Giidaheechta 22 - NEAJEEDA EESH BEA BUUNEESSEAN

¹ Hean ghoahiimnaan enda beega mideawa eaweega, nea eesh ea ghameang'meang', nea ghwadalalaana hoorgeeda Aseetta ea dea Dayeenda Gisilleanda,

² nea bugusta naweadinga mujiini, earada, meatkwajeega sean bea enda, abeeda gwanda geetta eaweega, mideawa haghweega heeluut damaniyyeenya, nea inyeessa gooruudu haghweagaaschi gilashsheah; nea seengeaba geedi gaba giheapta emoojiga.

³ Ak ea maygutgwanda gilinyoo ea moshteayda gil, nea hoorgeeda gheambalmeeda bea Aseetta ea dea Dayeenda Gisilleanda gaygwanda jeadaannyi, nea soomjoogaaschi gayghoaghadoawan niny,

⁴ ak gayghwadaa gheamamdaannyi, nea gheawungaaschi gaygwanda gheamanunatka nyaawa.

⁵ Ak ea maygutgwanda eaweeda; nea magasa weeshinda gheaboong'nyeanda ghana aseetta aba gideaba Ng'uttamiida was Aseetta gayghoaw weeshinda nyaawa, saawa gaygoombaliischi ea ghoaw damanda manda muudeanooda.

Hinnooda Yeesu

⁶ Hean gwayeeshshinean, “Ng'asheesu ghwadoabiiw ak ea huumwa gil. Nea Ng'uttamiida, was Aseetta bea guroruunatka sibanga, abeeda gaygoojeagu malaykajeandaannyi goohiimsa soomjoagaaschi ng'asheega jea gabean ghwahidu.

⁷ Ak ging'ulayi, gaydahidu nea ghaalamwajaannyi.” Ghang'wana siida ang'ng'waay ng'asheega siramoaran aba jeedeaba gittaaboani.

⁸ Aniini Yohaana ghaayiinyi nea ghaadaayi ng'asheesu. Damandida ayiinyi nea ghaadaayiin, hean geabeedeaysi ng'eanyi ak ghaghadoawannyi aba madeeda malaykajeanda ahiimnaan ng'asheesuun;

⁹ hean gwayeeshshinean, “Adiiduw gisni gitta! Aniini geawoschi soomjeanda sea ang'iing'i sea fuga siduupcheewi was sibanga, ea fukka ang'ng'waay ng'asheegeaba gittaaboaniin. Aghadoawana Aseetta.”

¹⁰ Ak gwayeeshshean, “Adiiroori ng'asheega siramoaran bea gittaaboaniin, aba gideaba damanda nineekkiit.

¹¹ Siida sina ng'asheega munyas daraanya sinooda ng'asheega munyas, dea mideawa ririnyeanda daraanya ririnyeanda, dea doabiiwaat daraanya doobiiwnatta, dea ghaydit ea daraanya ghaydidanda.

¹² Ng'ulla, ghaawunnyi nea ghaalamwajaanyi, nea geayeadu gichchea daadaw siida, ak ghaadawji giliwas sii giduurji gidaghayi sin.

¹³ Aniini geawoschi Alfa ea Omeega, dea madeeda gil ea dea huydean, was dea ging'eetta ea dea huydean.”

¹⁴ Ghang'wana fuga ahuun hang'weakka nyaawa, ak gwandeawa doobiiwnatta jea gaweesiina geetta eaweega ak gaweay jeeda mujiini aba gidaghuudajeagaaschi.

¹⁵ Hoowa bea jaroodean gwanda gudajeega ea beneediga ea fuga hiseada ea fuga nuusa buuneeda ea fuga ghadoawani gidamwawosa aseetta, ea gilinyoo ghabwariiy ng'uyyeega nea gwasin.

¹⁶ “Aniini Yeesu, neajeagu malaykajeandeanyu headaang'u nea gweadu muwwunooni heeda ganisajeega. Aniini geawaschi hawunnyeanda ea jeatta Dawdi, was ming'weandida aboong'u bea muchchuunoodean.”

¹⁷ Ak gwayi Gurorooda ea Sibeeda, “Beenni.” Nea siida ing'shi dayi “Beenni.” Ak doani siida bearji muwooshta, nea dea gasa ea dageanda beega eaweega nea manda sheayeeda.

Ng'asheega huydean

¹⁸ Geereekusi giliwas sii iiyi ramoorangeaba gittaaboani: giliwas sii iyahaat, gaygoheassa Aseetta sawanaduussu surgu aba jeedeaba gittaaboani,

¹⁹ ak giliwas sii igeanda gili aba jeeda ng'asheega siramoar bea gittaaboaniin, gaygageanda Aseetta headaannyi aba jeeda geettida bea eaweegean ea aba jeeda mujiineetta ghaydidiin, surgu ng'asheagaaschi aba jeedeaba gittaaboani.

²⁰ Nea siida muuwwu ng'asheesu gwayi, “Asi aba huumwa ghaawunnyi nea ghaalamwajaanyi.” Amin. Beenni, Ng'uttamiida was Yeesu!

²¹ Gagasa anyasa dagheerjeandumeeda Ng'uttamiida was Yeesu agoogeeni sean owoschi ghaydidiini. Amin.