Lukka 15 - NEAJEEDA EESH BEA BUUNEESSEAN

Gisilleanda roat

¹ Eaweechcha gaweesa Fuga ang'ng'oonyi gwaadi ea fuga ring'eega gooleeysiit niny.

² Hean ghoaniikghi Farisayajeega ea ng'oorshoodiga nea gwayi, “Siisi gaguursa fuga ring'eega ak gombuuttooschi.”

³ Hean gwarukusa galeega nea gwayeeshsha,

⁴ “Nii gajea anasihi aba jeedeang'wa mideawa gisil bughala, ama roat agi ea maygwanung'usa heeda giikka was seedaam adamwashshageashiin, ak gawa dareabeetta gagasa diitta roadiin ea ghwanyas?”

⁵ “Amaduuw nea ghwanyas, ghwayiin ghattaannyi nea gahoosan.

⁶ Amaduw nea ghwahitta gheannyi gaguursa fuga duupchi ea fuga ascheayi ak gwayeeshsha, ‘Ahoosaana sea aniini aba gideaba naanyaaschi gisilleandeanyu roat.’

⁷ Asi gwasnu, ak geayeeshshineegwa, gaygwanda hooseaneega muuchchi aba humng'eada appadayda siyagi mideawa ring'eeda ak gwaduukkuna, maygawuurji fukka was seedam ea damwashshageesh doobiiweadi magassa duukkuunoodean.”

Shilingajeanda roat

⁸ “Nii gajea ana gatmu, mideawa shiliingaji damanamughuush, amaroat akkalealla ea maygorabeat gheaboonyaneeda, ak goobuus gheeda ak gagasiischi muuchchi ea ghwaanyasi?

⁹ Amaduw nea ghwanyas gaguursa fuga duupchi ea giischeawdaannyi ak gwayeeshsha, ‘Eehoosana easasean aba gideaba nanyaschi shilingajeandida gwachchi roadiin.’

¹⁰ Asi gwasnu, ak geayeeshshineegwa, gaygahoosan malaykajeega Aseetta appadayda siida assagi mideawa ring'eada iduukkuuna.”

Balleanda roat

¹¹ Hean gwayeeshsha, “Ghayi gwanda siisi mideawa ballooji iyyeenya;

¹² gwayeeshsha damwanang' ghwaan, ‘Bwaabwa, gwalnean haleanjeeda miisean.’ Ng'atta gagwalsa duwaaw halleanjeeda nyaawa.

¹³ Ama miighang'atta eawoojusu saang'a ghang'eat balleanda mwanang' ghwashaayda haleanjeedaannyi sean ak gawa bareannyeekka ea gawa ng'eanyiida sheagi, hitta ghwasaksakta haleanjeedaanyi.

¹⁴ Geeyi bwak ama niduulu haleanjeedaannyi sean ghang'eat geejeeda haw aba ng'eanyiitta, ak eara niny gaba fuga gasa gichcheaghwaak.

¹⁵ Iiduw gawa gadiyeeda aba hichpa siyagi bea ng'eanyiitta, ak ghwanung' siitta gawa madamnyeandaannyi ghoarear ukkurmajeega.

¹⁶ Iiduw Gagasa ghwaak hamitta ak ukkurmajeega ak ea manda siisi adaw gil.

¹⁷ Jeeng'u aba Jeadaannyi gwayi, ‘Gwadeannaan soomjooga agiischi aba ghaheanya, ea ghwalach hamichchoojiga nea aniini gayghabwaran jalooda aba hiji!’

¹⁸ Gaydang'eat dawa heeda ghweandeanyu ak geayeeshshi niny, ‘Bwaabwa neadiiysi humng'eeda ea madeadaang'u;

¹⁹ ak ea mammisean gideaba gajeegureewean jeeptaang'u, nung' dawurji fiisu was soomjoogeaba gheang'uun.’

²⁰ Ghang'eat ak gabiikta heeda ghwaan. Hean nea gudu ea dildeaweat ghoang'wearda ghwaan ama daa ghabwayda ak ghafwach ghwadeapta nea ghwasam gheatta.”

²¹ “Hean gwayeeshsha Balleandida niny, ‘Bwaabwa aniini neadiiysi humng'eeda ea madeadaang'u, mammiisean gideaba gajeegureewean ballandang'u.’

²² Ghwalamda Ghwaan ak gwayeeshsha soomjoogaaschi, ‘Alamwaja ayeanni hang'dida miyyiin ak gookkwealsi, nea gooshshuupchi moonneeda ghuniida nea goolleapsi eara geekka;

²³ ak gooyeadu meaydida riishaadiin ak goonuuschi, eayaaga nea geehoosannyi;

²⁴ aba gideaba balleanji iitteanyuun ghayi nimi, ak ghamneawa ea niduudu; ghayi niroat ak ghamneawa ea sinyas.’ Ak geebiissa eang'ng'eat hooseaneega.”

²⁵ “Abeeda Oorjeadaannyi haw gwanda madamnyeanda, damani duugwandeawa naweeda nea niriiksa gheedean ghwayiiy ghuutta sarmeeda ea deangheeda.

²⁶ Gaguursa soomjeanda ak ghoanyaashta nea gwayeeshsha, ‘Gwandaani hiji?’

²⁷ Geeyeeshsha niny, ‘Nibiigu oorjeeda geamadu ak ea ninuus gweanu meayda riishaat aba gideaba nibiigu nea gudeamajeek.’

²⁸ Ghwanyareas balleandida hawiin, ak ghaheawa gawa ghoah. Iiduw gwaritta ghwaan jarooda ak gamearmearani niny ghwaan ghoah,

²⁹ ak ghwasha nea gwayeeshsha ghwaan, ‘Daa, aniini naaweachcheay gweannyeekka saang'a, nea mwoang'ng'wa danung'waada huumeandaang'u; nea migoonean eara dayeenda ak geahoosannyi sea fuga eaduupcheewi.

³⁰ Ghamneawa nea ghwahidu balleanji iittaang'uun duulu haleanjeedaang'u sea gadeemga hiseadean ginuuksi meayda riishaat!’

³¹ Gwayeeshsha niny, ‘Balleandeanyu, ang'iing'i geendeaydooschi galagasean ak haleanjeeda eandeawi sean ea gaagu.

³² Ak gichcha iisihoosan ghwahit geeng'weala aba gideaba orjeeni bea geamaduun ghayi nimi, ak ghamneawa ea niduudu, ghayi niiroat, ak ea sinyas.’”