Lukka 16 - NEAJEEDA EESH BEA BUUNEESSEAN

Haghweadochcheanda milmil

¹ Gwayeeshsha ginealangaaschi, “Ghayi gwanda siyagi was meanang'ochcheanda nea gwandeawa haghweadoochcheanda ak iiduw geattaw meanang'oochcheandida iitta gidasaksaktaayda haghweadoochcheanda haleanjeedaannyi.

² Gaguursa niny siidida ak gwayeeshsha, ‘Ng'asheesu eayiinyayi aba badaydaang'uun naaha? Goona iitta moonneeda haleanjeedeanyu bea haghweadoochcheandumeadaang'u, aba gideaba maygudu huuwa haghweadoochcheanda.’

³ Gwayeeshsha geaw haghweedoochcheanda, ‘Gaydasin naaha, aba gideaba siideanyu haw gagasa gageandeawaneani haghweadoochcheandumeeda? Meandeawani uurda jea dabwara ng'eanyi, ak ghaawalli musischchooda.

⁴ Ak ea nanyaschi gichchea dasin, ak abeeda ghwadeaptanaan buuneeda aba gealga nyawa isigeandeawanean haghweadoochcheanda.’

⁵ Iiduw Gaguursa fuga mideawa siileeniga siida haw ak gaguurriisiinagi ak gwayeeshsha siida madeeda, ‘Gindeawi siileeni deanaan bea siida haw?’

⁶ Gwayeeshsha, ‘Ghadeat bughala bea nagheeda.’ Hean gwayeeshsha niny, ‘Nukkwa siileadaang'u lamwaja apteada ak ging'waari haradam ea damanamughuush.’

⁷ Ng'atta gwayeesha nuut, ‘Ang'iing'i gindeawi siileeni deannaan?’ Gwayeeshsha, ‘Guniyaji bughala bea ngano.’ Gwayeeshsha niny, ‘Nukkwa siileadaang'u ng'waara seedaam.’

⁸ Gagwarsa Siida haw haghweadoochcheandida sina ng'asheega munyasiin, aba gideaba balloojigeaba ng'eanyiin eabareahi iheen aba jeedeaba rooproobang'su ea ghang'al fuga abiitta heedeesh.

⁹ Asi geayeeshshineegwa, asissiina geat roroochcheeda aba meanang'oochcheandumeeda mwadoabiiwa, ama ashealaneegwa gil, ghwadeaptaneegwa aba jeeda giibiinda manda muudeanooda.

¹⁰ Siida doabiiwaat aba halleanjeeda manang'i muuchchi gajeadoabiiwaat eara aba halleanjeeda heesi muuchchi; nea dea miidoabiiwaat aba haleanjeeda manang'i eara aba gea heesi gajea miidoabiiwaat.

¹¹ Asi imoowosi dobiiweadi aba meanang'oochcheandumeeda mwadoabiiwa, gaygagooneegwa ng'eaha meanang'oochcheandumeeda huumwa?

¹² Nea imoowosi doobiiweadi aba haleanjeemba sii nuut, gaygagooneegwa ng'eaha haleanjeetta was geagwa?

¹³ Manda soomjeanda jea ghoammu gagadiyeesa fiisu hees iyyeenya, aba gideaba gayghwasiit nii ak ghabwariiy nii, ghana ghoang'ng'waay geat sea nii ak gafool nih. Mwoammusi agadiiyeesiina Aseetta ea meanang'ochcheandumeeda.”

Ng'asha suuk bea Yeesu

¹⁴ Iiduw nea ghwayiiy Farisayajeega ng'asheesu seaniin gwashka niny aba gideaba sawa ghabwariiy lappiya.

¹⁵ Ng'atta gwayeeshsha saawa, “Agooga goohindi geat gili oowoschi miyaas aba madeeda buuneeda, nea Aseetta ghwanal guroruunatkeagwa; nea gilinyoo goodiing'u geaw aba madeeda buuneeda, gayghoanyarees Aseetta.

¹⁶ Deaweedajeega ea sibanga ea gagul Yohaana; hean geerukkwiida Giijaasta miy bea sugoochcheandumeeda Aseetta, nea gaba siisi abwasaay geaw.

¹⁷ Gajeawussus ng'atteayda jea ghang'atta huumng'eeda ea ng'eanyiida, mayghwasam gideaba gayghwasuunya ng'ashaanjagi mwanang'a was deaweeda.

¹⁸ Siida wassean nung' gatmoadaannyi ak ghayi nuut siisi gamealuul, ak siida jea ghaghi gatmooda sunung' earada siisi gamealuul.”

Meanang'oochcheanda ea Lasaaro

¹⁹ “Ghayi gwaanda Meanang'oochchaanjagi akkweali hang'weakka oomng'i bea sheayeeda haw ak gwasna ghwelmeeda galagasean.

²⁰ Nea abeeda gwanda ghuutteaba gheanyi siisi bwarbwar suguura Lasaaro, nea gwandeawa deanneaduutka saang'a,

²¹ inyeessa gagasa ghwaak lajanga abiittuuna heeda agiischeewa meanang'ochcheanda, nea inyeessa ghapka gudajeega gameera deanneaduutkaaschi.

²² Ghami siitta bwarbwariin, ak ghwaat malykajeega ea ghoahiitta madeeda Abrahaamu. Muchchu ghami eara meanang'oochcheandida ak geebuy;

²³ gatgat ghaanyangaaschi meanang'ochcheanda nea gwanda heeda abiitta fuga nimewa nea gwanda jeeda hang'weeniidooda, ghwadaa Abrahaamu nea sheagi nea Lasaaro gwanda madeadaannyi.

²⁴ Gaguurda nea gwayeeshsha, ‘Bwaabwa Abrahaamu, samsean ajeakni Lasaaro ghang'uda moanneadannyi jeeda beega, googarbiit ng'ushapteanyu aba gideaba geasawani aba jeedeappeasi.’

²⁵ Gwayeeshsha Abrahaamu, ‘Balleandeanyu, apkaada gideaba ang'iing'i ninyasi haleanjeeda miyaas aba jeeda aweagaagu, nea Lasaaro ghwanyas gea munyas, ak ghamneawa niny geenung' ghahawda, nea ang'iing'i gindi jeeda hang'weanidooda.

²⁶ Nuut gichcha, dageaschedeanya ea agooga ea siyiin ghalalayda haw, aba gideaba fuga gasa ghapka hooweani ondiin ea mayghoammu, nea eara fuga meatkwedeang'wa ea maygoogeaw heeda sindi.’

²⁷ Hean gwayeeshsha, ‘Adabeeda ghweandeanyu, geamuscheey, ajeaksiina fuga ghaheanya,

²⁸ aba gideaba geandeawi orjoogiyya muut, ereekusa amwapka eara saawa hiji bea hang'weanidoodean.’

²⁹ Gwayeeshsha Abrahaamu, ‘Gwandeawa Muusa ea sibanga, nung'waada goolleeysiit saawa.’

³⁰ Hean gwayeeshsha, ‘Manda ghweandeanyu Abrahaamu; inyeeda gabiiksa saawa siida leabu miyeeda, gaygwadukkuuna.’

³¹ Gwayeeshsha niny, ‘Iimealeeysiiniit Muusa ea sibanga, ea mayghamwas eara gabiiksa siida duunna miyeeda.’”