Giidaheechta 9 - NEAJEEDA EESH BEA BUUNEESSEAN

¹ Hean goguul malaykajeandeaba muut durumbeatteadaannyi, ak ghaadaayi ming'weanda ng'adaana humng'eeda ak goobissa badayda ng'eanyiida, ak geattaw gidajea goottina ghuutta shoomanda mammuudeana;

² goottin shoomanda mammuudeana, hean gwarinna aroosta jeedeaba shoomandida, nea gawuurji aroosta duwayda haw, ak ghwanung' gamsaniiti gheang'da aseetta ea humng'eeda aba aroostida bea jeeda shoomandean.

³ Gwarinna jeedeaba aroostida deashamga ak ghapka badayda ng'eanyiida, hean geattaw uurda uurji dea mideawa udagilbajeega ng'eanyiida;

⁴ ak geeyeeshsha adoosawannyi nyeega mida ng'eanyiida ghana gilwassean nyawiish, ghana giliwas geetta geaghus fukka mandeawana giirooraneeda Aseetta aba gheamanuunatka nyaawaan;

⁵ geattaw gheatta jea gwasawana saawa sheah muut, ak ea mii gideaba gaygwanuuseada saawa gil, ak sawanadeeda nyaawa gawuurji siida ghanya Udagilba, iighanya siida.

⁶ Ak eawoojikka gaygagasa buuneeda miyeeda ak ea mayghwanyas; ak gaygagasa miyeeda, ak gaygamng'aw miyeeda aba madeannyaawa.

⁷ Ak sinoodeaba deashamsu gawuurji farasajeega, nea hidaat aba ng'uchcheeda; nea iheenga nyaawa gwanda duguuga uurji shiipka sisna lagheanga meeng'meeng'i; ak gheamanuunaka nyaawa gawuurji gheamanuunaka buuneeda,

⁸ nea buudeega nyaawa gawuurji buudeega gadeemga, nea geeshatka nyaawa gawuurji geeshatka ng'adiida;

⁹ ak daghanuunatka nyaawa gwadiiy igeambooda injilga uurji gharinnyeanda, nea ghuusiga dabiniga nyaawa gawuurji ghuutta muttukajeega, ea farasajeega saang'a weay ng'uchcheeda nea ghwalamwajaada.

¹⁰ Nea gwandeawa shoomng'eega uurji udagilbajeega, ak gaba halaghweenga, ak uurjeenga nyaawa jea gwasawana buuneeda sheemuut gwanda shoomng'eega nyaawa.

¹¹ Ak gwandeawa sugoochcheanda ambal saawa was malaykajeanda shoomanda mammuudeana, ak gheawungaaschi aba iitta fuga Ebraniya geguura Abadooni, nea aba ghuutta Yunaani geeguura Appoliyoni. (nea gideaba habitkweeda).

¹² Asi halootta madeeda ning'atta; ng'ulla, gayghwahidu haloochcheew iyyeenya.

¹³ Hean ghaghuut malaykajeandeaba lah durumbeatteadaannyi, ak ghaayiinyi ghuutta nyaasha jeedeaba gujakkiga assang'wan bea heeda wagiida eyda meang'meang' mida madeeda Aseettean,

¹⁴ nea gwayeeshsha malaykajeandeaba lah mideawa durumbeattiin, “Siksiina malaykajeekka asang'wan sirassa jeedeenda haw suguura Furatiin.”

¹⁵ Hean geesiksa malaykajeekka assan'gwaniin, ghayi sikghuum ea ghwahitta damandideaniin, ea eaweedida ea sheeda, ea gweayda, ak gwanuus buuneeda heeda haw.

¹⁶ Ak monneeda shirikkareeda mida badayda farasajeega ea sagalamnyooji diktam niba sagalamnyoojiga saang'a meammu eyiida; ghaayiinyi monneeda nyaawa.

¹⁷ Nea nii ea gidadaakti farasajeega gil aba gidasihhiimnaan; fuga mida badahuukka gwadiiy igeamboonda oar beasta nea ghabwada oomnatta ea gikkayda, nea iheenga farasajeega gawuurji sea iheenga ng'annyeekka, ak gwarinna ghuusiga nyaawa beasta ea aroosta ea giikkayda.

¹⁸ Aba nii gwanuus buuneeda heeda haw aba dawni, ea aba beasta ea aroosta ea gikkayda rinna ghuusiga nyaawa.

¹⁹ Aba gideaba uurdeaba farasajeesu gwanda ghuusiga nyaawa ea shoomng'eega nyaawa; aba gideaba shoomng'eega nyaawa gawuurji ichchipkeega, nea gwandeawa iheenga, nea inyeessa gaganyeattiida.

²⁰ Nea buuneeda mwaatukwa, mwabwara dawni, ghanyea maduukkuunana aba gadiyoojiga nyaawa sin aba geattinga nyaawa ghana ghwanung'waada ghadoowanda meangeenda ea haleanjeeda mawosa Aseetta sisna lagheanga meang'meang'i ea shiliingajeega ea lagheanga areeri ea lagheaneeda ea geetta, nyooea moammu ghoang'wearda ghana ghwayiiy ghana gaweelweel;

²¹ ak ea maduukkuuna nuusta nyaawa bea buuneeda, ghana beeneetkuumeeda nyaawa, ghana munyasnachcheekka nyaawa ghana gwadishta nyaawa.