Lukka 2 - NEAJEEDA EESH BEA BUUNEESSEAN

Jeatta Yeesu

¹ Askwearjoojikka ghoadayda Gaysaari Aguusto digheanda nea gwayeeshsha, ang'waara monneeda buneassean mida jeeda ng'eanyiida.

² Ng'oordi dea madeeda, nea gwanda sugoochcheandumeeda Sirya Gireeniyo.

³ Gaba siisi weah eang'waar aba mujiineeda ng'eang'da nyaawa.

⁴ Hean ghwascheang'da Yoseefu ghabeawa Galilaaya, nea ghabeawa mujiineeda Nasaretti, ak gawa Yudeeya, ea ghwahitta mujiineeda Dawdi, suguura Betleheemu, aba gideaba gaba dooshta Dawdi,

⁵ Gawa eang'waar sea Mariyaayda was huuda anyeari, nea abeeda ea gweayiideat.

⁶ Damanda mideewa hooweani ghwahitta damanda jea gwajiila.

⁷ Gwaji duweachcheadaannyi was balleanda ak gookkwealsa hang'weakka jeepcheandumeeda ak goluul aba jeeda daghwalda leehha dugwa beega, aba gideaba mwanyasa heeda jea gwalla aba ghoorida rabasta.

Jeagiischoodiga ea malaykajeega

⁸ Nea aba damandida abeeda gwanda ng'eanyiitta Jeagiischoodiga fur gisilga nyaawa eawa.

⁹ Gabussa saawa Malaykajeanda Ng'uttamiida, ak ghoabwaay murdajeega nyaawa sean gigheambiitta Ng'uttamiida, ak ghang'ut muuwda.

¹⁰ Ak gwayeeshsha Malaykajeanda, “Adoobealli; ang'ulla geayeanneegwa giijasta miy bea hoseaneega jea gwahiissa buuneessean.

¹¹ Aba gideaba eannean aba mujiineeda Dawdi siji appadahuukkeagwa, lealnoochcheanda, niny Gristoyda was Ng'uttamiida gil.

¹² Nea gwadeagooda jea adaaha ea nihi; gajadaaha jeepta sikkwealsa hang'weakka jeepcheandumeeda nea geelluul aba jeeda daghwalda leehha dugwa beega.”

¹³ Deagheatta gwandeayi sea malaykajeanji lugooda saang'a bea humng'eeda ak gwaduumsheesa Aseetta nea gwayi,

¹⁴ “Gigheambiita gaba Aseetta mida humng'eeda, ak aba ng'eanyiida ghoaw hoyyoo aba heeda fuga ahoosan!”

¹⁵ Iiduw nea nibiikta Malaykajeega humng'eeda, gwayeenniissa geat Jeagiischoodiga, “Asi eweaya Betleheemu eadaaha gidabunu, rukuneasa Ng'uttamiida.”

¹⁶ Gaweay nea ghwalamwajaada ak geanyasa Mariya ea Yoseefu heeda mida jeepta nea gwalil aba jeeda daghwalda leehha dugwa beega.

¹⁷ Daa gwarukuta gidagwachcheaya surgu aba badaydeaba jeebi;

¹⁸ ghahamng'eanyi fukka sean iyiiy gidaruksa jeagiischoodigean.

¹⁹ Nea Mariya gong'ng'ooysa jeadaannyi ng'asheesu seaniin, nea gottemsheesa geaw.

²⁰ Iiduw gabiikta jeagiischoodiga nea ghoaghambiit nea gwaduumsheesa Aseetta aba ng'asheega siyiiy ea gea sidaah, gawuurji gissurukusiinda.

Yeesu geeng'assa gheawunga

²¹ Ng'atta eawooji sis nea siyaat ghasmeahooda geeguura Yeesu, gheawunga ghayi ng'assa malaykajeanda nea mii ghwanyas ghaamwat gweayumeeda.

Yeesu geayaat gheeda sibatta Aseetta

²² Iimuchchu nea ghwahitta damanda nyaawa bea gimmiinnooda gawuurji ginnyaashta deaweedeeda Muusa, hean geayaat niny Yerusaleemu ak geattaw Ng'uttamiida

²³ (gawuurji gissung'waarda aba jeeda deaweedeeda Ng'uttamiida, “Gilinyoo ea balleanda was duweachcheeda gil gajeeguura siida ghaydiit bea Ng'uttamiida,)”

²⁴ ak ghoadayda haleanjeeda sisapa geadi gawuurji gidanyaashta deaweedeeda Ng'uttamiida, “Was bakpakchooji iyyeenya ghana dayi iyyeenya bea ghariibajeanda.”

²⁵ Nea abeeda gwanda Yerusaleemu, siisi suguura gheawungaaschi Simon, nea siisi abeeda ea doabiiwaat, nea gabada Aseetta, nea goomuukku hawdeayda fuga Israeeli, nea gwanda badaydaannyi Gurorooda Ghaydit.

²⁶ Nea ea nigeawiit goohiimsa Gurorooda Ghaydit gideaba mayghami nea mighwadaah Gristoyda Ng'uttamiida.

²⁷ Ak ghwaat Gurorooda Ghaydit gawa jeeda gheeda sibatta Aseetta; nea ghwaat ghwaan ea ghaamwat Yeesu jeeda gheeda nea geehinda giduurji ng'asheega deaweeda,

²⁸ ghoang'ng'waay aba geattingaaschi ak gabadiischeesa Aseetta nea gwayi,

²⁹ “Ng'uttamiida, biissiina siksiina soomjandaang'u gabiissa gawa nea ghwaat hooyyoo, gawuurji ginnyah ng'asheandaang'u;

³⁰ aba gideaba gheanyangeasu nidaa lealeanoodaang'u

³¹ ghayi isni nea ghwadaa buuneessean,

³² Weeshinda jea ghoabwaay emoojiga, ak ghoaw gigheambiitta aba heeda fugaagu was Israeeli.”

³³ Hean eara Ghwaan ea ghaamwat ghahamng'eanyi aba gissirgu appadaydaannyi;

³⁴ Gang'ushsha Simon saawa nea gwayeeshsha Mariyaayda was ghaamwat, “Ng'ulla, jeebi gajeenung ghoaw gibeedeayda ea ng'eedooda fuga saang'a bea Israeeli, ak gayghoadaw gwadeagooda jea ghaheawa buuneeda

³⁵ (nea jeadaang'u gayghwalach barda) nea ng'asheega jeesinga fuga saang'a gajeattaajiit.”

³⁶ Ghayi gwanda gatmooni was sibaneeda, suguura Ana, was hudeaba Fanuweeli, bea emeeni siyi Asheeri; ak ea nuwasiit muuchchi, ghayi geaghi nea miyeasat ak gwandeawa siyeeda gwaannyeaw ispwa,

³⁷ goobida masinung'weandumeeda gweannyew seedam ea ang'waan. Nea mii gwaheelli gheeda sibatta Aseetta, nea gagadoowani nea gwarada jalooda nea gamoora Aseetta eawa ea askweari.

³⁸ Gwardu aba damandida ak gabadiischeesa Aseetta, ak goobaloola niny ng'asheega sean bea fuga amuukku lealnooda Yerusaleemu.

Biikteayda Nasareetti

³⁹ Iiduw nea nihiit sinooda ng'asheega sean gawuurji ginnyaashta deaweedeeda Ng'uttamiida, gabiikta Galilaaya, mujiineeda gheannyawa was Nasareetti.

⁴⁰ Gwahiissa heeda jeepta nea ghwanyas uurda, ak geannyiit weaghumeeda; nea gwandeawa dagheerjeandumeeda Aseetta.

Balleanda was Yeesu aba jeeda gheeda sibatta Aseetta

⁴¹ Nea Ghwaan ea ghaamwat gabadiini gilakkweay Yerusaleemu aba damanda ghwelmeeda Basakka.

⁴² Iiduw nea nihiitta gweannyeew damana iyyeenya, ghwascheang'da gawuurji gideajusu bea geallaan;

⁴³ duulean ghwelmeeda, damanda biikteawa, geeppuussa bwadaw balleanda was Yeesu aba Yerusaleemu nea ghwaan ea ghaamwat ea majeeng'na.

⁴⁴ Gearar gideaba gwanda jeeda bareanda ak gaweay ea gamikta, geang'ng'eat ghuutta gassooda aba jeeda buweadeega ea fuga sinal;

⁴⁵ ama duuw nea mudeanyas, Geebiikta Yerusaleemu nea geegaseadayyi.

⁴⁶ Muchchu nea ning'atta eawooji samwagu geanyasa jeeda gheeda sibatta Aseetta, nea goopteada aba bugusta ginealshoodiga, nea gooleeysiit nea Gonyearriida ng'asheega;

⁴⁷ nea fuga sean iiy ghahamng'eanyi isiidaa gidabwaraayda uhuuda ea gisheahiida ng'asheega sinnyaash.

⁴⁸ Sidaah niny geahamng'eanyi; ak gwayeeshsha Ghaamwat, “Balleanda, ghwasaan anda gihinduneasa? Ng'ulla, aniini ea gweanu sinyarji aba gassodaang'u.”

⁴⁹ Hean gwayeeshsha saawa, “Ghwasaan anda googaseadayean? Neada ea mwoonali gideaba gammisean giibinda jeeda ghooriida Bwaabwa?”

⁵⁰ Nea saawa ea majeeng'na ng'asheanda rukusa.

⁵¹ Ghwararang'aada godeayi ea ghwahitta Nasareetti, nea gwasissa mureada; nea ghaamwat ghwayiin jeedaanyi ng'asheesu seaniin.

⁵² Gwahissa heeda Yeesu aba weaghumeeda ak gohoosan Aseetta ea buuneeda.