Giidaheechta 5 - NEAJEEDA EESH BEA BUUNEESSEAN

Gittaabu ea Dayeenda Gisilleanda

¹ Hean geadeaksi geattinda dugwa bea siitta apteada aba uhuuda hoorgeeda gheambalmeedean gittaabooda sung'waar jeeda ea badayda, nea siirroor aba giirooran ispwa;

² ghaadaayi malayakajeanda mideawa uurda nea gwarukkwiida ng'asheega aba ghuutta haw, nea gwayi, “Gammiisa ng'eaha gideaba gaygoottin gittaabu ak gwanyarjeaweeda giiroorangaaschi?”

³ Ak ea manda siida aba humng'eeda ghana ng'eanyiida ghana uutta ng'eanyiida ammu goottin gittaabu ghana goong'weersa jeeda,

⁴ hean geayyeawdi muuchchi aba gideaba meadaaha siida miisa giittindeaba gittaaaboani, ghana gong'weersa jeeda.

⁵ Ak gwayeeshshean siyagi aba jeedeaba gweargiga, “Adiyyeawdi; daaha, ng'adiida emeeda Yuuda, was Hawunyeanda Dawdi, niny nijooriischi, ak gaygoottin gittaabu, ea giiroorangaaschi as ispwa.”

⁶ Hean ghaadaayi aba dageascheeda hoorgeetta bea gheambalmeedean ea diyeangiga majeekcheewi assang'waniin ea bugusteaba gweargiga, ghamiinaada Dayeenda Gisilleanda, nea gawuurji gili silach gheatta, nea gaba gujaw ispwa ea gheanyan ispwa, nea Guroruunat ispwa bea Aseetta gil sichcheakta gaweay ng'eanyiissean;

⁷ hean gawa ak gageanda gittaabu aba geattinda dugwa bea siitta apteada aba uhuuda hoorgeeda gheambalmeedean.

⁸ Hean nea gageanu gittaabu ghoabeada diyeangiga assang'wan majeekcheewiin sea gweargiga attiktam ea ang'waniin aba madeeda Dayeenda Gisilleanda, ak gaba nii ang'ng'waay gidondooriida, ea gweeriida sisna lagheanga meeng'meeng'i nea ghwannyiit hideeda ng'andit, was mooshta Aseetta bea fuga ghaydidi;

⁹ hean gwasarman sarmeedeesh, nea gwayi, “Gammiiseey ang'iing'i geannooda gittaabu ak giittin giiroorangaaschi, aba gideaba ghayi gealach ghaattaang'u nea aba foojandaang'u giidaydi leadeeda buuneeda aba heeda Aseetta aba giliwas eamwa ea iitta ea buuneeda ea ng'eanyiida,

¹⁰ ak ginung' ghwanyas sugoochcheandumeeda ea ashoohoodiga aba heeda Aseetteanya, nea saawa gaygoombal ng'eanyiida.”

¹¹ Deagheatta ghang'weardi, ak ghayiinyi aba murdeeda hoorgeeda gheambalmeeda ea dea diyeangiga majeekchewiin ea dea gweargwa ghuusiga malaykajeega saang'a meammu eyiida,

¹² nea geeyi aba ghuutta haw, “Gammiisa Dayeenda Gisilleanda ghayi silach gheatta, ghwanyas uurda ea meanang'oochcheandumeeda ea weaghumeeda ea hawunda ea mureeda ea gigheambiitta ea ghawooda!”

¹³ Ak gilinyoo gwanda humng'eeda ea badayda ng'eanyiida ea uutta ng'eanyiida ea jeeda basooda, ea haleanjeessean mida jeadaannyi, gwayi, “Ghawooda ea mureeda ea gigheambiitta ea giimuusta gwandeawa ninyeeda apteada aba uhuuda hoorgeeda gheambalmeeda ea Dayeenda Gisilleanda ea ghoaw damanda manda muudeanooda!”

¹⁴ Ak gwayi diyeangiga assang'wan majeekcheewiin, “Amin!” ak gobeedeayi gweargwa ak ghaghadoawan.