Giidaheechta 21 - NEAJEEDA EESH BEA BUUNEESSEAN

Humng'eeda Eesh ea Ng'eanyiida Eesh

¹ Hean ghaadaayi humng'eeda eesh ea ng'eanyiida eesh; aba gideaba humng'eeda madeeda ea ng'eanyiida madeeda goolla ghang'atta, ak basooda ea mudugwanda.

² Ak ghaadaayi mujiineeda ghaydit, was Yerusaleemooda eesh, nea ghwararang'aana humng'eeda heeda Aseetta, nea hidaat gawuurji sibeeda siittaamdaam aba siyeeda;

³ hean ghaayiinyi ghuutta haw nyaasha heeda hoorgeedida bea gheambalmeedean nea gwayi, “Ng'ulla, giibinda Aseetta gwandeayi sea buuneeda. Ak gaygwasin giibindaannyi sea saawa, ak gayghoaw fugaaschi ak Aseetta niny gaygwandeayi sea saawa;

⁴ ak gaygoobuus giliwas dabeakka aba gheanyanga nyaawa, ak ea maygudu gwanda miyeeda, ghana giiseaneega ghana shookka ghana sawanadeeda, maygutgwanda aba gideaba, ng'asheega madeeda goolla ghang'atta.”

⁵ Ng'atta gwayi siitta apteada aba badayda hoorgeeda gheambalmeedean, “Ng'ulla, gaydanung'u gaweeriidi haleanjeessean.” Ak gwayi gichcha, “Ng'waara ng'asheesu, aba gideaba ng'asheesu doobiiwanatta gil ak ea huumwa.”

⁶ Ak gwayeeshinean, “Nisa! Gideaba Aniini geawoschi Alfa ea Omeega, ging'eetta ea huydeanda. Siida bearji muwoosh gaydaadaw mwadaagha beega leabu gheang'deenda mideawa eaweega.

⁷ Nea dea jooriischi gaygwahearan haleanjeeni, ak gaydoaw Aseettaannyi nea niny gayghoaw balleandeanyu.

⁸ Ak gea giyoonnyi, ea gea mandeawana masaweega, ea gea ririnnyeanda, ea gea nuusa buuneeda, ea gea hiseada, ea beeneediga, ea gea gadoowani gida mawosa aseetta, ea gea naba ng'uyyeega sean, heennyaawa jeeda basooda yeada beasta gil ea giikkayda, nea nii ea miyeedeaba iyyeenya.”

Yerusaleemooda eesh

⁹ Hean ghwahidu malaykajeanjagi bea jeedeaba giikka as ispwaan nea gwandeawa gweeraji ispwa nyiit sawanaduut ispwa huydean ak goobaloolan, nea gwayi, “Beenni hiji, ak gaydaahiimneeyi sibeeda, was gatmooda Dayeenda Gisilleanda.”

¹⁰ Hit ghwaadan aba Gurorooda ea ghoahiitanaan giijeeda haw, geaw, ak ghoahiimnaan mujineeda ghaydit was Yerusaleemu nea ghwararang'aana humng'eeda heeda Aseetta,

¹¹ nea gwandeawa giigheambiitta Aseetta, ak weeshindaannyi gawuurji lagheaneeda haw sheayeat, gawurji lagheaneeda mur, ak ea miyaas nea ghameang'meang',

¹² abeeda gwanda ghamarda haw, geaw, mideawa ghuusi damaniyyeenya, ak gidaghuudajeesu gwanda malaykaji damaniyyeenya, nea gidaghuudajeesu ea sing'oorsa gheawunga emooji damaniyyeenya was balloojiga Israeeli;

¹³ meatkweeda ghayeawa gwanda gidaghuudaji samwagu, wilooda ng'eanyiida ghayeawa gwanda gidaghuudaji samwagu, wilooda ng'eanyiida biyeara gidaghuudaji samwagu, heeda biyeara gwanda gidaghuudaji samwagu.

¹⁴ Ak ghamarda mujiini abeeda gwandeawa sindeechcheewi damaniyyeenya, ak badaydeaba sindeechcheekkiga gwanda gheawun damaniyyeenya bea giijasoodikka attamaniyyeeenya bea Dayeenda Gisilleandean.

¹⁵ Nea siitta abaloolaniin abeeda gwandeawa bileangida sisna lagheanga meeng'meeng'i, jea goodeena mujiineedida ea gidaghuudajeegaaschi ea ghamarda.

¹⁶ Nea mujiinean gooyang'deayyi meadajeega sean, nea geawundaannyi gooyang'deayyi sea baraknatta; ak goodean mujiini aba bileangidaannyi, gilomittaji sagalamnyooji iyyeenya ea bughalaji ang'wan; nea geawunda ea baraknatta ea geawunda gal humng'eeda gooyang'deayyi.

¹⁷ Hean goodeen eara ghamardaannyi, ak ghwanyas geattin bughala ea haradam ea ang'wan aba gidadeeniida buuneeda nea diitta ea malaykajeanda gil.

¹⁸ Ak ghamardida geadeasa lagheang'su murjeewi, ak mujiineedida geesna lagheanga meeng'meeng'i miyaas nea ghawaar giyoo.

¹⁹ Nea sindeechcheekka ghamarda mujiini abeeda siittaamdaamwa aba giliwas laghaana haw sheayeat; dea madeeda ea mur, deabiyyeenya gameaji ea oomu, deaba samwagu ea ng'oreadi, deaba ang'wan ea nyawiish,

²⁰ nea deaba muut ea bwaash, nea deaba lah aareara, nea deaba ispwa gameaji anyawiish, nea deaba sis ea booshcheanda, nea deaba shageash ghawaar booreega, nea deaba damanamughuush gameaji ghawaar booreega, deaba damwanagi ea dughwaang, deaba damaniyyeenya ea oomu.

²¹ Ak gidaghuudajeekka attamaniyyeenyean gwanda sageek damaniyyeenya, gilinyoo ea gidaghuut gil gwanda sageeyeanjagi, nea naweeda mujiini ea lagheanga meeng'meeng'i miyaas sing'ng'weerdaawa uurji giyoohi.

²² Ak ea mwaadaahi, gheeda sibatta Aseetta aba mujiini, aba gideaba gheennyaawa sibatta Aseetta Ng'uttamiida was Aseetta Hoauur ea Dayeenda Gisilleanda.

²³ Ak mujiineedida ea magassa gideaba gayghoobwaay aseetta ghana sheeda, aba gideaba giigheambiitta Aseetta weeshindaannyi, ak gheaboong'nyeandaannyi ea Dayeenda Gisilleanda gil.

²⁴ Aba gideaba weeshindaannyi gaygwaneayeewa emoojiga jeeda; ak sugoodiga ng'eanyiida gaygweadu giigheambiitta nyaawa jeadaannyi,

²⁵ ak gidaghuudajeegaaschi ea mwajearat askweari earahay, aba gideaba jeani manda eaweeda;

²⁶ ak saawa gaygweadu jeannyaawa giigheambiitta ea mureeda emoojiga.

²⁷ Nea jeadaannyi ghanyea maygawa gidamuy, ghana deasina ng'asheega munyas ghana gea ng'uyyeega, geaghus giikka sing'oorsa jeeda gittaabooda eaweega bea Dayeenda Gisilleandean.