Lukka 22 - NEAJEEDA EESH BEA BUUNEESSEAN

Geamwaal gichchea enuusta Yeesu

¹ Hean abeeda ea nineekkiit ghwelmeeda mukkattajeega miyeayiin hamiira suguura Basakka.

² Nea ashoohoodiga hees ea ng'oorshoodiga abeeda gwanda jeeda gassooda gichchea ghoang'ng'waayda ak gwanuus; ak iiduw ghoawal buuneeda.

Yuuda ghwamwas ghwalabwadaw Yeesu

³ Hean ghoabiitta Shattaani jeeda Yuudayda suguura Iskariyotte, nea gaba jeedeaba fugiga attamaniyyeenyean;

⁴ Ng'atta gawa goobalool ashoohoodiga hees ea shirikkareeda hees gidajea ghwalaapta bwadaw niny aba saawa.

⁵ Gahoosan saawa muuchchi ak gwaheelleesa gideaba gajeattaw lappiya.

⁶ Hean ghamwas ak gagasa gheatta jea ghwalapta bwadaw nea manda hiji emeeda.

Yeesu ghang'aap agitta hamitta Basakka

⁷ Ghwahidu eaweeda ghweelmeeda mukkattajeega meayiina hamiira, nea eaweetta sinuusa dayeenda gisilleanda ghweelmeeda Basakka gil.

⁸ Iiduw gojeakta Yeesu Betro ea Yohaana nea gwayeeshsha, “Aweayeena asissina heechchea eyeaksiina Basakka.”

⁹ Ak geeyeeshsha, “Gigasayi eang'aabwa aba yeenu?.”

¹⁰ Gwayeeshsha saawa, “Ang'ulla, iyoahitti mujiini gajaroonnyeewana ng'edeeda sar sirbiida beega; ghoayaachchi geashtaannyi ea ahitta gheeda jea gawa jeeda,

¹¹ goyeeshshi siida bea gheeda, ‘Gwayi Ginealshochcheanda, abwaara ghoriini siyeaksi Basakka aniini ea ginealangeasu?’

¹² Ak gayghoahimneegwa ghoorini haw sideeksa uhuumba nuut, ak ea sittamdaam; ak goosissi jeani.”

¹³ Hean Gaweay amwahitta ghwadaakta ng'asheega sean gidagwachchi rukutteayda; hean gwasissin Basakka.

Hamitta Ng'uttamiida

¹⁴ Hitta damanda agiischooda goopteada niny ea giijasoodigaaschi gweagiischi.

¹⁵ Ak gwayeeshsha, “Neagasayi muuchchi daak basakkeani aniini ea agooga heeda miidanyasa hang'weanidooda;

¹⁶ aba gideaba geayeeshshineegwa, mayguttaak ea eahhiit aba jeeda sugoochcheandumeeda Aseetta.”

¹⁷ Hean gageanu bayookta, ak gabadischeesa ak gwayeeshsha, “Oang'ng'waanya gili, ak goolakkisiina geat;

¹⁸ aba gideaba geayeeshshineegwa, majaguttali mideega haghweega misabiibu, ea ghwahidu sugoochcheandumeeda Aseetta.”

¹⁹ Ak gageanu mukkatte, ak gabadischeesa ak ghabwanachchi ak ghoadawaada saawa nea gwayeeshsha, “Nii saseedeanyu gil siittayda aba badahuukkeagwa. Ahinniidunu aba gipkeatteanyu.”

²⁰ Ak gwahindunu eara bayookta ing'atta agiischooda gwayi, “Bayoogi geahhiida appadahuukkeagwa neajeeda eesh aba foojeandeanyu.

²¹ Ak gong'ulayi geattinda siichchea ghwalaabwan bwadaw geambuchcheewi aba hiji.

²² Asi Balleanda Siida gayghabeada gidaghayi sibean eerarsiinda ak ea dashageada siidida jea ghwalaabwan bwadaw!”

²³ Gabissa gonyeari geat saawa, nea gwayi, Ng'eaha nii aba jeedeanya jea gwasin ng'asheanjiin.

Sheang'nyeeda hawunda

²⁴ Iiduw gwardu sheang'nyeeda aba jeanyaawa gideaba ahaw ng'eaha aba jeedeanya.

²⁵ Gwayeeshsha saawa, “Sugoodiga emoojiga inyessa gombaliischi aba heannyaawa; giikka mideawa ghealmbalmeedean aba heannyaawa geguura fuga weeda buuneeda.

²⁶ Agooga ea mii gichchea awurjeewana; aba agooga siida gasa hawunda dawuurjeewana siida mwanang'eawa sean, nea siida gasa ghang'atta mwadi dawuurjeewana siida gadiyeeda.

²⁷ Aba gideaba ahaw ng'eaha, siida apteada ak gweagiischi, ghana siitta gadiyeesa buneedeani? Ak ghaghanyi gajea siitteani agiischiini. Ak aniini aba jeedeang'wa geawurjeewi siida gadiyeeda.

²⁸ “Agooga gowoschi fuga ghayi milikkiida galagasean sea aniini aba jeeda simsindeanyu;

²⁹ gawuurji gidaghayi gondaneani Bwaabwa sugoochcheandumeeda, earaniini gaydagooneegwa,

³⁰ Ak gajayeagiischeena nea goleeshi aba jeeda sugoochcheandumeedeanyu, nea goppitpiidi horgajeega sugoodiga ak gorgweaksi doshin damaniyyeenya bea Israeeli.”

Yeesu ghwaramoar gideaba Betro gayghwashaang'an

³¹ “Simon, Simon, ng'ulla, Shattaani gagasseegwa ghoalealdaneegwa nngano,

³² ak aniini ea namwaaschi Aseetta amwasuunya masaweagaagu, ama ibiikeani gimajeegi oorjooga geamadu.”

³³ Hean gwayeeshsha niny, “Ng'uttamiida, geawoschi hidaat eara etteayeena ghealooniga ghana dami.”

³⁴ Gwayeeshsha, “Geayeeshshineey, Betro, eannean maygoguul nnghaghooda eaweani nea miishaang'aan niba samwagu gideaba ginallaan.”

Shageeda ea sandakwajeanda ea bwaanga

³⁵ Gwayeeshsha saawa, “Damanda eajeakteawaneegwa, nea mondeawani shageeda ghana sandakwajeanda ghana geekka, abeeda gwanda gida nishoadeweegwa?” Geyeeshsha, “Mandana.”

³⁶ Gwayeeshsha saawa, “Ghamneawa siida mideawa shageeda daada, ak gwasnu eara dea mideawa sandakwajeanda. Nea siida mandeawana bwaanga ea dashaayda hang'daannyi ak ghwasha.

³⁷ “Aba gideaba geayeeshshineegwa ng'ooruussu majaghanyi ea meahhiida aba badaydeanyu, ‘Aba gideaba geegalageat sea fuga munyas,’ aba gideaba gissung'waar appadaydeanyu gwanda mudeanoadaannyi.”

³⁸ Hean gwayeeshsha, “Ng'uttamiida, ang'wearda, hiji gwanda bwaangaji iyyeenya.” Gwayeeshsha saawa, “Gwadeay.”

Yeesu ghamwaash Aseetta aba giijeeda Masaytuuni

³⁹ Iiduw gwariitta ak gawa gawuurji gideaba eawoojusu, ea ghwahitta giijeeda Masaytuuni, nea ghwaat geeshta ginealanga.

⁴⁰ Hitta hooweani gwayeeshsha saawa, “Amwaasha Aseetta adiiduw gesmeegwa ak ghoappitti jeeda samsiinda.”

⁴¹ Ghwanung'wa saawa heeda, ak ghwaloat geash gili ayang'da jakteayda lagheaneeda, ak ghang'uda gutng'weakkaaschi ng'eanyi ak ghamwaash Aseetta, ak gwayi,

⁴² “Bwaabwa, igidiibwariiydi gil gischoarjaan bayokcheanji; nea adaghoaw gideagassiidi, nung' ghoaw daang'u.” [

⁴³ Hean ghwahidu malaykajeanda leabu humng'eeda ak ghoadaw uurda.

⁴⁴ Iiduu nea gwanda jeeda sawanadeeda, hean ghamwaash seetta muuchchi; ak gawuurji gheawwochcheandaannyi foojeanda nea gobitpissa ng'eanyi.]

⁴⁵ Ng'eada mooshta Aseetta, nea gabiikta heeda ginealanga, ghwahitta nea nilil aba gideaba ning'ut giseaneega,

⁴⁶ ak gwayeeshsha, “Ghwasaan anda goolilli? Ang'eatng'eada amwaasha Aseetta adiiduw ghooppitti jeeda simsimda.”

Ging'ng'ooyda Yeesu

⁴⁷ Miighoabiit ghuutta aba baloolda ghwahidu emeeda nea godeana siisi suguura Yuuda, bea jeeda ginealanga attamaniyyeenya, nea gooshooyna saawa. Gwaneekkiissa Yeesu ak ghwasam gheatta;

⁴⁸ gwayeeshsha Yeesu, “Yuuda ghamneawa gilaabi bwadaw Balleanda siida aba samitta gheatta?”

⁴⁹ Deagu fukka mideawean gwayeeshsha, “Ng'uttamiida gajeabwarana bwaangajeega?”

⁵⁰ Gafagu siyagi bwaangeadaannyi ak ghwalas soomjeanda ashoohoochcheanda haw ak gwalaksa ng'eanyi iitta geattinda dugwa.

⁵¹ Gwayeeshsha Yeesu, “Anung'waada nideay!” Ghoang'ng'waay iitta ak ghoahaap.

⁵² Ng'atta gwayeeshsha Yeesu ashoohoodiga hees, ea shirikkareeda gheeda sibatta Aseetta ea gweargwa, buwa ghoang'ng'waay niny, “Ghoapkaandi gili oapkaanji oang'ng'oonya mareangheanda, nea gooyeadu bwaangajeega ea gulupkeakka?

⁵³ Eajusu nea gendeaydooschi galeagasean aba jeeda gheeda sibatta Aseetta, ghanea miyoang'ng'wanyaan ak ghamneawa nii ea damandeang'wa gil ea uurda misaneeda.”

Betro ghwashaang' Yeesu

⁵⁴ Hean geang'ng'waay ak geayaat ea eayaat gheeda Ashoohoochcheanda haw. Gamaseaw Betro nea sheagi;

⁵⁵ iiduw geayyeat beasta aba bugharjeanda daghatta gheeda nea gendeayi sean, ak eara Betro gwanda hiji.

⁵⁶ Ng'atta ghwadaa hutpa gadiyeeda nea gwanda heedeesh ak gohang'ooysa ghaang' ak gwayeeshsha, “Eara siisi gwandeaydooschi sea niny.”

⁵⁷ Ghwashaang' nea gwayeeshsha, “Gatmooda, siisi aniini mwaanali.”

⁵⁸ Miigageawiit ghwadaa siinuut ak gwayeeshsha, “Eara ang'iing'i gibeahi jeedeaba fukka.” Gwayeeshsha Betro, “Siida meabeahi.”

⁵⁹ Iiduw nea ning'atta aseedeanagi gwayeeshsha siinuut, “Aba huumwa siisi earada goodeaydooschi niny; aba gideaba niny siida Galilaaya.”

⁶⁰ Gwayeeshsha Betro, “Siida, mwaanali eara gidinyaashi.” Deagheatta damani duu gabaloolean, goguul nnghaghooda.

⁶¹ Ghwayam geaw Ng'uttamiida ak gang'ula Betro. Ghoapkaat Betro ng'asheanda Ng'uttamiida, gidaghayi rukusiinda gideaba, “Eannean heeda miigoguula nnghaghooda gajea niheawanaan niba samwagu.”

⁶² Hean gwariitta jarooda ak goyyeawda muuchchi.

Yeesu geeshka nea geabwar

⁶³ Ghwahitta Fukkeanji gwachchi ang'ng'waay Yeesuun ak gwashka nea ghabwar;

⁶⁴ Gegeanu ak geeduukta gheanyanga ak geppearsa nea geeyeeshsha, “Heappi rukuneasa siida lasnyi?.”

⁶⁵ Ak gerukusa ng'asheega saang'a bea ging'weakkwa.

Yeesu geayaat madeeda girgweageeda

⁶⁶ Sakteayda nea gorearu aseetta, gabadageat gweargwa sea ashoohoodiga hees, ea ng'oorshoodiga, ak geyeadu madeeda girgweageeda, ak geeyeeshsha,

⁶⁷ “Iiwosi Gristo, girukuneasa.” Gwayeeshsha saawa, “Eara darukuneegwa, majaghanyi amwasa;

⁶⁸ ak eara daanyaashcheagwa ng'asheanda ea mwajashaaha.

⁶⁹ Nea gidang'eada ghamneawa Balleanda Siida gaygoopteada aba meatkweeda geattinda dugwa bea Aseetta hoauur.”

⁷⁰ Gwayeeshsha sean, “Aba sarean guwasi Balleanda Aseetta?” Gwayeeshsha saawa, “Goorgu agooga gideaba geawoschi.”

⁷¹ Hean geeyi, asi gudeegassa mushooduspwa naaha? Aba gideaba siyiing'si geat ng'asheega ghuuttaannyi.