Lukka 18 - NEAJEEDA EESH BEA BUUNEESSEAN

Gissigala masiinung'weanda ea siida laja girgweaguutka

¹ Hean gwarukusa ng'asheega nea gagalla geat nea gagasa gideaba gaygammiisa sawa mooshta Aseetta galeagasean nea mapra.

² Gwayeeshsha, “Aba jeemba mujiinajean gwanda Siisi laja girgweaguutka meawalla Aseetta nea maduuppa eara sii;

³ ak aba jeedeaba mujiineeni gwanda Gatmooni was masiinung'weanda, wuna headaannyi galeaga sean nea gwayeenniisa, ‘Weadaan nuung' danyas gidamiisean aba heeda weajoochcheandeanyu.’

⁴ Ea golla gaheewachchi, ammuchchu gwayeeshsha geaw, ‘Earea meawalli Aseetta ghana gheang'ba sihiin,

⁵ aba gideaba godeawiidan masiinng'weanji gaydaadaw gidagasa ea meabuuraan aba hittunooda heedeanyu.’”

⁶ Hean gwayeeshsha Ng'uttamiida, “Oalleaydiit ginnyaashta Siitta mii doabiiwaat laja girgweaguutkean.

⁷ Gajeyeena Aseetta mayghoadaw dobiiwnatta fugaaschi loossageaw ayyeawussa askweari ea eawa? Gayghwashing'da aba weetta nyaawa?

⁸ Geayeeshshineegwa, Gayghwalamwachi ghoadaw gidamiisa, nea Balleanda Siida ihiidu gayghwadaah masaweega aba jeeda ng'eanyiida?”

Gissigala Farisayajeanda ea siida ang'ng'oonyi gwaadi

⁹ Iiduw gwaruksa galeega fuga hinda geat gilidobiiweadi nea gafool suurja.

¹⁰ “Ghayi gwanda headi iyyeenya siyeang'da gaweay ghamwaash Aseetta aba jeeda gheeda sibatta Aseetta, akkalealla Farisayajeanda gil nea niirja ea siida ang'ng'oonyi gwaadi.

¹¹ Ghang'eat Farisayajeanda ak ghamwaashtunu Aseetta aba jeadaannyi, ‘Ea Aseetta, geabadischoweey aba gideaba aniini meawurjeewani buuneeda suurja, fuga areedi buuneeda haleanjeeda, ea fuga miidoobiiweadi, ghana fuga mealuuli, nea meawuurjeewani eara siisi ang'ng'oonyi gwadiin.

¹² Aniini inyeessa gealuuldi geaw nibiyyeenya aba jeemba eawooji ispwa, ak aba jeeda gilattamanamughuush bea haleanjeedeanyu, iissa ghaadaydi akkalealla.’

¹³ Hean ghaminaada Siitta ang'ng'oonyi gwadiin nea dildeaweat nea eara gheanyangaaschi ea meageala humng'eeda, gagiisan nea gwayi, ‘Aseetta, bwaydanaan aniini geabea riing'a!’

¹⁴ Geayeeshshineegwa, ghwararang'ada siitta ang'ng'oonyi gwaadiin gawa gheannyi nea sittaw doobiiwnatta ea ghang'al niirja; aba gideaba siida nyoo godiing'u geaw gajeahiing'u, nea dea hiing'u geaw gajeettiing'u.”

Yeesu ghoadaw ghawooda diibiga manang'i

¹⁵ Hean geeyeassa diibiga niny ghoadaw ghawooda; daa ginealanga gowoowsa buuneeda.

¹⁶ Ng'atta gaguursa Yeesu saawa nea gwayeeshsha, “Anung'waada diibiga ghapka heedeanyu adoakghuumnyi, aba gideaba gea uurji suu gammiissa sugoochcheandumeeda Aseetta.

¹⁷ Aba huumwa gearukuneegwa gideaba, siida mwadeaptaayda sugoochcheandumeeda Aseetta jeepta maygawa jeeda.”

Siisi was meanang'ochcheanda

¹⁸ Ghoanyaash siyagi ahaaghwa ng'eanyiida nea gwayeeshsha, “Ginealshoochcheanda miy, gaydasin naaha iijeadanyas eaweega manda muudeanooda?”

¹⁹ Gwayeeshsha Yeesu niny, “Ghwasaan anda gigurewean siida miy? Manda siida miy geaghus Aseetta akghwahit.

²⁰ Ginali digheannyeekka: ‘Adimealuuli, adinuusi siida, adijagwadiischi, adimuuwwu ng'uyyeega, gisissi mureeda gweanu ea geamadu.’”

²¹ Gwayeeshsha, “Ng'asheesu seaniin nang'ng'waannyi ghang'eada jeepcheandumeedeanyu.”

²² Iiy Yeesu ng'asheesu gwayeeshsha niny, “Ghwashoadeweey ng'ashaanjagi. Shaayda halanjeadaang'u indeawi sean ak gilakkiisi fuga barbari, ak gaynyasa gheaseeda aba humng'eeda, ak guwuni eanni geeshteanyu.”

²³ Iiy niny ng'asheanji gagiisan, aba gideaba eabaruur muuchchi.

²⁴ Gang'ulla Yeesu niny ak gwayeeshsha, “Ahang'waaydaan beatta jea gaweay meanang'oodiga jeeda sugoochcheandumeeda Aseetta!

²⁵ Asi gajawussis muuchchi gideaba gaygwasik nngamiya seawadeeda sidageeda, maygawuurji beatta jea gawa meanang'oochcheanda jeeda sugoochcheandumeeda Aseetta.”

²⁶ Gwayi fukka iiy nea gwargu ng'asheanjiini, abeeda iisunu gwanda siida jea ghaghu?

²⁷ Ng'atta gwayeeshsha, “Ng'asheega hang'oonyi aba heeda siida aba heeda Aseetta miihang'waay.”

²⁸ Gwayeeshsha Betro, “Ng'ulla aseasa sinung'wi heeda galgaasa ak geeyeattu geashtaang'u.”

²⁹ Hean gwayeeshsha saawa, “Aba huumwa geayeeshshineegwa, manda siida nung'wa heeda gheannyi, ghana gatmoadaannyi, ghana oorjooga ghaamwat, ea fuga jiilu ghana diibiga aba sugoochcheandumeeda Aseetta,

³⁰ siisi mwanyasa gasaang'a aba damani bea ghamneawean nea iiduw aba damandida jea ghwahiduun, gayghwanyas eaweega manda muudeanooda.”

Yeesu gwargu deaba samwagu iitta miyeadaannyi

³¹ Ng'atta goobalool ginealangaaschi attamaniyyeenya nea gwayeeshsha, “Ang'ulla ghamneawa geascheang'di eweaya Yerusaleemu, ak ng'asheega sean ghayi ng'waar sibanga appadayda Balleanda Siida, gaygabiissa ghwahidu.

³² Aba gideaba gajeayiin geattinga emoojiga ak gajeebarra rear nea geng'ng'eawi nea geng'ng'urriisa ng'usheega;

³³ nea gajeabwara mughowooda, ama ng'atta genuus, amaduw eaweetteaba samwagu gaygwaduudu.”

³⁴ Ea manda siichcheeng'u ng'asheesu eara gidawas nea ng'asheanji ea sifnya saawa nea majeeng'na gissibaloola.

Yeesu ghoahaap siida ng'oaw musiisachchi

³⁵ Geeyi bwaak ama riiksa Yeesu Yerikko, gwanda siisi ng'oow apteada aba gheatta naweeda nea gamusiisachchi;

³⁶ iiduw nea ghwayiiy gidang'attayda emeeda ghoanyaashta gideaba “Gwanda naaha hiji?”

³⁷ Geyeeshsha, “Ghang'atta Yeesuuydida bea Nasarettiin.”

³⁸ Gabiissa Gojuur nea gwayeeshsha, “Ea Yeesu, Balleanda Dawdi, eaniyean bwaydanaan!”

³⁹ Gojuursa Fukka asheedeawean nea geeyeeshsha, Siinda; sirukusa Ghoaraanya gijureanda muuchchi nea gwayeeshsha, “Balleanda Dawdi, eaniyean bwaydanaan!”

⁴⁰ Hean gawus Yeesu ak ghwanung' eyeadu headaannyi. Neekkiissa siitta ghoanyaash Yeesu nea gwayeeshsha;

⁴¹ “Gigasayi dasinneey naaha?” Gwayeeshsha, “Ng'uttamida aniini geagasayi dang'wearda.”

⁴² Gwayeeshsha Yeesu niny, “Nyasa ging'weerdeada; nihaapnyi masaweagaagu.”

⁴³ Mighoaw gil ghoang'wearda ak ghwaat geeshta nea ghoaghambiit Aseetta; daa emeeda ng'asheesu ghoaghambiit Aseetta.