Giidaheechta 16 - NEAJEEDA EESH BEA BUUNEESSEAN

Gweerajeega nyarasta Aseetta

¹ Hean ghaayiinyi ghuutta haw nyaasha jeeda gheeda sibatta Aseetta nea gwayeeshsha malaykajeekka assispwaan, “Aweayeena ak ghoahhiidi gweerajeekka as ispwa bea nyarasta Aseetta mida badayda ng'eanyiidean.”

² Gawa malaykajeanda madeeda ak ghoahiida gweeriidaannyi aba badayda ng'eanyiida, hean ghoaptu deanneaduuktka munyas bea ririnnyeanda mideawa giirooraneedeaba diyeadideani ak ghaghadoawan gitta sirattiida ninyiin.

³ Nea malaykajeandida bea iyyeenyean goohiisa gweeriidaannyi jeeda basooda, ak ghwayamwa gawuurji foojeanda siida meah, hean gameewa haleanjeesean mideawa eaweega mida jeeda basooda.

⁴ Gohiida malaykajeandida bea samwaguun gweeriidaannyi jeeda eeniga ea gheanyanga beega, ak ghoaw foojeanda.

⁵ Ak ghaayiinyi malaykajeanda ambal beega nea gwayi, “Ang'iing'i guwosi doabiiwaat aba girgweaguutkaagu, ang'iing'eeda indi nea ghayi gindi, Ea Dea assagi Ghaydit.

⁶ Aba gideaba buuneeda niihiida foojeanda fuga ghaydidi ea gea Sibanga, ak anidawi saawa foojeanda ghwali. Ak ea gidamiisa!”

⁷ Ak ghaayiinyi heeda wagiida nea gooyeawda, nea gwayi, “Huumwa gil Ng'uttamiida was Aseetta mideawa uurda, girgweaguutkaagu huumwa gil nea ghwadoabiiw!”

⁸ Gohiisa malaykajeandida bea ang'waniin gweeriidaannyi badayda aseetta, ak geenung' ghaghwarda buuneeda aba beasta;

⁹ ak geaghwarda buuneeda aba beasta ng'waan, ak ghamwaashta saawa gheawunga Aseetta mideawa uurda appadaydeaba sawanaduussu, ak ea madauukkuunana ak ghoadaw niny gigheambiitta.

¹⁰ Gohiisa malaykajeandida bea muudiin gweeriidaannyi badayda hoorgeeda gheambalmeedeaba diyeaydida, ak geenung' gamsaniit sugoochcheandumeadaannyi; hean ghwanyeannyea buuneeda ng'ushapkeakka nyaawa aba silalga

¹¹ ak ghamwaashta Aseetta humng'eeda aba sawanaduutka nyaawa ea deanneaduutka nyaawa, ak ea maduukkuunana sinaweega nyaawa.

¹² Gohiisa malaykajeandida bea lahiin gweeriidaannyi jeeda eenda haw suguura Efrattiin, hean ghwajaam beagaaschi, ak geesissin naweeda sugoodiga leabu heeda ghayeawa.

¹³ Ng'atta ghaadaayi, ng'asheega rinna ghuutta ichchibooda ea ghuutta diyeayda ea gea ghuusiga sibanga ng'uyyeega, ea guroruunat samwagu munyas uurji udagheambagajeamajeega;

¹⁴ suu guroruunatka meangeenda gil, sina gwadeagwajeega, inyeessa gwaritta ak gaweesa sugoodiga mida gigheawda bea ng'eanyiissean, ak ghoamughuush saawa aba ng'uchcheedida aba eaweetta haw bea Aseetta Hoauuriin.

¹⁵ “Asi, gaydoanda mareanghweanda! Ghang'wana siida majeek, nea ghaghamwat hang'weakaaschi ak ea mawa nea dawiish ak geadaa baspaseagaaschi!”

¹⁶ Ak goomuguushsa saawa hiji suguura aba ghuutta Ebraniya Armagedooni.

¹⁷ Gohiisa malaykajeandida bea ispwaan gweeriidaannyi humng'eeda, ak gwarinna nyeashta haw jeeda gheeda sibatta Aseetta, heeda hoorgeeda gheambalmeeda, nea gwayi, “Nigeawiit gwasa!”

¹⁸ Hean gwardu dadamandeeda, ea nyeashta, ea gighweendandeeda, ea sawooda haw bea ng'eanyiida dea eara heeda ghayi miigwardu dea uurji nii dea niibiideewa buuneeda badayda ng'eanyiida, aba gideaba sawooni bea ng'eanyiidean ahaw.

¹⁹ Hean gwaheelli mujiineetta hawiin niba samwagu, ak ghoabeada mujiinajeega emoojiga, ak ghwaapkaat Aseetta Babelooneetta hawiin, ak geattaw gweeriida difaayeeda nyarastaannyi.

²⁰ Gilinyoo ea ng'eanyiida neaweesa beega gaygamng'aw, ak ea manda giijeega jea gudeadaah;

²¹ hean gang'adeesa buuneeda roopta haw bea lagheanga durmani muuchchi, ak goobitpissa buuneeda nea gwaleabu humng'eeda, ea eeyi bwak ea ghamwaashta buuneeda Aseetta aba sawanadeeda nyas aba lagheanga, ak ghoabeal fih sawanadeedida.