Giidaheechta 3 - NEAJEEDA EESH BEA BUUNEESSEAN

Giijasta wea Sardi

¹ “Heeda malaykajeanda ganiiseeda Sardi ng'waara: ‘Suh ng'asheega ninyeeda mideawa guroruunat ispwa bea Aseetta ea miinga assispwaan gil.’ ‘Ghaanalli gadiyoojigaagu; gideaba gindeawi gheawunga majeeknatta, nea nimeawi.

² Ang'wearni, ak gimajeegi ng'asheega shoada jea gweadu miyeeda, aba gideaba mii dadeaksa gadiyoojigaagu alooheeda aba madeeda Aseetteanyu.

³ Asi apkaada gidaghayi inyasi ea gidaghayi iyiinyi; asi ang'ng'waanya gidida, ak giduukkuuni. Ak iming'wearni gaydahittaayda mareanghweanda, ak ea mwaynala damanda jea dahinna headaang'u.

⁴ Ak gindeawi gheawung'su ng'ay aba ng'eanyiida Sardi, fuga miighang'uda hang'weakka nyaawa ririnyeanda; ak gaydeadeayddooschi saawa nea sishshuubeasa hang'weakka eeshish, aba gideaba gammiisa.’

⁵ “Nea siida jooriischi gajeekwealsa hang'weakka eeshish, ak ea maydeabuus ghawungaaschi aba jeeda gittaabwajeanda eaweega; ak gaydamwas gheawungaaschi aba madeeda Bwaabwa, ea madeeda malaykajeagaaschi.

⁶ Gilinyoo googar iitta, dayiinya ng'asheanji rukusa Gurorooda ganiisajeegean.”

Giijasta wea Filadeelfiya

⁷ “Heeda malaykajeanda ganiiseeda Filadeelfiya ng'waara: ‘Suh ng'asheega siida ghaydit gil assakkalealla, bea huumwa, mideawa gissiittinna gidaghuutta sugoochcheandumeeda Dawdi, siida amattin ea manda siida ammu ghwarat, siida amarat ea manda siida jea goottin.’

⁸ “Aniini ghaanalli gadiyoojigaagu. Ng'ulla, aniini naayiinnyi madeadaang'u gidaghuutta jaadaat, moammu sih ghwarat; aniini ghaanalli gideaba gindeawi uuri mwanang', ea gideaba ging'ng'waannyi ng'asheandeanyu ak ea mii shaang'a gheawungeasu.

⁹ Ng'ulla, gaydanung' ghoaw fukka was gheeda sinnealshachcheewa bea Shattaani eena geawoschi Yahuudi nea mawosa ak gwanaba ng'uyyeegean, ng'ulla, gaydanung' ghapka ak gwatkuy aba madeeda geeshangaagu, ak ghwanal gideaba ghaabwariinyeay.

¹⁰ Aba gideaba ning'ng'waannyi ng'asheandeanyu bea milikghteayda nea gihang'waanyi, ak aniini gaydafurnyi, nea giritti aba damanda simsimda jea gwahissa ng'eanyiisean, ak gwasimsim fuga mida badayda ng'eanyiida.

¹¹ Gaydahidu nea ghaalamwajaannyi; ang'ng'waanya muuchchi gidindeawi, ak ea mooreannyi sih shiipkaagu.

¹² “Siida joorischi gaydanung' ghoaw daraneeda aba jeeda gheeda sibatta Aseetteanyu; ak ea mayghanyi gwaritteawa jeeni, ak gaydang'oorsa badaydaannyi gheawunga Aseetteanyu, ea gheawunga mujineeda Aseetteanyu, nea Yerusaleemooda eeshi, rarang'aana humng'eeda heeda Aseetteanyu, ea gheawungeasu giikka eashishiin.

¹³ Gilinyoo googar iitta, ea dayiinya ng'asheesu rukusa Gurorooda ganiisajeegean.”

Giijasta wea Laodekkiya

¹⁴ “Heeda malaykajeanda ganiseeda Laodekkiya ng'waara: ‘Ng'asheega siida was Amin, was siida doabiiwaat was mushoochcheanda huumwa, was ging'eetta haleanjeessean sin Aseetta.’

¹⁵ “Aniini ghaanalli gadiyoojigaagu: gideaba muwosi garbabu nea muwosi gharaat. Ghang'wana guwosi garbabu ghana wosa gharaat!

¹⁶ Asi, aba gideaba guwosi shang'shang', nea muwosi garbabu ghana wosa gharaat, gaydang'udaneey ak giritteawi ghuutteanyu.

¹⁷ Aba gideaba giyeeni aniini geawoschi meanang'oochcheanda ak ea neabaruurji, ak ea meagassi gil; ak ang'iing'i ea minali gideaba mindeawani uurda, nea guwosi bwarbwar, ak giwosi ng'oaw, nea guwosi dawiish.

¹⁸ Ak gaydayeeshshiineey, shaaha aba heedeanyu lagheanga meeng'meeng'i siihuuna beasta, ak abeeda gaywosa meanang'oochcheanda, nea giikwealli hang'weakka eashish, ak ea meadaaha baspaseega dawiishnattaang'u, ak gaynyasa meajooda jea eashana gheanyangaagu ak abeeda gingweardi.

¹⁹ Fukkeanji abwariinyiin, inyeessa geawoowsi nea ghabwarji; asi milmiliida ak giduukkuuni.

²⁰ Ng'ulla, ghaamiinaadi aba gidaghuut nea geagulgulli; siida jea ghwayiiny ghuutteanyu ak ghwajaat gidaghuut gaydoan headaannyi ak geambuuchcheewi, nea eara niny goombuuchcheewean.

²¹ “Siida jooriischi gaydanung' goopteada nea geendeayi aba uhuuda hoorgeedeanyu bea gheambalmeeda, gawuurji gideajooriischeatti ak geapteadi sea Bwaabwa aba uhuuda hoorgeedaannyi bea gheambalmeeda.

²² Gilinyoo googar iitta, dayiinya ng'asheanji rukusa Gurorooda ganiisajeegean.”