Giidaheechta 7 - NEAJEEDA EESH BEA BUUNEESSEAN

Fii sagalamnyooji bughala ea haradam ea ang'wan bea Israeeli

¹ Iing'atta suu ghaadaayi malaykaji ang'wan nea ghamiinaada aba murdajeega assang'wan bea ng'eanyiida, nea ghwadeal jeammeeda leabu murdajeega assang'wan bea ng'eanyiida, aba gideaba ea mwaghuunna jeammeeda appadayda ng'eanyiida, ghana aba jeeda basooda ghana ghaghuut geetta wassean.

² Ghadaayi malaykajeanda nuut nea gwascheang'na heeda arearuuna aseetta, nea gwandeawa giirooraneeda Aseetta majeek, hean gaguurda aba ghuutta haw ak gaguursa malaykajeegiga assang'wan ghayi siittaw uurda jea gwasawana ng'eanyiida ea basoodean,

³ nea gwayeeshsha, “Adoosawannyi ng'eanyiida ghana basooda ghana geediga, ea eaghus ea siyiinnyi girooraneeda gheamanuunakka soomjooga Aseetteanya.”

⁴ Ghaayiinyi monneeda fuga sirroor, fii sagalamnyooji bughala ea haradam ea ang'wan sirroor, aba giliwas eamwa aba jeeda balloojiga Israeeli,

⁵ gea emeeda Yuuda gerroor fii sagalamnyooji damaniyyeenya, gea emeeda Ruben sagalamnyooji damaniyyeenya, gea emeeda Gaadi sagalamnyooji damaniyyeenya,

⁶ gea emeeda Asheeri sagalamnyooji damaniyyeenya, gea emeeda Naftali sagalamnyooji damaniyyeenya, gea emeeda Manaase sagalamnyooji damaniyyeenya,

⁷ gea emeeda Simon sagalamnyooji damaniyyeenya, gea emeeda Laawi sagalamnyooji damaniyyeenya, gea emeeda Isakkaari sagalamnyooji damaniyyeenya,

⁸ gea emeeda Sabulooni sagalamnyooji damaniyyeenya, gea emeeda Yooseefu sagalamnyooji damaniyyeenya, gea emeeda Beenjamin sagalamnyooji damaniyyeenya sirroor.

Emeettu

⁹ Iing'atta ng'asheesu ghaang'weardi, ak ging'ulayi, ghaadaayi, emeeda saang'a manda siida ammu gwayiida, fuga leabu giliwas daroar ea emoojiga sean ea buuneeda ea iitta nea ghamiinaada aba madeedeaba hoorgeetta bea gheambalmeedean, ea madeeda Dayeenda Gisilleanda, nea gookkwa hang'weakka eashish, nea ghoang'ng'waay damealga milayga aba geattinga nyaawa,

¹⁰ nea goyeawda aba ghuutta haw nea geeyi, “Lealeanooda gaba Aseetteanya apteada aba uhuuda hoorgeeda gheambalmeeda, ea heeda Dayeenda Gisilleanda!”

¹¹ Abeeda malaykajeega sean ghamiinaada aba murdajeega sean bea hoorgeetta bea gheambalmeedean ea dea gweargwa, ea deaba diyeangiga majeekcheewi asang'waniin, ak goobeedeayi ak ghabwada jeesinga ng'eanyi aba madeedeaba hoorgeetta bea gheambalmeedean ak ghaghadoawan Aseetta

¹² nea gwayi, “Amin! Ghawooda ea gigheambiitta ea weaghuumeeda ea badiischooda ea mureeda ea uurda ea hawunda daba Aseetteanya ea ghoaw damanda manda muudeanooda! Amin.”

¹³ Hean gwayeeshshean gweargweenagi, “Fiisu akkeega, akkwa hang'weakka eashish gulng'eanyiin, nea fiisu gwaleabu yeenu?”

¹⁴ Geayeeshshi niny, “Siida mureeda, ginali ang'iing'i.” Hean gwayeeshshean, “Suu fuga leabu jeedeaba sawanadeetta hawiini; ak eanihuun hang'weakka nyaawa geawwi ea ghwanung' gaweeriidi aba foojeanda Dayeenda Gisilleanda.

¹⁵ Ak gwanda madeeda hoorgeeda gheambalmeeda Aseetta, nea gagadiiyeesa askweari ea eawa aba jeedeaba gheannyi sibatta Aseetta; ak ninyeeda apteada aba uhuuda hoorgeeda gheambalmeeda gaygookkwa saawa aba gideaba gwanda hiji.

¹⁶ Ak ea maygudu ghwadaa jalooda, ghana ghwaak muwoash gichcha; ak ea mayghwaak daknooda saawa, ghana gilwas daknooda ng'waan.

¹⁷ Aba gideaba Dayeeneanji bea Gisilleanda mida bugusta hoorgeeda gheambalmeedean gayghoaw jeagiischoochcheanda nyaawa, ak gaygoodoobiiwseegwa gheang'deenda mida beega mideawa eaweega; ak Aseetta gaygoobuus dabeakka sean mida gheanyanga nyaawa.”