Lukka 12 - NEAJEEDA EESH BEA BUUNEESSEAN

Rekusiinda gimmiinnoodeaba geaw

¹ Damandida bwadeewa geat emeeda nyiit sagalamnyoojiga ea goolleabi geadiin hean gwayeeshsha niny ginealangaaschi, “Afura geat aba hamirayda fuga Farisaayajeega was gimmiitunodeaba geadiin.

² Gilinyoo eedukutta gajeanung' ghwadaajiit, ghana dea funyaat jea ea mwajeanal.

³ Eara ng'asheega obalooli aba jeeda misaneeda, gajeayiiy aba heedeesh, nea gea omeang'shi aba ghoorajeega gajearukkwiida aba iheenga ghoorajeega.”

Siida miisa gheawalmeeda

⁴ “Fuga eaduupcheewi, geayeennyi adoawwalli fiisu ammu gwanuus saseedean, ama ng'atta ea manda gil nuut ammu gwasiniin.

⁵ Gaydamiin gheang'deang'wa aba dea jea oawwala, diitta ama nuusiin, ghoammu gwajaksa jeeda duwayda mamissean; asaha geayeennyi oawala niny!

⁶ Neada udabwaraadaji muut meesheahhideawana heelaji iyeenya? Ak ea manda dea jea gwaroosa Aseetta eara akkalealla.

⁷ Eara buudeesu bea iheengeagwean siyiida sean. Asi adoawwalli ng'eang'i, ghoang'waaneewi agooga udabwaradajeega saang'a.”

Masaweega ea gissiheawatta Gristo

⁸ “Ak geayeeshshiineegwa gilinyoo ea siida gil nyoo ghamwasan aba madeeda buuneeda, eara niny gayghamwas Balleanda Siida aba madeeda malaykajeega Aseetta;

⁹ nea siida heawanaan aba madeeda buuneeda gajeaheawa niny aba madeeda malaykajeega Aseetta.

¹⁰ Siida wassean rugu ng'asheega munyas appadayda Balleanda Siida gajeesamsa; nea siida ang'eawi Gurorooda Ghaydiit ea majeesamsa.

¹¹ Ama deeppa eayadeagwa ghooriida sinnealshachcheewa ea fuga ahaaghwa ng'eanyiida ea madeeda gea mideawa gheambalmeeda, ea adoohirbabannyi aba gichchea ashaayda ea ng'asheega jea arukutta;

¹² aba gideaba gayghoanaleagwa Gurorooda Ghaydiit gichchea arukutta aba damandideani.”

Gissigala meanang'oochcheanda dasha

¹³ Ak gwayeeshsha Siyagi aba jeedeaba eemeetta, “Ginealshoochcheanda, rukusiina oorjeeda iyya gagwalnean haleanjeeda jea dahearan.”

¹⁴ Gwayeeshsha niny, “Siida, ghwayiinan ng'eaha doaw siichchea goheeldoscheegwa ghana siida jea gwalakkuneegwa haleanjeeda?”

¹⁵ Ak gwayeeshsha saawa, “Afra geat aba geawunda gheang'da; aba gideaba eaweega siida manda jeeda haleanjeeda saang'a mideawa.”

¹⁶ Gwarukuteawa gwarukusa saawa galeega nea gwayeeshsha, “Ghayi madamnyeamba siisi was meanang'oochcheanda ghwaheas muuchchi;

¹⁷ hean gootteemshi nea gwayi, ‘Gaydasin naaha aba gideaba muttandeawa heechchaadayiin boogeasu?’

¹⁸ Iiduw gwayi, ‘Gaydasindunu: gaydanyarjeaweada gijigoonngeasu ak geasinnyi suuk geahees; ak gaydayiin boogeasu ea haleanjeedeanyu sean.’

¹⁹ Ak gay dayeeshsha geaw, ‘Ea jeedeanyu, ginndeawi haleanjeesaang'a miyaas idiing'deaysi geaw aba gweannyeekka saang'a, fuufa, agiischeena, lesheena, ak gihoosani.’

²⁰ Ak gwayeeshsha Aseetta niny, ‘Rageananeeda! Aweani geegasa eaweegaang'u; abeeda haleanjeeda idiiwusi geaw gay gaba ng'eaha?’”

²¹ Asi nii giduurji siida adiiwwiisa geaw gheaseeda, “Nea meabarursiina gea Aseetta.”

Adeagana geaw Aseetta

²² Hean gwayeeshsha ginealangaaschi, “Asi geayeeshshineegwa, adoodeawiissi eaweegeagwa gajayaaga naah, ea gichchea okkwealana sasanuukkeagwa.

²³ Aba gideaba eaweega ghwalaabwa hoowa hamiitta ak eara saseeda ghwalaabwa hoowa hang'weakka.

²⁴ Ng'ulla udaghuuh: mahissiida nea malachcha, ea mandeawana gijigoonga, ghana gudihoojiga ak ghoarear Aseetta saawa. Ghoang'waneawi agooga muuchchi dariidakka!

²⁵ Ng'eaha aba agooga ammu goodeawiit geaw ak ghoahat geawunda aweagaaschi earea geattinagi?

²⁶ Asi imoammuusi eara ng'asheanda mwanang'; ghwasaan anda gonneayi geat aba ng'asheega suurja.

²⁷ Ang'ulla deakghweeda gidabuwaanda; ea magadiydooschi nea mamanmanna; ak geayeeshshineegwa, eara Sulemaani aba jeeda baruureagaaschi sean miigookkwealsheatta deakghweeni.

²⁸ Asi iyakkwealsheesiindunu Aseetta deakghweeda madameega mida askweareeni ama numuji ea sihisa jeeda duwayda, heappi maygwasinneegwa muuchchi agooga, ea fuga manang'i masawi!

²⁹ Asi adootteawiichchi iheengeagwa aba gassooda gichchea ayaaga ghana gichchea oaleaha.

³⁰ Aba gideaba emoojiga muunda ng'eanyiida gagaaseadayyi haleanjeeni; ak ghwanal Ghweandeang'wa gideaba googasayi.

³¹ Anyoo ghanyi agassa sugoochcheandumeeda Aseetta ak suuh abeeda gajeehheaneegwa.

Meanang'oochcheanduumeeda humng'eeda

³² “Adoabealli agoogeeda ng'ay, aba gideaba gagasa Ghweandeang'wa gideaba gahaguuw gagoneegwa sugoochcheandumeeda.

³³ Ashaayda haleanjeeda ondeawi ak ghoattaydi haleanjeeda sisappa geadi bea ghadooweeda; asissina geat shageeniga mawoosiitta, gheaseeda mayghoashoay aba humng'eeda heeda may gwaneekkiissa mareanghweanda, heeda mayghwaak eara muguyga.

³⁴ Aba gideaba heeda mida gheaseadaang'u heechchea goobiida guroroadaang'u.

Soomjooga ang'wearu

³⁵ “Arada mananuunatkeagwa nea ghoanung' ghwayeat gheaboonyangeagwa,

³⁶ awuurjeewana fuga furda siida haw jea gabiikna nyeangiida, aba gideaba ibiigu ak gagulgul gidaghuut geebay ejeassa.

³⁷ Ghang'wana soomjookka hiitta ghweanda nyaawa nea ghoang'wearuun; aba huumwa geayeeshshineegwa, gaygwaradiischi ak gagoneegwa hamitta, nea gagadiyeeseegwa.

³⁸ Iihidu buguusta eaweeda ghana beashatta, ak ghwahidu nea gwasindunu, abeeda ghang'wana soomjoosu.

³⁹ Asi anala ng'asheanji, gideaba siida bea gheeda inyeeda gayghwanal damanda jea ghwahinna mareanghweanda gayghoang'wearu, mayghamwas gideaba gajeenyarja gheannyi.

⁴⁰ Asi agooga awosa hidaat aba gideaba damanda moorarsiini gayghwahidu Balleanda Siida.”

Soomjeanda doabiiwaat ea dea midoabiiwaat

⁴¹ Gwayeeshsha Betro, “Ng'uttamiida, ng'asheesu igalli geadiin girukuneasa aseasa akghwahidi ghana irukusi eara buuneasean?”

⁴² Hean gwayeeshsha Ng'uttamiida, “Gajea ng'eaha gil was haghweadoochcheanda doabiiwaat biissa ea bwaraawuh, jea ghoahaaghwa gheannyi nea ghoadaw siida haw goombal, ak ghoadaw buuneeda gichcheaghwaak aba damandaanyiin?

⁴³ Ghang'wana soomjeanda jea gabiigu siida haw ak ghwahiitta nea gwasindunuun.

⁴⁴ Aba huumwa geayeeshshineegwa gayghwanung' goombal haleanjeedaannyi sean.

⁴⁵ Ama eeshsha geaw soomjeandida aba jeadaannyi, nishing'da siida haw aba hinnooda, ak ghoang'eat bayiiga soomjeandidean was headiga ea gadeemga, ak gweagiischi nea gwaleeshi ak gaboogit,

⁴⁶ gaygabiigu siitta haw bea soomjeandida eaweeda mararsiina ea damanda mwanala. Gayghwaaga ghoorjooda ak ghwayiin hijagi sea fuga miidobiiweadi.

⁴⁷ Nea soomjeanda nal gidabwariiy siida hawiin ak ea mwang'aabwa geaw nea masna gidasubwariiyiin, gajeabwar muuchchi.

⁴⁸ Nea siitta mwanalaan ak gwasin gida miisa bayiigean, gajeabwar gil mwanang'. Gilinyoo eattaw gasaang'a aba headaannyi gajeegasa gasaang'a nea dea siittaw ghoahaghwa gasaang'a muuchchi, aba headaannyi gajeegasa gasaang'a ea ghwanawda.

Yeesu gweadu dardeayda

⁴⁹ “Aniini ghaawunnyi dajaksa beasta jeeda ng'eanyiida; ak gidabal ea ning'atta giiyeetta!

⁵⁰ Ak gwanda giibattiisanda miisa gideaba gajeeppattiisanan ea eaghus anihiit!

⁵¹ Agooga ghoaghanyi gili awunnyi deadu hoyyoo jeeda ng'eanyiida? Manda, Geayeadu dardeayda;

⁵² ghang'eada ghamneawa aba jeeda gheedassagi gaygwanda fii muut dardaawaat samwagu fuurji iyyeenya nea gafuurji iyyeenya gea assamwagu;

⁵³ gayghwadarda ghweanda ea ballanda ea balleanda ea ghwaan, ak ghwadarda gheamatta ea huda ea huda ea ghamwaat, nea ghwadarda ghamasiyeeda ea gatmooda ballanda ea gatmooda balleanda ea ghamasiyeeda.”

Nalooda damanda

⁵⁴ Ak gwayeeshsha emeeda, “Iyoadaayi shamooghooda aba heeda biyeara, deagheatta gooyeennyi ‘Ghwaan roopta;’ ak ea huumwa gil ghwahidu.

⁵⁵ Inyeessa iighuudu jeammeeda leabu wiilooda ng'eanyiida ghayeawa goyeennyi, ‘Gayghwaraanya daknooda;’ ak gwasa.

⁵⁶ Fuga ammiittu geat! Ghoanalli arukuni giduurji ng'eanyiida ea humng'eeda ak ea moanaldaniin arukuni damani bea ghamneawean?”

Dupcheewana weajoochchandaang'u

⁵⁷ “Ghwasaan anda agooga moammusi alaja girgweageedeang'wa nea gobeayi geadi?

⁵⁸ Aba gideaba ideayeewi siida ahaaktaneey madeeda siida laja girgweaguutka, hiji duu andeewana naweedean ghang'wana goduupchi ada ghwaannyi ea ghoahiittaneey madeeda siida laja girgweaguutka, ak ghwayiinnyi siida laja girgweaguutka geattinga shirikkarajeanda ak gwajakseey shirikkarajeanda ghealooniga.

⁵⁹ Aba humwa geayeeshshineey mayritteawana ghealooniga ea eaghus ea niidaydi helajeanda huydean.”