Lukka 19 - NEAJEEDA EESH BEA BUUNEESSEAN

Yeesu ea Sakkayo

¹ Ghwahitta mujiineeda Yerikko, ghang'atta nea ghwalach bugusta.

² Abeeda gwanda jeedeaba mujiineeni siisi suguura Sakkayo, siisi ea haweewa fuga ang'ng'oonyi gwaadi ak ea meanang'ochcheanda.

³ Siisi abeeda goolla gagaseaday deakta Yeesu gideaba siida urjiini, ak ghwaraay ghwadaa aba seang'ayda emeeda, aba gideaba ninyi anuwaas.

⁴ Ak iiduw Ghafwach gawa mwadi, ak gwading'da uhuuda meagheayeanda ghwadaah, aba gideaba gaygwasku naweetta.

⁵ Hitta Yeesu deascheeda mida gong'weersa uhuuda geetta ak gwayeeshsha, “Sakkayo lamwaja rarang'aana, aba gideaba gammiisean deabiida gheang'u askweareani.”

⁶ Ghwalamwach ghwararang'aan ak ghwadeapta nea gahoosan.

⁷ Iiduw nea ghwadaa ng'asheanji ghoaniikg sean nea gwayi, “Nuwa ghoaw rabascheanda aba gheeda siida ring'eeda.”

⁸ Ghang'eat Sakkayo ghamiinaada ak gwayeesha, “Ng'ulla, Ng'uttamiida, gaydalach bugusta haleanjeedeanyu ak ghaadawji fuga barbari, ak iimida siida nareachchi gida aba fughareeda, gaydeadeelsa niba ang'waan.”

⁹ Ghwayeeshsha Yeesu niny, “Askweareani lealeanooda nihidu gheawi aba gideaba eara niny balleanda Abrahaamu.

¹⁰ Aba gideaba Balleanda siida ghwahidu gagasa nea gwalealu diitta roadiin.”

Gissigala shiliingajeanda sisna lagheanga meng'meeng'i

¹¹ Iiduw nea ghwayiiy ng'asheesu, hean gwarukuta aba galleega, aba gideaba nineekkiissa Yerusaleemu, aba gideaba saawa ghaghay gil sugoochcheandumeeda Aseetta gaygabean ghwadaajiit.

¹² Gwayeesha, “Ghayi gwanda siisi haw siiwal gheang'da, wea bareannyeekka ng'eanyiida sheagi eattaw uurda sugoochcheandumeeda, ak gabiigu.

¹³ Hean gaguursa fii damanamughuush aba jeeda soomjoogaaschi, gaba nii adaw lappiyaji bughala ak gwayeesha, ‘Agadiyeatta ea dabiigu.’

¹⁴ Ak siisi ghwasit fuga ng'eang'da nyaawa ak gechcheaksa buuneeda eyeeshsha, ‘Aseasa meegassi siisi ghoahaaghwaneassa.’

¹⁵ Iiduw nea gabiigu siidida nea ninyas uurda sugoochcheandumeadaannyi ghwanung' eguursa soomjookka ghayi adaw lappiyean ghwanaal niba siisi nyas gea deannaan aba gadiyeedaannyi.

¹⁶ Ghwahidu dea madeeda headaannyi ak gwayeesha, ‘Ng'uttamiida, lappiyeadaang'u appughala niji suuk bughala.’

¹⁷ Ghwayeesha niny, ‘Ghwahiit guwosi soomjeanda miy! Aba gideaba guwosi doabiiwaat aba ng'asheanda mwanang' gajambala mujiinaji damanamughuush.’

¹⁸ Ghwahidu Soomjeandeaba iyyeenya ak gwayeeshsha, ‘Ng'uttamiida, lappiyeadaang'u aharadam ea damanamughuush niji suuk haradam ea damanamughuush.’

¹⁹ Gwayeeshsha nii, ‘Ang'iing'i ambala mujiinaji muut.’

²⁰ Ng'atta ghwahidu nuut ak gwayeeshsha, ‘Ng'uttamiida, sukkwaanji lappiyeadaang'u attamanamughuush ghayi igooni, geadiiwsi jeeda weasta;

²¹ ghaawalleay, aba gideaba guwosi siida ng'waan iissa gigeandi gida miidaang'u ak gilaji gea mihistani.’

²² Gwayeeshsha niny, ‘Gaydeargweaksinaneey ng'asheanda ghuuttaang'u, soomjeanda muy! Ginali gideaba geawoschi hang'waay geageandi gidamiideanyu, ak ghaalaji gea meahistani?

²³ Ak ghwasaan anda migadiyeatta lappiyeedeanyu gwaji suuk, ama ahidu geageandi sean ea gea ahaada?’

²⁴ Hean gwayeeshsha fukkeanji minaada aba hooweanjiin, ‘Oarreada lappiyeeni mideawean ak ghoattawji siitta mideawa bughalaan.’

²⁵ Geeyeeshsha niny, ‘Ng'uttamiida, gwandeawa lappiyaji bughala!’

²⁶ ‘Geayeeshshineegwa, Aba gideaba siisi agar gil gajeehheasa, nea siitta meagara giliin, eara gidida mwanang' mideawean gajearreat.

²⁷ Ak fukka was weajoodigeasu magassa gideaba gaydaahaaghwa saawaan, ayeani hiji ak gonuuseadi aba madeedeanyu.’”

Hitteayda Yerusaleemu ak geadeaptaawa hooseaneega

²⁸ Iiduw nea ghoahiit ng'asheesu, goosheedeawa saawa, ak ghwascheang'da gawa Yerusaleemu.

²⁹ Hean neekkiisa Betfagi ea Bettaniya, nea neekki gijeeda suguura Masaytuuni, goojeakta fii iyyeenya aba jeeda ginealangaaschi,

³⁰ nea gwayeeshsha, “Aweayeena gharang'dida mida mwadiin iyoahitti gajanyasana hoowa gureenda digeeda nea radaat nea eara ginealda ea miyeannaal, goottinnyi ak goyeadu hiji.

³¹ Iideeppa ghoanyasheegwa sii gideaba, ‘Ghwasaan anda gottinnyi?’ Goyeeshshi, ‘Gagasa Ng'uttamida.’”

³² Gaweay Fugiga siichcheaktean, amahitta hoowa ghwadaakta gidagwachchi rukusiinda saawa.

³³ Damandida siittina gureendean, gwayeeshsha fiibwa, “Ghwasaan anda gootiinnyi gureenda?”

³⁴ Geeyeeshsha, “Gagasa Ng'uttamiida.”

³⁵ Gearjaanda ea ghwahitta heeda Yeesu, gegeanu hang'wekka eayiin badayda gureenda amahit geanung' gwading'da Yeesu badayda ak goopteadawa.

³⁶ Damandida beawaan, gageanu buuneeda ak ghwoabwarghaan hang'weakka nyaawa aba naweeda.

³⁷ Iiduw nea gwaneekkiissa rarang'eadayda giijeeda Masaytuuni, gang'weela fuga saang'a was ginealangaaschi nea gwaduumsheesa Aseetta aba ghuutta haw aba gadiyoojiga hees sean sidaa,

³⁸ nea geeyi, “Ning'ushsha Aseetta sugoochcheanda wuna gheawunga Ng'uttamida! Niiw hooyoo aba humng'eeda ea gigheambiitta aba hoowa bea humng'eedean.”

³⁹ Gwayeeshsha Farisayajeesu ng'ay mida jeedeaba emeetta, “Ginealshoochcheanda, rekusiina ginealangaagu.”

⁴⁰ Ghwasha nea gwayeeshsha, “Geayeeshshineegwa, inyas ghwasiinda saawa, gaygoojuur lagheanga.”

Yeeesu gaguuttu heareega appadayda Yerusaleemu

⁴¹ Iiduw nea gwaneekkiit mujiini ak ghwadaa goyyeawussa,

⁴² nea gwayi, “Gideaballi gwachchi eara ang'iing'i ginali eaweechcheanji miisa hooyyoohiin! Ak ghamneawa ea siwwiimwa gheanyangaagu.

⁴³ Aba gideaba gayghwahidu eaweeda jea goneaweeseey weajoodigaagu, gajeeneaweeseey ak geebeasheesinaneey meatkwajeega sean,

⁴⁴ ak gaygwajakseeyi ang'iing'i ea diibigaagu ng'eanyi nea ea mwajeanung'usa laghaana uhuumba nuut aba jeedeang'wa aba gideaba mii jeeng'ni damanda jea eebareassiinaneegwa.”

Yeesu gawa jeeda gheeda sibatta Aseetta

⁴⁵ Hean gawa jeeda gheeda sibatta Aseetta ak goruutta fukka shaayda haleanjeedean,

⁴⁶ ak gwayeeshsha saawa, “Geang'waar gideaba, ‘Gheawi itteanyuun gayghoaw heechchea gamoora buuneeda Aseetta ghawooda,’ ak ghoanung' ghoaw gwaleeda jea gafunnya geat mareanghooga.”

⁴⁷ Inyeessa goonealshi galagasean aba jeeda gheeda sibatta Aseetta. Nea ashoohoodiga hees ea ng'oorshoodiga ea fuga hees was ashoohoodiga buuneeda ghamwaal gichchea gwanuusta niny;

⁴⁸ ak ea meanyaasa gichchea eesin aba gideaba gelleeysiit buuneessean.