Giidaheechta 6 - NEAJEEDA EESH BEA BUUNEESSEAN

Giirooranga

¹ Ng'atta ghaadaayi aba hoowa Dayeenda Gisilleanda nea goottin giirooraneanagi aba jeedeaba gikka as ispwaan, ak ghaayiinyi aba jeedeaba diyeangiga assang'wan majeekcheewiin nea gwayi, aba nyeashta haw uurji gighweendandeeda, “Beenni!”

² Hean ghadaayi, asi ng'ulla faraseedeesh, nea gwanda badaydaannyi siida mideawa ghuweang'da; hean geattaw shiipka, ak gwaritta ak gwajooriischi nea ghwajoar.

³ Iiduw nea goottin girooraneedeaba iyyeenya ghaayiinyi ghuutteaba diyeaydida bea iyyeenya majeegiin nea gwayi, “Beenni!”

⁴ Hean gwardu faraasajeanda nuut, nea areara muuchchi; nea siidida mida badaydean geenung'u gageanda weayda aba badayda ng'eanyiida, ak gwanuusa geat buuneeda; ak niny geattaw bwangeeda haw.

⁵ Iiduw nea goottin giirooraneedeaba samwagu, ghaayiinyi ghuutteaba diyeaydida bea samwaguun majeegiin nea gwayi, “Beenni!” Hean ghaadaayi, ak geang'ulayi faraasajeanda duw, nea siida mida badayda gwandeawa gidasigalla haleanjeeda aba geattindaannyi;

⁶ ghaayiinyi giduurji nyeashta aba bugusteaba diyeangiga majeekcheewi asang'waniin, nea gwayi, “Gweeriida nngano nea gogween iyyeenya sishaaha dinarajanjagi, ea gweeriida riighu bea nnganooyda suguura shayiiri sishaaha dinaari; ak ea adidattasi, nagheeda ea difaayi!”

⁷ Iiduw nea goottin giirooraneedeaba ang'wan, ghaayiinyi ghuutteaba diyeaydida majeek bea ang'waniin nea gwayi, “Beenni!”

⁸ Hean ghaadaayi, ak geang'ulayi, faraseeda mur, nea siida mida badayda ea Miyeeda gil, nea goodeayi Gheeda maloonghajeega; ak geattaw uurda appadayda ng'eanyiida hiji mwanang', ak gwanuus aba bwaanga ea geejeeda ea dauni ea diyeanga ng'weani bea ng'eanyiida.

⁹ Iiduw nea goottin giirooraneedeaba muut, hean ghaadaayi aba jeeda heeda wagiida guroruunatka fukghayi silajada gheatkweakka appadayda Ng'asheanda Aseetta, ak gamuuwwu ng'asheesu;

¹⁰ goojuur aba ghuuttahaw nea geeyi, “Ea Ng'uttamiida ambaliischi, ghaydit bea huumwa, gajeeyi bwak ea ghoaw eeju nea miyargweaksiina ak giwaldi foojeandeanya appadahuukka fuga mida badayda ng'eanyiida?”

¹¹ Ak gaba nii siittaw hang'deesh geaw nea geeyeeshsha anyoo ghanyi afuufa ea gameaji gageawiit, ea gwadeayi monneeda bareanda nyaawa was soomjooga ea fuga duupchi jea enuusta gidaghayi sinuusta saawa.

¹² Iiduw nea ghwajaat giirooraneedeaba lah, ghaadaayi, ak geang'ulayi sawooda haw bea ng'eanyiida; ak gwattuudu gheang'da Aseetta ea gawuurji hang'weakka sisna guniya, nea eara sheeda ghawaar foojeanda,

¹³ nea miinga humng'eeda gang'adeesa badayda ng'eanyiida gawuurji gidiissa gojiroonda shabongheechcheanda haghweagaaschi damanda gooroogeeda nea gooyuuk jeammeeda;

¹⁴ hean genung'u ghwaroat humng'eeda ea gawuurji gittaabooda sumughut, nea gilwas giija ea ng'eanyiida neaweesa beega gajeanung' ghang'amwa heeda mida.

¹⁵ Nea sugoodiga badayda ng'eanyiida ea fuga hees, ea shirikkaarajeega hees ea meanang'oodiga ea gea mideawa uurjeenga, ea gilwas sih, soomjeanda, ea dea abal geaw, hean gafuysageat jeesinga gwaleadinga ea dageascheeda lagheanga gijeega,

¹⁶ hean gaguursa gijeega ea lagheanga nea gwayeeshsha, “Oppeedeayseasa ak ghoafunyeasa aba madeedeaba gheanyangeaba siitta apteada aba uhuuda hoorgeeda gheambalmeedean, ea aba nyarasta Dayeenda gisilleanda;

¹⁷ aba gideaba eaweetta haw bea nyarasta nyaawa nihidu, ak ea ng'eaha gil jea ghoammu ghamiinaada aba madeeda?”