Giidaheechta 19 - NEAJEEDA EESH BEA BUUNEESSEAN

¹ Ng'atta ng'asheesu ghaayiinyi ghuutta haw uurji dea emeeda saang'a aba humng'eeda, nea gwayi, “Haleeluuya! Lealeanooda ea giigheambiitta ea uurda gaba Aseetteanya,

² aba gideaba girgweageadaannyi dea huumwa gil nea doabiiwaat; aba gideaba nirgweaksa hiseadaydida hawiin ghayi datas ng'eanyiida aba hiseadayeandumeandaannyiin, ak ea niwalda appadaydaannyi foojeanda soomjoogaaschi.”

³ Geebiikta gichcha echchuur nea geeyi, “Haleluuya! Aroosta leabu heedeaba gatmoodida gwadiyeada ea ghoaw damanda manda muudeanooda.”

⁴ Nea gweargiga at diktam ea ang'waniin sea diyeangiga assang'wan majeekcheewiin goobeedeayi ak ghoaghadoawan Aseetta apteada appadayda hoorgeeda gheambalmeeda nea gwayi, “Amin. Haleluuya!”

Ghweelmeeda nyeangiida Dayeenda Gisilleanda

⁵ Hean gwarinna ghuutta nyaasha jeedeaba hoorgeetta bea gheambalmeedean nea gwayi, “Edumsheesiina Aseetteanya, agoogeani sean owaschi soomjoagaaschiin, agoogeeni owalli gheang'daanyiin, was gea manang'i ea gea hees.”

⁶ Hean ghaayiinyi ghuutta uurji dea emeetuw, ak ghwanyaashta ghuutta beega saang'a ak gabiissa ghwanyaashta dea gighweandandeeda haw nea gwayi, “Haleluuya! Aba gideaba Ng'uttamiida was Aseetteanya Hoauur nimbaliischi.

⁷ Asi ehoosana nea geeng'weelayi nea geattawji gigheambiitta, aba gideaba geeshshooda Dayeenda Gisilleanda nihidu, ak eara gatmoadaannyi ea nisissin geaw ea ghwahit;

⁸ ak ea sikwealsa hang'weakka miyaas bumbuni, meang'meang' nea miyaas,” aba gideaba hang'weakka miyaas sinaweega doabiiw bea fuga ghaydidi gil.

⁹ Hean gwayeeshshean malaykajeanda, “Ng'waara ng'asheesu: Ghang'wana fukka suguursa hamitta geshshooda Dayeenda Gisilleandean.” Ak gwayeeshshinean, “Suu ng'asheega huumwa bea Aseetta.”

¹⁰ Ak geabeedeaysi madeeda geeshangaaschi ak ghaaghadoowannyi niny hean gwayeeshshinean, “Adiiduw gisni ng'asheesu! Aniini geawoschi soomjeanda sea ang'iing'i sea fuga iduupcheewi mideawa muuwunooda Yeesu. Ghadoawana Aseetta.” Aba gideaba muuwunooda Yeesu gurorooda sibaneandumeeda.

Siida mida uhuuda Faraseeda eesh

¹¹ Hean ghaadaayi nea ghwajaada humng'eeda, ak ghaadaayi, faraseedeesh! Nea gwanda badaydaannyi siida suguura Doobiiwnatta ea Huumwa, ak niny aba doobiiwnatta goorgweaksa nea gwasin ng'uchcheeda.

¹² Ak gheanyangaaschi gawuurji ngu'shapta beasta, ak uhuudaannyi gwanda shiipka saang'a; ak gheawunga sung'waar mwanala eara sih geaghus niny.

¹³ Ak niny ea sikwealsa hang'da sing'uda foojeanda, ak gheawungaaschi geeguura Ng'asheanda Aseetta.

¹⁴ Nea ghwaat geeshta Lugooda humng'eeda, nea gookkwa hang'weakka bumbuni, eashis nea miyaas, ak ghwaat geeshta farasajeega eeshish.

¹⁵ Ak gwarinna bwaangeeda ng'aniip ghuuttaannyi jea ghabwara emoojiga, ak gayghoahaaghwiida saawa bileangida gharinyeanda; nea niny ghoallapta ng'eanyi shoomanda difaayeeda bea nyarasta haw bea Aseetta Hoauur.

¹⁶ Ak badayda hang'daannyi ea gibeestaannyi geeng'oorsa, gheawunga Sugoochcheanda sugoodiga ea Ng'uttamiida ng'uttamoojiga.

¹⁷ Hean ghaadaayi malaykajeanda nea ghamiinaada aba badayda aseetta, nea goojuur aba ghuutta haw nea gwayeeshsha dariidakka ng'eatng'eatta aba bugusta humng'eeda, “Apkaani, abwada geat aba ghweelmeeda haw bea Aseetta,

¹⁸ ak ghoayaaji sasanuukka sugoodiga, ea sasanuukka shirikkaarajeega hees, ea sasanuukka fuga mideawa uurjeenga, ea sasanuukka farasajeega ea gea fuga ding'da, ea sasanuukka buuneessean, sea siida abal geaw ea ging'ng'oonyaneeda, dea mwanang' ea dea haw.”

¹⁹ Hean ghaadaayi diyeayda ea sugoodiga ng'eanyiida ea shirikkaarajeega nyaawa nea ghabwat geat nea gagasa gang'uchchi sea siitta apteada aba badayda farasin sea shirikkaareadaannyi.

²⁰ Hean geang'ng'waay diyeaydida, sea sibaneeda ng'uyyeega ghayi sina gwadeagwajeega ammadeadaannyi, ak gwareengani fukkeanji ghayi ning'ng'waay giirooraneedeaba diyeaydida ea fukka ghadoawan gidasirattiida ninyiin. Hean geejaksa suu assiyyeenyean jeeda basooda beasta nea majeekcheewi ak ghwaak beasta ea giikkayda.

²¹ Ak giikka sippuudiin geenuseadawa bwaangeedeaba siitta apteada aba badayda faraasiin, aba bwaangeeda rinna ghuuttaannyi; hean gwalang'u dariidakka sean aba banyeega nyaawa.