Giidaheechta 15 - NEAJEEDA EESH BEA BUUNEESSEAN

Malaykajeega mideawa sawanadeeda huydean

¹ Hean ghaadaayi gwadeagooda nuut aba humng'eeda, nea ahaw ak daamdaamwaat, malaykaji ispwa mideawa sawanaduut ispwa was gea huydean, aba gideaba appadaydeaba suuh niduulean nyarasta Aseetta.

² Ghaadaayi giduurji basooda giyoo guuyi beasta, ak fukka joar diyeayda ea gissirattiidean ea monneeda gheawungaaschi, nea ghamiinaada aba murdeeda basoodida bea giyoohiin, nea gwandeawa gidondoorajeega Aseetta aba geattinga nyaawa.

³ Ak gwasarman duumda Muusa, was soomjeanda Aseetta, ea duumda Dayeenda Gisilleanda, nea geeyi, “Gadiyoojigaagu isinayi ea hees nea deamdeameadi, Ea Ng'uttamiida was Aseetta Hoauur! Naweadingaagu doobiiwnatta gil ea huumwa, Ea Sugoocheanda gweannyeekka sean!

⁴ Ngeaha gil deamoawalnyi ak ghoaghaambiit gheawungaagu, Ea Ng'uttamiida? Aba gideaba ang'iing'i guwasi ghaydit nea gibwageaw. Aba gideaba gayghapka emoojiga sean ak ghaghadoawannyi, aba gideaba girgweageadaang'u siittaajiit.”

⁵ Ng'atta ng'asheesu ghang'weardi ak ghaadaayi gheeda sibatta Aseetta bea maheemajeanda bea muuwunooda mida humng'eeda nea nijaada,

⁶ ak gwarinna jeeda gheeda sibatta Aseetta malaykaji ispwa nea gwandeawa sawanaduut ispwa, nea gookkwa hang'weakka miyaas meeng'meeng'i, nea daghanuunatka nyaawa ea sirat aba ghealooda meang'meang'.

⁷ Hean gageanu akkalealla aba jeedeaba diyeangiga assang'wan majeekcheewiin ak ghoadaw malaykajeekka assispwaan gweeraji ispwa sisna lagheanga meeng'meeng'i nea ghwanyiit nyarasta Aseetta majeek ea ghoaw damanda manda muudeanooda;

⁸ ng'atta geannyiit gheeda sibatta Aseetta aroosta leabu heeda gigheambiitta Aseetta ea dea leabu uurdaannyi, ak ea manda eara siyagi ammu gawa jeeda gheeda sibatta Aseetta ea eaghus ghwahit sawanaduutkiga assispwa bea malaykajeekka assispwaan.