Giidaheechta 4 - NEAJEEDA EESH BEA BUUNEESSEAN

Ghadoowanda Aseetta aba humng'eeda

¹ Iing'atta ng'asheesu ghang'weardi, ama deagheatta gwanda humng'eeda gidaghuutta jaadaat. Hean ghuutta gwachchi ayiinyi bea madeedean goobaloolan nea ghwanyaashta giguuleanda, nea gwayi, “Beenni hiji, ak gaydahiimneey gichchea ghwahidu iing'atta ng'asheesu.”

² Deagheatta geandi jeeda Gurorooda, hean ghamiinaada hoorgeeda gheambalmeeda aba humng'eeda, nea goopteada siida aba uhuudeaba hoorgeetta bea gheambalmeedean!

³ Nea siida apteadawa uhuuda iisung'ula ghawaar lagheaneda mur ea dea dughwaang, nea hoorgeetta bea gheambalmeedean gwaneaweesa gidaghuweang'da sheagiitka ama sung'ula ea nyawiish.

⁴ Ak gwaneaweesa hoorgeedida bea gheambalmeedean hoorgaji diktam ea ang'wan bea gheambalmeeda, ak ghaadaayi gwearu diktam ea ang'wan, aba uhuudeaba hoorgajeegiga bea gheambalmeedean nea goobiitbiit, nea siikwealsa hang'weakka eashish, nea iheenga nyaawa gwanda shiipka lagheanga meeng'meeng'i.

⁵ Nea heeda hoorgeeda gheambalmeeda iissa gwarinna dadamandeeda, nea ghuusiga ea nyeashta gighweeendandeeda, nea madeeda hoorgeeda gheambalmeeda ghwayeat gheaboonyan ispwa bea beasta, nea guroruunat ispwa bea Aseetta;

⁶ nea madeeda hoorgeeda gheambalmeeda gawuurji gili mida basooda daliil oar giyooh, nea ghameameang'. Nea gwaneaweesa hoorgeeda gheambalmeeda, aba meadajeega sean bea hoorgeeda gheambalmeeda, gwanda diyean ang'wan majeekcheewi, hean ghwanyiit gheanyanga mwadi ea bwadaw:

⁷ diyeayda madeeda majeek gawuurji ng'adiida, nea diyeaydeaba iyyeenya majeek gawuurji heeyda, diyeaydeaba samwagu majeek gwandeawa gheamamda uurji dea siida, nea diyeaydeaba ang'wan majeek gawuurji rabearda ng'eatta.

⁸ Nea diyeanga assang'wan majeekcheewiin, gaba nii bea meang'i lah, hean ghoang'wearu gang'ula meadajeega ea jih, nea askweari ea eawa ghanyea mii ghwanung'waada sarmeeda, “Dea Ghaydit, dea ghaydit, dea ghaydit, Ng'uttamiida was Aseetta Haw uuri, niny dea mida ea dea bean gwanda ea dea jea ghwahidu.”

⁹ Ak ghoadaw diyeanga majeekcheewiin giigheambiitta ea mureeda ea badiischooda ninyeeda apteada aba uhuuda hoorgeeda gheambalmeeda maygoosha, damanda manda muudeanooda,

¹⁰ inyeessa gwearsu was diktam ea ang'waniin goobeedeaysa madeeda siitta apteada aba uhuudeaba hoorgeetta bea gheambalmeedean ak ghaghadoawan ninnyeeda majeek eaghoaw damanda manda muudeanooda; nea gwajaksa shiipka nyaawa madeeda hoorgeetta bea gheambalmeedean, nea gwasarman,

¹¹ “Ng'uttamiideanya was Aseetta gammiiseey ang'iing'i gigheambiitta ea mureeda ea uurda, aba gideaba ghayi gisni haleanjeessean, nea aba gidigassiidi gisni ak goobiida.”