi ea doabiiwaat!”

⁴⁸ Daa emeeda gwachchi bwatgeat aba hoowa nea ghwadaa ng'asheanjiin, gabikta gealga nyaawa nea gagiisan.

⁴⁹ Nea fuga sean duupchi ea gadeemga ghayi adeana aba ng'eanyiida Galilaaya, ghaminaada nea sheagi nea ghwadaa ng'asheeu.

Bunyitta Yeesu

⁵⁰ Aba damandida gwanda siisi suguura Yoseefu was siida mujiineeda Yahuudi siguura Arimattaayu. Niny abeeda gaba gweargwa girgweageeda nea ng'eeni, ak gabiissa ea doabiiwaat,

⁵¹ nea niny ea mwamwasa gidagasa saawa ea gissin, nea abeeda gomuukku sugoochcheandumeeda Aseetta.

⁵² Ghang'eat siisi ak gawa ea gawa heeda Bilatto ama hitta gamus musta Yeesu.

⁵³ Ng'atta gorareang'u ak gokkwealsa hang'da miy ak ghwayiin jeemba bung'eeni mida jeemba laghaana ghayi miyeebung'sa sii.

⁵⁴ Nea eaweechcheanji ea eaweetta sing'aap gil jea ghwahinna sabattoohi.

⁵⁵ Nea Gadeemga ghayi adeana niny leabu ng'eanyiida Galilaaya ghwaat geeshta ghwadaa bung'eeda ea gissibuyda;

⁵⁶ hean iiduw gabiikta ghoah ak gwasin nagheeda ea geediga ng'andidi. Ak gafuuf eaweeda Sabatto gwahinda gidanyashta digheanda.