Giidaheechta 11 - NEAJEEDA EESH BEA BUUNEESSEAN

Muuwshoodi iyyeenya

¹ Ng'atta gegoonan ng'archeanda uurji bileangida sitteenniida, ak gwayeeshshean, “Ng'eada ak gideeni gheeda sibatta Aseetta ea heeda wagiida ea fuga mida jeeda gadoowani Aseetta,

² ak ea adiideeni bugharjeanda mida bwadaw bea Aseetta; dakta bwadaw, aba gideeda siittaw daroorakka, ak gayghwadattas mujiineeda ghaydit sheeh haradam ea iyyeenya.

³ Ak gaydaadaw Muuwshoodigeasu assiyyeenya uurda ak ghwaramwaar eawooji sagalam ea bughalaji iyyeenya ea laadam, nea siikwealsa guniyajeega.”

⁴ Suu geedikka assiyyeenya suguura masaytunajeegean gil, ea hoorgajeekka bea gheaboonyanga assiyyeenya miinaada aba madeeda Ng'uttamiida ng'eanyiidean.

⁵ Nea siida iigasa gwasawan saawa, gwariinna beasta ghuusiga nyaawa ak ghwaak weajoodiga nyaawa. Ak ghoammu ghwayam beega ghoaw foojeanda, nea iigasa gayghwalas ng'eanyiida aba gilwas lasita.

⁶ Saawa gwandeawa uurda jea ghwarada humng'eeda, ak ea mwaroabwana damanda ramwaarana, ak gwandeawa uurda appadayda beega ak ghwayam ghoaw foojeanda, ak ghwalas ng'eanyiida aba giliwas dawni, aba gidagassiida.

⁷ Iiduw nea niihiit muuwnooda nyaawa, gaygang'uchchi diyeaydida leabu jeeshoomanda mammudeanean sea saawa, ak gayghwajoar ak gwanuus saawa,

⁸ nea muscheekka nyaawa gaygwalil aba ghuutta naweeda mujiineetta hawiin, nea geegala Sodooma ghana Miisri, was heeda ghayi singoorsa Ng'uttamiida nyaawa.

⁹ Aba eawooji samwagu ea gil gang'ula headiga buuneeda ea emoojiga ea iitta ea daroorakka gumgeenga nyaawa ak ghaheawa gideaba gajeebuy.

¹⁰ Nea fuga mida badayda ng'eanyiida gaygahoosan appadahuukka nyaawa nea gang'weela ak saawa gweattiisa geat haleanjeeda sippareannyi, aba gideaba sibang'su assiyyeenyean gwasawan fukka mida badayda ng'eanyiidean.

¹¹ Iing'atta eawooji samwangu eagil hean ghwahidu gisimeanda eaweega leabu heeda Aseetta ak gawa jeannyaawa, hean ghang'eatng'eat ghamiinaada aba geeshanga nyaawa, hean ghang'ut fukka daahiin muuwda haw.

¹² Geeyiy nyeashta haw leabu humng'eeda nea gwayeeshsha saawa, “Apkaani hiji!” Gwadiyeada humng'eeda nea ghabeawa jeeshshamooghooda, nea gang'ula weajoodiga nyaawa.

¹³ Nea aba damandida abeeda gwanda sawooda haw bea ng'eanyiida, ak ghoabeada mwaatkweanagi mwanang' bea mujiin; ak gameewa fii sagalamnyooji ispwa aba sawoodida bea ng'eanyiidean, ak ghang'ut muuwda geesippuut, ak ghoaghaambiit Aseetta humng'eeda.

¹⁴ Ning'atta shageatteaba iyyeenya; ng'ulla, niriikghta ghwahidu shageatteaba samwangu.

Durumbeatteedeaba ispwa

¹⁵ Ghaghuut durumbeatteadaannyi malaykajeandeaba ispwa, ak ghwanya ghuusiga ajuur aba humng'eeda, nea geeyi, “Sugoochcheandumeeda ng'eanyiida goolla ghoaw sugoochcheandumeeda Ng'uttamiideanya ea dea Gristoydaannyi, ak gaygoombaliischi ea ghoaw damanda manda muudeanooda.”

¹⁶ Ak gwearguga attiktam ea ang'wan abiitbiida hoorgajeega nyaawa bea gheambalmeedean ammadeeda Aseettean goobeedeayi ak ghabwada jeesinga ng'eanyi nea ghamwaash Aseetta,

¹⁷ nea gwayeenna, “Geebadiischooweey ang'iing'i, Ng'uttamiida was Aseetta mideawa uurda, gindi nea gibean midana, aba gideaba nigeandi uurdaang'u haw ak giimbaliischi.

¹⁸ Ak gwanyareesi emoojiga, ak ghwahidu nyarastaang'u, nea ghwahidu damanda jea ergweaksiina fuga nimeewa, nea geammwaar soomjoogaagu was sibanga ea gea ghaydidi, ea fukka awali gheawungaaguun, was gea manang'i ea gea hees, ak geedatas suu datas ng'eanyiidean.”

¹⁹ Ng'atta geettin Gheeda sibatta Aseetta mida humng'eeda, ak geadaah sandakwajeanda digheanda aba jeedeaba gheannyi sibatta Aseetta; abeeda gwanda dadamandeeda, ea nyeashta, ea gighweendandeeda humng'eeda, ea sawooda ng'eanyiida, ea roopta haw muuchchi bea lagheanga.