Giidaheechta 18 - NEAJEEDA EESH BEA BUUNEESSEAN

Giibeedeayda Babelooni

¹ Iing'atta suu ghaadaayi malaykajeanda nuut nea ghwararang'aana humng'eeda, nea gwandeawa gheambalmeeda haw; ak ghoabwaay ng'eanyiida gigheambiittaannyi.

² Hean gaguurda aba nyeashta haw nea gwayi, “Niibeadi, niibeadi Babelooneeda haw! Niwosi heeda jea goobiida meang'ngeenda, ak ea heeda abiitta gilinyoo ea gurorooda muyi, ea heeda abiitta gilinyoo ea dariideanda muyi;

³ aba gideaba emoojiga sean nili difaayeeda ng'asheagaaschi munyas gaseadayyi, ak eara sugoodiga ng'eanyiida nihiseada sea niny, nea fuga ageakshi bea ng'eanyiida ea ninyas meanang'oochcheandumeeda aba uurda hiseadayeandumeadaannyi.”

⁴ Hean ghayiinyi ghuutta nuut nyaasha humng'eeda nea gwayi, “Aritteawana headaannyi, fugeasu, adooguuyeewi ring'eedaannyi, adiiduw ghoanyaschi sawanaduutkaaschi;

⁵ aba gideaba ring'eadaannyi sijip ea ghwahitta humng'eeda, ak eanipkaat ng'asheagaaschi munyas Aseetta.

⁶ Oattawa siida gidagoneegwa niny, ak ghoattawji niny niba iyyeenya aba sinaweagaaschi; Okkuuyeena nibiyyeenya aba badaydeaba niny aba jeeda bayookta aguuyeesa niny.

⁷ Aba gidaghambiitta geaw niny nea gwanda jeeda hiseadayeandumeeda, ottawa niny gheadeendida was sawanadeeda ea giiseaneegean. Aba gideaba gwayi niny aba jeadaannyi, ‘Neapteadi sugoochcheanda was gatmooda nea meawosi masinung'weanda, ak ea maydadaa giiseaneega,’

⁸ aba gideaba sawanaduutkaaschi gayghwahidu eaweechanjagi, miyeeda ea giiseaneega ea jalooda, nea niny gajeenung' ghwaak beasta; aba gideaba Ng'uttamiida was Aseetta gwandeawa uurda ak gaygoorgweaksa niny.”

⁹ Nea sugoodiga ng'eanyiida, hiseada abeeda gwahiseada sea niny, gaygooyeawda nea gaguuttu heareega appadaydeaba niny iidaa aroosta beasta sighwardaawa niny;

¹⁰ ak gayghamiinaada nea sheagi, aba muwda sawanadeadaannyi, nea gwayi, “Eamuy daannyi! eamuy daannyi! mujiineetta hawiin, mujiineeda Babelooni mideawa uurda! Aba gideaba jeemba aseadeenagi gayghwahidu girgweaksiindaang'u.”

¹¹ Ak fuga ageakshachi bea ng'eanyiida gaygooyeawda nea gaguut heareega appadaydaannyi aba gideaba manda siida jea gutghwasha haleanjeannyaawa,

¹² haleanjeeda sisna lagheanga meeng'meeng'i, ea lappiya, ea lagheanga hees sheayeat ea sageekka, ea hang'weakka miyaas bumbuni, gea oomng'i ea gea buudeega ea gea areeri, ea geetta hideeda, ea gilinyoo ea dabichcheanda sisna gujaweeda gil, ea gilinyoo ea dabichcheanda geetta haw sheayeat gil, ea dea gharinyeanda areara, ea gharinyeanda ea lagheanga suguura marumaru,

¹³ ea geetta ng'andit suguura mdalasiini, ea geediga ng'andidi siyiina jeeda nyeanyiida, ea hideeda ng'andit, ea nagheeda ng'andit, hideeda ng'andit bea dumbeecheanda, ea difaayi, ea nagheeda, ea dearanga miyaas bea ngano, ea dugwa ea gisilga, ea farasajeega, ea muttukwajeega, ea ging'ng'oonyanga, nea guroruunatka buuneeda.

¹⁴ “Haghweega bwariiy jeadaang'u ninung'useey heeda, ea hamichchoojigaagu ibwariinyi ea haleanjeeda miyeenooda nirooda aba headaang'u, ak ea maygudu ebiikta gichcha eanyas!”

¹⁵ Ak fuga ageakshachchi aba haleanjeeni, ghayi nyasa meanang'oochcheanduumeeda headaannyi, gayghamiinaada nea sheagi, aba muuwda sawanadeadaannyi, hean gooyeawda nea gaguuttu heareega aba ghuutta haw,

¹⁶ “Dashageada, dashageada, mujiineetta hawiin siikwealsa hang'da bumbun miyiin, ea hang'weakka omng'i ea gea areeriin, nea geetaamdaam aba lagheanga meeng'meeng'i, ea lagheanga sheayeeda haw, ea sageekka!

¹⁷ Aba jeemba aseadeanagi haleanjeeni seaniin sihista.” Ak fuga sean ambal maleambajeega ea fuga weay bareanyeekka aba maleambooda ea gearnoodiga maleambooda ea fuga ageakshi aba jeeda basooda, hean ghamiinaada nea sheagi

¹⁸ gooyeawda iidaa aroosta beasta sighwardaawa niny, “Ana mujiinajaan gil uurji mujiineani hawiin?”

¹⁹ Hean gwajaksa iheenga nyaawa birjeanda, ak gooyeawda nea gagiisan, hean gooyeawda nea gwayi, “Dashageada, dashageada, mujiineetta hawiin nea gea mideawa maleambajeega hees aba jeeda basooda ghwanyas baruureega aba meanang'oochcheandumeadaannyi! Ak aba jeemba aseadeanagi ea sijakta.

²⁰ Ahoosana appadaydaannyi, Ea humng'eeda, Ea fuga ghaydidi ea giijasoodiga ea sibanga, aba gideaba Aseetta nugoneegwa girgweaksiinda appadaydaannyi!”

²¹ Hean gagatgat malaykajeanjagi mideawa uurda, lagheaneeda uurji lagheaneeda haw bea ng'ealdeayda ak gwajaksa jeeda basooda, nea gwayi, “Asi gajeejakseey ng'eanyi Babelooneetta was mujiineeda hawiin aba nyarasta, ak ea maygudeebiikta eadaah;

²² ak eara ghuusiga fuga mideawa gidondoorajeega ea gea sarman, ea gea seawiir ea gea aguul, ea maygudu eebiikta eeyiing'sa jeadaang'u earahay; ghana siida geariir aba giliwas gearinda maygudu eanyasa jeadaang'u earahay; ghana ghuutta lagheaneeda ng'ealshi maygudu eyiing'sa jeadaang'u earahay;

²³ ak eara weeshinda gheaboong'nyeanda ea maygudu gabiikta ghoabwaay aba jeadaang'u earahay; ak eara ghuutta siida geeshshi ea dea gatmooda sighi maygudu ebiikta eyiing'sa jeadaang'u earahay; aba gideaba fiisu ikaagu ageakshiin ghayi saawa fuga hees bea ng'eanyiida gil, ak emoojiga sean easireengani aba beneetkweandumeadaang'u.

²⁴ Nea jeadaannyi geenyasa foojeanda sibanga ea gea fuga ghaydidi, ea gea fuga ghayi sinuus appadayda ng'eanyiida.”