Giidaheechta 20 - NEAJEEDA EESH BEA BUUNEESSEAN

Gweannyeew sagalam

¹ Hean ghaadaayi malaykajeanda nea ghwararang'aana humng'eeda, nea ghoang'ng'waanya geadi gidasiittinna shoomanda mammuudeana ea munyaloalajeanda haw.

² Ak ghoang'ng'waay ichchibooda was ichchiboodida bea garayiin was meang'nyeandeenda ea Shattaani, ak ghwarada gweanyeew sagalama,

³ ak gwajaksa niny jeeda shoomanda, hean gwadukuta ak ghwayiin giroraneeda badaydaannyi, aba gideaba maygabiikta gichcha gwareengani emoojiga, ea ghang'atta gweannyeew sagalama. Amang'atta hiji gajeettin gilinuwaas.

⁴ Hean ghaadaayi hoorgajeega gheambalmeeda, nea goobiitbiida badahuukka fuga jea goorgweach. Ak ghaadaayi guroruunatka fuga ghayi silajaada gheatkweaka aba badayda muwunnooda Yeesu ea appadayda ng'asheanda Aseetta, ea giikka ghayi mii ghaghadoawan diyeaydideaniin ghana gitta sirattiidean nea miighwanyas giroraneadaannyi aba gheamamuuunatka nyaawa, ghana geattinga nyaawa. Ak gwaduuttu, ak goombaliischi sea Gristo gweannyeew sagalam.

⁵ Ak muscheekkiga siippuudiin ea mabiikta gwaduuttu ea ghang'atta gweannyeew sagalam. Nii duunooda madeeda gil.

⁶ Ghang'wana nea ghaydit siida mida jeeda duunnooda madeeda! Appadahuukkeaba fiisu miyeedeaba iyyeenya manda uurda ak gayghoaw ashoohoodiga Aseetta ea gea Gristo, ak gaygoombaliischi sea niny gweannyeew sagalam.

Yoorda Shattaani

⁷ Ak iyasha gweannyeew sagalama, gajeettin Shattaani gwarinna ghealoonigaaschi

⁸ ak gayghwahidu ak gwareengani emoojiga mida murdajeega assang'wan bea ng'eanyiida, ak ea, Googu gil ea Magoogu, ak ghoawaam saawa aba ng'uchcheeda; nea monneeda nyaawa gwadeenna iseaskweanda basooda.

⁹ Hean ghwascheang'da gaweay badayda ng'eanyiida ak geneaweesa gealga fuga ghaydidi ea mujiineetta subwariiyiin; hean ghwararang'aan beasta leabu humng'eeda ak ghwaak saawa,

¹⁰ ak geejaksa meang'nyeandida reengani saawaan jeeda basooda beasta ea giikkayda heeda mida diyeaydida ea sibaneeda ng'uyyeega, ak gajeesawan askweari ea eawa ea ghoaw damanda manda muudeanooda.

Girgweaksiinda huydean

¹¹ Hean ghaadaayi hoorgeeda haw eesh bea gheambalmeeda ea siida apteadawa uhuuda; nea madeadaannyi gamng'aw ng'eanyiida ea humng'eeda, ak ea meadaaha heeda jea goobiida.

¹² Hean ghaadaayi fuga nimeewa, gea hees ea gea manang'i, nea ghamiinaada aba madeeda hoorgeeda gheambalmeeda, hean geettin gittaabwajeega. Ak geettin gittaabwajeanda nuut, nea gittaabooda eaweega gil. Ak geergweaksa fukka nimeewean aba ng'asheega sing'oorsa jeedeaba gittaabajeekka, giduurji gidaghayi nisin.

¹³ Gooruudu basooda fuga nimeewa mida jeadaannyi, ak gooruudu miyeeda ea Gheeda maloonghajeega fuga nimeewa mida jeadaannyi, ak geergweaksiina sean gidaghayi nisin.

¹⁴ Hean geejaksa miyeeda ea Gheeda maloonghajeega jeedeaba basoodida bea beastean. Nea nii ea miyeedeaba iyyeenya gil, basooni bea beastean;

¹⁵ Ak gilwas sih iimiyeeng'oorsa gheawungaaschi jeeda gittaabooda eaweega, hean geejaksa jeedeaba basoodida bea beastean.