Lukka 11 - NEAJEEDA EESH BEA BUUNEESSEAN

Yeesu ghoanaal buuneeda mooshta Aseetta

¹ Eaweechcha ghamwaash Yeesu Aseetta, ama ahiit goobearsa ginealaneanagi bea jeeda ginealangaaschi nea gwayeeshsha, “Ng'uttamiida, anaaleasa mooshta Aseetta gawuurji gidanaalda Yohaana ginealangaaschi.”

² Gwayeeshsha saawa, “Iyoamwaashchchi Aseetta goyeennyi, ‘Ghweandeanya gheawungaagu nung' eakghaambiida. Nung' ghwahidu sugoochcheandumeadaang'u.

³ Goaneasa daghwardeanya galeagasean;

⁴ samseasa riing'eagaasa, gawuurji gidasisammiisiindi siida mideawa sileedeanya; ak ea adiigalleassa jeeda simsimda.’”

⁵ Gwayeeshsha saawa, “Gajeang'eaha aba jeedeang'wa mideawa siittuupchi, jea gaweesa bugusteaweeda ak gwayeeshsha, ‘Siideaduupcheewi, nung' dalaajaneey mukkaattaji samwagu;

⁶ aba gideaba nihissean siidi eaduupcheewi ak ea meandeawani gichchea dayiin mwadeadaannyi;’

⁷ ak gaygwaayeeshsha siitta mida gahiin, ‘Adiideawiichchean, sijapchi gidaghuut ak ea sililli sea diibigeasu, mwammuusi dang'eat dagoonnyi gil?’

⁸ Geayeeshshineegwa, mayghang'eat ghoadaw gil earappeadooda duupchiin ak gayghang'eat ghoadayda halanjeasean gasa siisi aba gideaba mabuurnana giidiktiksiinda musooda.

⁹ Ak geayeeshshineegwa, amusischcheena ak Gajeegooneegwa; agassa, ak gajadaaha; agulgula gidaghuut, ak gajejeasseegwa.

¹⁰ Aba gideaba siida wassean musiischi gajeattaw, nea siida gaseadayyi gayghwadaa, nea siida gulgul gidaghuut gajeejeassa.

¹¹ Gajea ana ghwaani, aba jeedeang'wa ama mus balleandaannyi ghweayeanda, ghoadaw ichchibooda;

¹² ghana iimus burung'nyeanda jea ghoadaw udagilba?

¹³ Agooga fuga munyas, iyoanaldunu gichchea oattawda diibigeagwa haleanjeeda miyaas, abeeda Ghweandeang'wa mida humng'eeda mwanala muuchchi ghoadawda Gurorooda Ghaydiit fukka musa ninyiin!”

Yeesu ea Beelsebuuli

¹⁴ Hean goruutta meangeenda manda ghuutta; damanda ritteawa meangeenda, deagheatta gabalool siitta manda ghuuttean, ak ghahamng'eanyi buuneeda.

¹⁵ Hean gwayi buuneeda mwaatkwa, “Gooruutta meangeenda aba uurda Belsebuuli, meangeenda diitta hawiin;”

¹⁶ nea Mwaatkwa, gwasimsim, nea geegasa ghoahiimda gwadeagooda leabu humng'eeda.

¹⁷ Nal gidabaloola jeesinga nyaawa, gwayeeshsha saawa, “Iing'uchchi sugoochcheanduumeemba ng'anyiinagi abeeda sugoochcheandumeeni ea maygahuuweada, nea gheeda dardaawaat gayghoabeada.

¹⁸ Ak eara Shattaani ibalaksa ak gang'uchchi geaw, abeeda sugoochcheandumeedaannyi gaygamajeegiittaan? Ak goorukuttaydiin gideaba aniini gearuutti meangeenda aba uurda Belseebuuli?

¹⁹ Ama iyearuutti meangeenda aba uurda Belsebuuli, diibigeagwa goruuttiideawa ng'eaha? Aba sareani gaygoorgweakseegwa fugeagwa.

²⁰ Ama iyearuutti meangeenda aba uurda Aseetta abeeda ghoanalli gideaba sugoochcheandumeeda Aseetta nihissegwa.

²¹ Gheeda ng'edeeda hoauur, biissa gwandeawa dabitta, iifur gheannyi, halanjeadaannyi sean gaygaba hoyyoo;

²² ak geaghus iiweesa siida burdeawa uurda ak ghabwar ea ghwajoar, abeeda gayghoareat dabittaannyi sean bea ng'uchcheeda, ak gwalakkiisa fugaaschi.

²³ Siida meandeayeewani washteanyu gil, nea dea meaweamuudayeewani goodearriida.

Biiknooda Meang'nyeandeenda muy

²⁴ “Meang'nyeandeenda iiritteawa siida gwaneaydooschi aba ng'eanyiida manda beega gagaseada heechchea gafuufa; raay gwayi, ‘Gaydabiiksa gheenyu ealeabu.’

²⁵ Iihitta ghwadaa nea siippuus ak ea sittamdaam.

²⁶ Iidaaktunu gayghamwaghaada meangeenda ispwa munyasseewa niny muuchchi, ak gaweay goobiida jeedida; ak giibindeaba siitta gajeamuy ea ghwanaawa diitta ghayi bea mwadiin.”

Hoseaneega huumwa

²⁷ Damandida duuw gabaloolean, ghwajaat ghuut gatmu aba jeedeaba emeetta nea gwayeeshsha, “Ghang'wana jeeda jiilneey ea gidinga ireeri!”

²⁸ Hean gwayeeshsha, “Ghang'wana fukka iiy ng'asheega Aseetta nea ghoang'waayiin!”

Gassooda ng'asheega deamdeameadi

²⁹ Iiduw nea nibassa geat emeettuw, gwayeeshsha, “Jeachcheeng'su jeachcheenga munyas gil; gaseadayi gwadeagooda ak ea manda gwadeagooda, jea ehhiimsa geaghus gwadeagooda ghayi bea Yoona.

³⁰ Gida ghayi waseatta Yoona gwadeagooda aba heeda fuga Ninawi, ea gichchea ghoawaatta Balleanda Siida gil aba jeachcheeng'su.

³¹ Gatmooda was sugoochcheanda leabu Wilooda ng'eanyiida biyeara gayghwahidu eaweeda jea ergweaksiina fugeaba jeachcheeng'su ak gaygoorgweaksa; niny gwaleabu heeshsheagi ak ghwaan goleeysiit weaghumeeda Sulemaani, nea hiji ging'ulayi, gwanda dea haweewa Sulemaani.

³² Gay ghapka fuga Ninawi eaweeda girgweaksiindeaba jeachcheeng'su ak gaygoorgweaksa; nea gwaduukkuuna ng'asheega iiyiiy ng'asheega rukkwiisa Yoona, nea ging'ulayi, aba hiji gwanda dea haweewa Yoona.

Gheaboong'nyeanda saseeda

³³ “Manda siida jea ghoayeat gheaboong'nyeanda ak ghwayiin heeda funyaat ghana gwadukteawa dahuuda, iissa geayiin uhuuda ghamarda ak abeeda fuga buwa gah gayghwadaa weeshinda.

³⁴ Gheaboong'nyeanda saseeda gheang'da; gheang'daang'u iimiy abeeda eara saseadaang'u gaygwanda heedeesh; ama abeeda amasnu, abeeda saseadaang'u gwanda jeeda misaneeda.

³⁵ Asi amilmiliitta adiiduw ghoaw weeshinda mida jeadaang'u misaneeda.

³⁶ Asi saseadaang'u sean iimida weeshinda nea manda hiji misana, gaygaweeshiit saseadaang'u sean, gawuurji gilabwaanyi gheaboong'nyeanda aba weeshindaannyi.”

Yeesu ghoahaakta Farisayajeega ea ginealshoodiga deaweeda

³⁷ Damani duugabaloolean, gaguursa siyagi was Farisaayu ghwahidu gheannyi gweagiischi, gawa ak gweagiischi.

³⁸ Ghahamng'eanyi Farisayajeandida iidaa gweagiischi nea miigoohuun geadi.

³⁹ Gwayeeshsha Ng'uttamiida niny, “Agooga Farisayajeega iissa gohhuunnyi badayda bayookta ea dea gweeriida, nea jeesinngeagwa ghwannyiit mareanghumeeda ea munyinnda.

⁴⁰ Fuga dasheahi! Dea sin gea jarooda miidea sin eara geaba jihii?

⁴¹ Asi oattawa haleanjeeda sisappa geadi bea ghadoweeda bea jih; abeeda gayghammiidu haleanjeessean aba heedeang'wa.

⁴² Asi Farisayajeega ashageada! Agooga aba gideaba ghoattaydi aba jeeda gilattamanamughuush bea haleanjeedeang'wa iissa ghoattaydi akkaleala, aba seenga hamuumayga ea sooktayda ea seenga suuk bea nyeanyiida, nea ghoanung'waadi ng'asheega doobiiweadi ea bariinyeega Aseetta; ng'asheesu gammiiseegwa sinooda, nea maroosseegwa ng'asheega suurja.

⁴³ Farisayajeega ashageada! aba gideaba ghoabwariinyi oppitpiidana horgajeega madeeda aba jeeda gealga sinnealshachcheewa nea geekkeattooscheeweegwa aba naada.

⁴⁴ Ashageada! Aba gideaba nowuurjeewi bung'eadinga mwadaajiida, sik badahuukka buuneeda nea mwanala.”

⁴⁵ Ghwasha siyagi aba diinagoodiga ak gwayeeshsha, “Ginealshoochcheanda, iininyaashtunu ea ning'eawweasa eara aseasa.”

⁴⁶ Hean gwayeeshsha, “Eara agooga diinagoodiga ashageada! Aba gideaba goossareenayi buuneeda sareenda meammu easaar, nea agooga ea mwoasadi sareeni eara aba monneenagi.

⁴⁷ Ashageada! Aba gideaba goosnayi bung'eedinga sibanga nea ghweanigeagwa ea fuga ghayi nuus gil.

⁴⁸ Nea agooga gowoschi muushoodiga gideaba ghoamwaschi gadiyeeda ghweanigeagwa, aba gideaba saawa gwanuus, ak goosinnyi agooga bung'eadinga nyaawa.

⁴⁹ Ak gwayi weaghuumeeda Aseetta, ‘Gaydeajeakta sibanga ea giijasoodiga ak gaygwanuuseada mwatkwa nea geesawan,’

⁵⁰ nea foojeanda sibanga sean, geahhiida ghang'eada dea sisna sindeetta ng'eanyiida, ak gajeegasa aba heedeaba jeachcheeng'su,

⁵¹ ghang'eada gihiideayda foojeanda Habiili ea gagul foojeanda Sakkariya, ghayi sinuuksa dageascheeda heeda wagiida ea heeda Ghaydiit. Asi humwa gil geayeeshshineegwa, gajeegasa aba heedeaba jeachcheeng'su.

⁵² Diinagoodiga ashageada! Aba gideaba nogeandi gissittinna gidaghuutta fughareeda, nea agooga ea miyooweayeena gah, nea fuga weay gah eanoakghuumnyi.”

⁵³ Iiduw nea ghabeawa hoowa, gwaneaweesa muuchchi ng'oorshoodiga ea Farisayajeega ak geasassat nea geennyeari ng'asheega saang'a,

⁵⁴ geebassa nea geegasa ng'asheanda ramwasaat jea gwaleabu ghuuttaanyi.