Giidaheechta 17 - NEAJEEDA EESH BEA BUUNEESSEAN

Hiseadayda nalaat

¹ Hean ghwahidu malaykajeanjagi bea jeedeaba giikka assispwa mideawa gweeraji ispwaan ak gwayeeshinean, “Beenni, gaydaahiimneey girgweaksiinda hiseadayda haw abiitta badayda beega saang'aan,

² nea nihiseada sea sugoodiga badayda ng'eanyiida, ak gea mida badayda ng'eanyiida ea niboogit aba difaayeeda hiseadayeandumeadaannyi.”

³ Hean ghwaadan aba jeeda Gurorooda ea dawa dareapcheeda, ak ghaadaayi gatmooda nea goopteada aba badayda diyeayda areara nea ghwannyiit saseeda gheawunga ging'weakka, nea gwandeawa iheen ispwa ea gujaw damwanamughuush.

⁴ Ak gatmoodida ea niikwa hang'da oomu ea dea areara, nea siittaamdaamwa lagheanga meeng'meeng'i ea gea haw sheayeat ea sageekka, ak gwanda geattindaannyi bayookta mida lagheanga meeng'meeng'i biissa ghwanyiit ng'asheega munyas ea ririnyeanda hiseadayeandumeadaannyi;

⁵ ak gheamamdaannyi geeng'oorsa gheawunga makcheameeda, “Babelooneeda haw, gheamatta fuga hiseada bea ng'asheega munyas bea ng'eanyiida.”

⁶ Ghaadaayi gatmoodida, nea niboogit aba foojeanda fuga ghaydidi sea foojeanda sinuus appadayda Yeesu. Hean nea ghaadaayi gatmoodida ghahamwan ng'eanyi gidahaw.

⁷ Hean gwayeeshinean malaykajeanda, “Ghwasaan anda gihami ng'eanyi? Gaydarukuneey makcheameedeaba gatmoani, ea dea diyeayda mideawa iheen ispwa ea gujaw damwanamughuush aat gatmooniin.

⁸ Diyeaydideani idaahiin abeeda gwanda, ak ea mandana, ak gaygwadiyeanna uutta shoomanda mammudeana ak gawa heeda ng'asheega munyas. Ak fuga mida badayda ng'eanyiida miyeeng'oorsa gheawunga nyaawa jeeda gittaabooda eaweega dea sibwada sindeetta ng'eanyiida, gayghahamng'eanyi idaa diyeaydida. Aba gideaba gwanda, ak ea mandana ak gayghwahidu.

⁹ Ak nii geeguura heeda fughareeda mida weaghuumeeda: iheengiga as ispwaan gijeaga as ispwa apteadawa gatmoani gil;

¹⁰ ak gwanda eara sugoodi ispwa, nea muut aba jeannyaawa ea niibeada, akkalleala gwanda, ak niirja ea miighwahidu, nea iihidu gayghwashng'u gilinuwaas.

¹¹ Nea diyeaydida mida ak ea mandanean, niny deaba sissi ak niny gaba jeedeaba giikka assispwaan, ak niny gawa jeeda ng'asheega munyas.

¹² Ak gujakkiga attamwanamughuush idaahiin ea sugoodiga attamwanamughuush gil, was gea miighoang'ng'waay uurda sugochcheandumeeda, ak ea ninyas gheambalmeeda gawuurji sugoodiga aba aseadeanagi, sea diyeayda.

¹³ Saawa gaba fughareanagi ak saawa ghoadaw diyeaydida uurda nyaawa ea gheambalmeeda;

¹⁴ ak suu gaygang'uchi sea Dayeenda Gisilleanda, ak gayghwajoar Dayeenda Gisilleanda saawa, aba gideaba niny Ng'uttamiida ng'uttamoojiga gil ea Sugoochcheanda sugoodiga, ak suu mideawa ninyiin ea gea geguursa gea suloat ea gea doobiiweadi.”

¹⁵ Hean gwayeeshshinean, “Beegigeani idaahiin, bea heeda apteadawa hiseadaydideaniin, ada buuneeda gil ea emoojiga ea iidiga.

¹⁶ Ak gujakkiga attamwanamughuushi idaahiin, ea diyeaydida ak gayghwasit hiseadaydida ak gajeenung' ghang'ut salgheang'da nea dawiish, ak gajeeyaak banyeagaaschi ak gajeenung' gamurjan aba beasta,

¹⁷ aba gideaba Aseetta niyiin guroruunatka nyaawa ak ghwasareanda gidagasiida nea gaba fughareanagi ak ghoadaw diyeaydida uurda sugoochcheandumeeda nyaawa, ea gwasa ng'asheega Aseetta.

¹⁸ Ak gatmoodida idaahiin ea mujiineetta hawiin gil mideawa gimbaliischooda appadayda sugoodiga badayda ng'eanyiideani.”