Giidaheechta 14 - NEAJEEDA EESH BEA BUUNEESSEAN

Dayeenda Gisilleanda ea fugaaschi

¹ Ng'atta ghaang'weardi, ak ghadaayi gwanda uhuuda Giijeeda Sayuun Dayeenda Gisilleanda nea ghamiinaada, nea gwandeayi sea niny fii sagalamnyooji bughala ea haradam ea ang'wan nea gwandeawa gheawungaaschi ea gheawunga Ghwaan nea sung'oorsa gheamamuunatka nyaawa.

² Ak ghaayiinyi nyeashta nyaasha humng'eeda uurji nyeashta beega saang'a ak gawuurji nyeashta gighweendandeeda haw; ak nyeashi ayiinyiin gawuurji nyeashta fuga gidondoorajeega las gidondoorajeega nyaawa,

³ nea gwasarman duumdeesh aba madeeda hoorgeeda gheambalmeeda ea madeedeaba diyeangiga assang'wan majeekcheewiin ea madeeda gweargwa. Ak ea manda siida ammu ghoanal geaw duumdida, geaghus fukka as sagalama ea haradam ea ang'wan ghayi sikghu appadayda ng'eanyiidean.

⁴ Suu gea mii ghang'uda geat ririnyeanda aba gadeemga, aba gideaba ea ghaydidi; nea suu ea gea eadageeshta Dayeenda Gisilleanda gil aba hiji wea sean; assuh ea sikghu aba jeeda buuneeda nea gawuurji haghweega madeeda aba heeda Aseetta ea Dayeenda Gisilleanda,

⁵ ak ghuusiga nyaawa ea manda ng'uyyeega, aba gideaba gwannya gilimuy.

Malaykaji samwagu

⁶ Hean ghaadaayi malaykajeanda nuut nea ghang'eatta aba bugusta humng'eeda, nea gwandeawa giijasta miy manda muudeanooda jea gwarukwiisa fuga mida muunda ng'eanyiida, ea giliwas eamwa ea emeeda ea iitta ea buuneeda;

⁷ ak gwayi aba ghuutta haw, “Oawwala Aseetta nea ghoattawji niny gigheambiitta, aba gideaba damanda girgweageadaannyi nihidu; aghadoawana niny deabwat humng'eeda ea ng'eanyiida, ea basooda ea gheanyanga eenda.”

⁸ Gweadu geeshta malaykajeanda nuut bea iyyeenya, nea gwayi, “Niibeadi, Niibeadi Babeleeda haw, aba gideaba ginung' ghwali emoojiga sean difaayeeda gitta igasayi muyiin.”

⁹ Gweadu geeshta nyaawa malaykajeanda nuut bea samwagu, nea gwayi aba ghuutta haw, “Giliwassean ighadoawan diyeanyi ea gissirattiida, ak ghwanyas giirooraneeda aba gheamamdaannyi ghana geattindaannyi,

¹⁰ eara niny gayghwali difaayeeda nyarasta Aseetta, sisin nea meekkuuyi gil aba jeeda bayookta nyarastaannyi, anniny gajeesawan aba beasta ea giikkayda aba madeeda malaykajeega ghaydidi, ea madeeda Dayeenda Gisilleanda.

¹¹ Ak gwadiyeada aroosta sawanadeeda nyaawa eaghoaw gweannyeekka manda muudeanooda; ak ea mayghwanyas fuufta, askweari ghana eawa, nea fuga ghadoawan diyeanyi gil ea gissirattiida, ea giliwas siida wassean mideawa giirooraneeda gheawungaaschi.”

¹² Hiji heeda mida gihang'ooyda fuga ghaydidi gil, nea fuga ang'ng'waay digheanyeekka Aseetta gil ea masaweega Yeesu.

¹³ Hean ghaayiinyi ghuutta nyaasha humng'eeda nea gwayi, “Ng'waara ng'asheesu: Ghang'wana siida meah ghamneawa meewsa heeda Ng'uttamiida. Ghang'wana huumwa, gwayi Gurorooda, ak gafuuf iing'atta gadiyeeda nyaawa, aba gideaba sinaweega nyaawa ghwaat geeshta!”

Lajooda booga ng'eanyiida

¹⁴ Hean ghang'weardi ak ghaadaayi shamooghooda eesh, nea uhuudeaba shamooghooni goopteada siida uurji balleanda siida, nea uhuudaannyi gwanda shiipka lagheanga meeng'meeng'i, nea gwanda geattindaannyi barda ng'aniip.

¹⁵ Gwarinna jeeda gheeda sibatta Aseetta malaykajeanda nuut, ak gaguurda aba ghuutta haw, gaguursa siitta apteada aba uhuudeaba shamooghoodean, “Adealda bardaang'u, ak guwi laja, aba gideaba booga ng'eanyiida niheas.”

¹⁶ Hean siitta apteada appadayda shamooghoodean gwajaksa bardaannyi badayda ng'eanyiida, ak gealach ng'eanyiida.

¹⁷ Ng'atta gwarinna malaykajeanda nuut jeeda gheeda sibatta Aseetta mida humng'eeda, anniny gwandeawa barda ng'aniip.

¹⁸ Ak gwarinna malaykajeanda nuut heeda wagiida, nea dea burdeawa uurda beasta gil, ak gaguursa dea mideawa bardida ng'aniibiin aba ghuutta haw nea gwayeeshsha, “Geanni bardida ittaang'u ng'aniibiin ak gibinni dayeega msabiibooda ng'eanyiida, aba gideaba haghweagaaschi niheas.”

¹⁹ Hean gwajaksa malaykajeandida bardaannyi badayda ng'eanyiida ak gaptu msabiibooda badayda ng'eanyiida, ak gwajaksa sabiibu jeeda shoomanda haw simurriisa difaayeeda nyarasta Aseetta;

²⁰ ng'atta geadattas gitta muura difaayiin aba jarooda heeda mawosa mujiini, hean gwarinna foojeanda jeedeaba gitta muura difaayiin, ea gageawiit ea gooyang'da ghealooda faraasi, ea gooyang'da gilomittaji bughalaji iyyeenya ea seedam ea damwallah.