Giidaheechta 12 - NEAJEEDA EESH BEA BUUNEESSEAN

Gatmooda ea ichchibooda

¹ Ng'atta geadaa gwadeagooda haw aba humng'eeda was gatmooda siikwealsa aseetta, nea gwanda jeeda baneaguukka geeshangaaschi sheeda, nea uhuudaannyi gwanda shiipka miinga attamaniyyeenya;

² niny abeeda ea bungaroocheanda gil, ak goyeawda aba lajooda jeatta, ak gwasawana aba jeatta.

³ Ng'atta geadaah gwadeagooda nuut aba humng'eeda, ng'ulla, hararjooda haw areara, mideawa iheen ispwa ea gujaw damwanamughuush, nea iheenga nyaawa gaba nii mideawa shiip ispwa.

⁴ Nea shoomng'eandaannyi goongir miinga humng'eeda heeda haw, ak gwahisa badayda ng'eanyiida. Hean ghamiinaada ichchiboodida aba madeeda gatmoodida riikghta gwaji jeeptean, ak abeeda ghwanukghuta jeaptaannyi damanda jiila;

⁵ hean gwaji jeepta was balleanda, ak gayghwaahaaghwa emoojiga sean aba bileangida gharinyeanda, ak jeeptaannyi geettiing'da ea gawa heeda Aseetta ea heeda hoorgeadaannyi bea gheambalmeeda,

⁶ iiduw gamng'aw gatmoodida gawa dareapcheeda, nea nisissa Aseetta heechcheagoobiida, ak geerrear ak goobiida hoowa eawooji sagalama ea bughalaji iyyeenya ea laadam.

⁷ Ng'atta ghang'eat ng'uchcheeda aba humng'eeda, gang'uchi Mikaeeli ea malaykajeagaaschi sea hararjootta; ak gang'uchi ichchibooda sea saawa ea malaykajeegaaschi,

⁸ iiduw geajoar ak ea mudugwanda heechcheagoobida aba humng'eeda.

⁹ Ak geejaksa ng'eanyi hararjootta haw was ichchiboodeaba garayiin, suguura Meang'nyeandeenda ea Shattaani, was dea reengani ng'eanyiisseaniin, ak geejagu badayda ng'eanyiida, ak eara malaykajeagaaschi geehisu ghapka ng'eanyi sea niny.

¹⁰ Ak ghaayiinyi nyeashta haw nyaasha humng'eeda nea gwayi, “Ghamneawa lealeanooda ea uurda ea Sugoochcheandumeeda Aseetteanya ea gheambalmeeda Gristoydaanyi nihidu, aba gideaba sijaksa ng'eanyi dea aheakkiida fuga siduupcheewi, ninyeeda aheakkiida aba madeeda Aseetteanya askweari ea eawa.

¹¹ Ak ghwajoar aba foojeanda Dayeenda Gisilleanda, ea aba ng'asheanda muwuunnooda nyaawa, ak ea mwabwariinya eaweega nyaawa eara gaweayi miyeeda.

¹² Asi ang'weella, Ea humng'eeda, ea agoogeeni ondijeedean! Asi agooga ashageada, Ea ng'eanyiida ea basooda, aba gideaba meang'nyeandeenda nirarang'aan ghwahidu heedeang'wa nea gaba nyarasta haw aba gideaba ghwanal gwandeawa gheadi nuwaas!”

¹³ Iiduw nea ghwadaa ichchiboodida gideaba sijaksa badayda ng'eanyiida, hean ghwaat geeshteaba gatmoodida jiih jeepta was balleandean.

¹⁴ Ng'atta geattaw gatmoodida meang'i iyyeenya bea rabearda haw ak ghang'eatta gawa dareapcheeda sheageewa ichchiboodida, ak gawa heeda jea gweagiischi gheadi nuwaas, sheeh haradam ea iyyeenya.

¹⁵ Hean gwarinna ghuutteaba ichchiboodida beega uurji gea enda, appadayda gatmootta, ak ghwanung' ghwaat guldeayda.

¹⁶ Iiduw ghaweat ng'eanyiida gatmooda, ak ghwajaat ng'eanyiida ghuuttaannyi ak ghwanukghta eendida rinna ghuutta ichchiboodean.

¹⁷ Hean gwanyareeksa ichchibooda gatmoodida, ak ghang'eat gawa ghoang'eat ng'uchcheeda sea jeatta siipuut bea gatmoodean, sea fukka ang'ng'waay digheanyeekka Aseetta nea gammuuwu iitta Yeesuun. Ak ghamiinaada appadayda iseaskweanda basooda.

¹⁸ Hean ghaminaada ichchibooda aba ghuutta basooda.