Giidaheechta 2 - NEAJEEDA EESH BEA BUUNEESSEAN

Giijasta wea Efeeso

¹ “Heeda malaykajeanda ganiiseeda Efeeso ng'waara, ‘Ng'asheega ninyeeda mideawa miinga assispwa aba geattindaannyi bea dugwa nea gwaneayeewa dageascheeda hoorgaji ispwa bea gheaboonyanga meeng'meeng'i.

² Aniini ghaanalli gadiyoojigaagu, ea sawanadeadaang'u ea milikghteaydaang'u nea giihang'waanyi, ea gidamiimmuustani milikghta fuga munyas iissa ginyoo ghanyi sima fukka guura geat giijasoodiga nea mawosean, ak gidaahi gideaba gaba ng'uyya;

³ ak ghaanalli gihang'ooydaang'u nea gimilikghti nea gidiing'di gheawungeasu, ak ghanyea mii bura.

⁴ Ak geandeawi ng'ashaan appadaydaang'u, bea gideaba ninung'wi heeda bariinyeegaagu bea mwadi.

⁵ Asi apkaada gidabwaanyi, ak giduukkuuni ak gibiiksi gadiyoojiga ghayi isni bea madeeda. Ak imisni, gaydahidu headaang'u, ak gaydageanda hoorgeeda gheaboonyaneedaang'u aba heeda mida, ea eaghus duukkuunana.

⁶ Ak gindeawi ng'asheanji gideaba gisti gadiyoojiga fuga Nikolayi, ak eara aniini ghaasichi.

⁷ Gilinyoo googar iitta, dayiinya ng'asheanji rukusa Gurorooda ganiisajeegean. Nea dea jooriischi gaydanung' ghwaak haghweega geetta eaweega, mida jeeda madamnyeanda mwanang' bea Aseettean.’”

Giijasta wea Simirna

⁸ “Heeda malaykajeanda ganiiseeda Smirna ng'waara, ‘Ng'asheega madeeda ea dea huydean, was dea ghayi meah ak gabiikta gamajeegiit.

⁹ Ghaanalli sawanadeadaang'u ea barbarandaang'u, (ak guwosi meanang'oochcheanda), ak ghaanalli eara ging'weakeaba fiisu eena geewochi fuga Yahuudi nea mawosean, nea saawa ea ghooriida sinnealshachcheewa bea Shattaani.

¹⁰ Asi adiiwali ng'asheega jea nyasa was sawanadeeda. Ng'ulla, meang'nyeandeenda niriikghta gwahisa buuneeda mwaatkwa mida jeedeang'wa ghealooniga, ak abeeda gesimsimeegwa, ak aba jeemba askweajooji damanamughuush gajanyasa sawanadeeda. Wosa doabiiwaat ea hitta miyeeda, ak gaydagoonnyi shiipka mideawa eaweega.’”

¹¹ “Siida agar iitta, dayiinya ng'asheanji rukusa Gurorooda ganiisajeegean. Nea dea jooriischi ea mayghwanyas sawanadeeda miyeedeaba iyyeenya.”

Giijasta wea Bergaamu

¹² “Heeda malaykajeanda ganiiseeda Bergamo ng'waara: ‘Suu ng'asheega dea mideawa bwaangeeda ng'aniip meadajeega duwaawi.’

¹³ “Ghaanalli heediibiitti, heeda mida hoorgeeda gheambalmeeda Shattaani gil; ak ang'iing'i ea ning'waanyi muuchchi gheawungeasu, ak ea mii heawana masaweegeasu eara damandida bea Antiippa was muuwshoocheandeanyuun, was siideanyu doabiiwaat, sinuuksa bugusteang'wa, was heeda abiitta Shattaaniin.

¹⁴ Ak geandeawi ng'asheesu ng'ay appadaydaang'u: gideaba gindeawi fiisu ng'ay aba hoowa aat geeshta ginealshooda Balaamu, niny ghayi ghoanaal Balakki ak gwaruusa balloojiga Israeeli ak ghwanung' ghwaak hamichchoojiga siyaat lukghumajeega siittaw haleanjeeda mawosa Aseetta ea biissa mealuleega.

¹⁵ Ak eara ang'iing'i gindeawi fuga aat geeshta ginealshooda fuga Nikkoolayi.

¹⁶ Asi duukkuunana. Nea iimiduukkuunani, gaydahidu headaang'u nea ghalamwajaannyi ak gaydang'uchchi saawa aba bwaangeeda leabu ghuutteanyu.

¹⁷ “Gilinyoo googar iitta, dayiinya ng'asheanji rukusa Gurorooda ganiisajeegean. Nea siida jooriischi gaydaadaw hamitta suguura maana ghayi sifuy ak gaydaadaw lagheaneedeesh, ak badaydeaba lagheanean geeng'oorsa gheawunga eashish, mwanala siih geaghus siitta ang'ng'waayiin.”

Giijasta wea Diyattira

¹⁸ “Heeda malaykajeanda ganiiseeda Diyattira ng'waara: ‘Ng'asheega Balleanda Aseetta, bea gheanyanga oar ng'ushapta beasta, ak geeshangaaschi gawuurji lagheaneeda mur sisiy muuchchi.’

¹⁹ Ghaanalli gadiyoojigaagu, ea bariinyeegaagu ea masaweegaagu ea gidigadiyeatti ea milikghteaydaang'u nea giihang'waanyi, ak gichcha gadiyoojigaagu huydean ghangal gea ghayi bea madeeda.

²⁰ Ak geandeawi ng'ashaan appadaydaang'u, bea gideaba ang'iing'i gimilikghti gatmoodida suguura Yesebeeliin, guura geaw sibaneeda ak ghoareatta soomjoogeasu ak ghoanaal mealuuleega nea ghwaak haleanjeeda siyaat lukdhumajeega siittaw gidamawosa Aseettean.

²¹ Ak ea naadawji gheatta gwaduukkuuna, ak ghaheawa duukkuunooda mealuuleegaaschi.

²² Ng'ulla, gaydayiin gatmoodida muunda aba miyeanda, nea fukka jea gamealuul sea ninyiin gaydadaw sawanadeeda haw, ea eaghus gwaduukkuuna ng'asheega sina;

²³ ak gaydabwar diibigaaschi gameewa. Ak gayghwanal ganiisajeega sean gideaba aniini geawoschi siida sikkiideawa fughareenga ea guroruunatka, ak gaba siisi adawji aba jeedeang'wa gitteaschi sea gadiyoojigeagwa.”

²⁴ “Nea fuga mida jeedeang'wa aba ng'eanyiida Diyattira, was fuga moang'ng'waanya ginealshooniin, fuga mwanala gidaguura buuneeda mwaatkwa haleanjeeda sheagi jih bea Shattaani, aba heedeang'wa gaydayi, mwaydayiin badahuukkeagwa sareenda nuut;

²⁵ ghusa ging'ng'ooyda gidindeawi, ea dahidu.

²⁶ Nea siida jooriischi ak ghoang'ng'waay gadiyoojigeasu ea ghwahitta huydeanda, gaydanung' goombal fuga emoojiga,

²⁷ ak gayghoohaaghwiida saawa bileangida gharinnyeanda, gawuurji gidiissa ghwanyarda haleanjeeda sisna sigeeda ak ghoaw banajanga, gwasnu earaniini naanyaschi uurda leabu heeda Bwaabwa;

²⁸ ak gaydaadaw ming'weandida bea muchchuunoodean.

²⁹ Gilinyoo googar iitta, dayiinya ng'asheanji rukusa Gurorooda ganiisajeegean.”