Giidaheechta 8 - NEAJEEDA EESH BEA BUUNEESSEAN

Giirooraneedeaba ispwa

¹ Iiduw nea goottin Dayeenda Gisilleanda giirooraneedeaba ispwa, hean gwayi humng'eeda saw gheadi nuwaas.

² Ak ghaadaayi malaykajeandeaba ispwa nea ghamiinaada aba madeeda Aseetta, ak geattaw saawa durumbeataji ispwa.

³ Hean ghwahidu malaykajeanda nuut ak ghamiinaada heeda wagiida, nea gwandeawa dabichcheanda sisna lagheanga meeng'meeng'i simmikkisiinda, ak geattaw hideeda ng'andit saang'a ak googuuyi sea mwoshta Aseetta bea fuga sean ghaydidi appadayda heeda wagiida eyda sisna lagheanga meeng'meeng'i mida madeeda hoorgeeda gheambalmeeda;

⁴ ng'atta gwadiyeada aroosteaba hideetta ng'andidiin sea mooshta Aseetta bea fuga ghaydidiin aba geattinda malaykajeanda ea ghwahitta madeeda Aseetta.

⁵ Iiduw gageanu malaykajeanda dabichcheandida ak ghoannyiit beasta leabu heeda wagiida, ak gwajaksa badayda ng'eanyiida; hean ghwanya nyeashta ea gighweandandeeda humng'eeda, ea nyeashta nea ghoabwaay dadamandeeda, ea sawooda ng'eanyiida.

Durumbeattajeega

⁶ Ng'atta gwasissin geaw malaykajeandeaba ispwa mideawa durumbeattaji ispwa nea gagasa ghaghuut.

⁷ Hean goguul malaykajeanda madeeda, ak ghwahidu roopta lagheanga ea beasta, nea gaguuyi foojeanda, ak goobissa badayda ng'eanyiida; hean ghwaak ng'eanyiida beasta ea eappuut hiji mwanang', ak ghwaak beasta geediga ea ghoabuut suung'ay, nea eara nyeega nyawiiri sean ghwaak beasta.

⁸ Ghaghuut malaykajeandeaba iyyeenya durumbeatteadaannyi, hean geejaksa jeeda basooda giduurji giijeeda haw, nea ghwayeada beasta;

⁹ nea basooda heeda haw ghoaw foojeanda, nea diyeanga heeda haw majeekcheewi mida gameewa aba jeeda basooda, nea maleambajeega hees genyarjeaweada heeda haw.

¹⁰ Ghaghuut malaykajeandeaba samwagu durumbeatteadaannyi, ak ghang'adaana humng'eeda ming'weanda haw, nea ghwayeatta gheaboong'nyeanda, ak goobissa eeniga heeda haw ea gheanyanga eninga mideawa beega.

¹¹ Ak gheawungeaba ming'weandida geguura Ng'weaninda, nea beega heessaang'a gang'weaniidi, ak gameewa fuga saang'a appadaydeaba beesu, aba gideaba sinung' gang'weaniidi.

¹² Ghaghuut malaykajeandeaba ang'wan durumbeatteadaannyi, ak geawwiim gheang'da aseetta heeda haw, ak eara gheang'da sheeda geawwiim heeda haw, ak eara gheanyanga miinga geawwiim heeda haw, ak abeeda uurda nyaawa abwaanya geanung' gamisaniit heeda haw; nea askwearjeanda heeda haw ea madakna, ak gwasnu eara eaweeda heeda haw.

¹³ Hean ghaang'weardi, ak ghaadaayi rabearda ajuur muuchchi, nea ghang'eatta aba bugusta humng'eeda, nea gwayi, “Ashageada, ashageada, dashageada fuga mida badayda ng'eanyiida, damanda jea ghwanyaasha giguleanda nuut nea niriikghta goguul malaykajeega assamwaguun!”