Giidaheechta 10 - NEAJEEDA EESH BEA BUUNEESSEAN

Malaykajeanda ea gittaabooda mwanang'

¹ Ng'atta ghaadaayi malaykajeanda nuut mideawa uurda nea ghwararang'aana humng'eeda, nea sikwealsa shamooghooda, nea uhuudaannyi gwanda gidaghuweang'da sheagitka, nea gheamamdaannyi ghawaar aseetta, nea geeshangaaschi gawuurji daranajeega beasta.

² Nea gwandeawa gittaabooda mwanang' giittineat aba geattindaannyi. Ak ghoallaabwa geashtaannyi bea geattinda dugwa jeeda basooda, nea geashtaannyi ghaadaam ghoallaabwa badayda ng'eanyiida.

³ Nea gooyeawda aba ghuutta haw, nea ghwanyaashta daghatta dea ng'adiida; iiduw nea gooyeawda, ghwanya ghuusigeaba gighweendaannyeekiga assispwaan.

⁴ Ng'atta nyeashteaba gighweendannyeekiga assispwaan, abeeda ea neagasayi dang'waar, hean ghaayiinyi ghuutta leabu humng'eeda nea gwayi, “Aroora ng'asheesu rugu gighweendannyeekiga assispwaan, ak ea ading'waari.”

⁵ Nea malaykajeandida gwachchi adayiin ghamiinaada aba jeeda basooda ea badayda ng'eanyiidean ghamiinda geattindaannyi bea dugwa googeal humng'eeda,

⁶ ghwaak habeawooda aba ninnyeeda majeek ea ghoaw damanda manda mudeanooda, ninnyeeda bwat humng'eeda ea haleanjeeda mida jeeda, ea ng'eanyiida ea haleanjeeda mida jeeda, ea basooda ea haleanjeeda mida jeeda, ak ea maygudugwanda shing'deayda,

⁷ geaghus aba askwearjoojiga jea ghaghuuda durumbeatti malaykajeandeaba ispwa, abeeda makcheameeda Aseetta aba heeda soomjoagaaschi was sibanga gaygamajeegiit.

⁸ Hean gabiikta goobaloolan ghuuttida gwachchi ayiinyi leabu humng'eedean nea gwayi, “Una, ak gigeandi gittaabootta giittineat mida geattindeaba malaykajeandida miinaada appadayda basooda ea badayda ng'eanyiidean.”

⁹ Geaweesi malaykajeandida ak geayeeshshi goona gittaaboani mwanang'iin; ak gwayeeshiineen, “Geanda, ak giyaagi; ak gayghang'waaniit aba jeadaang'u, nea aba ghuuttaang'u gajea inyaanda maleeda.”

¹⁰ Geageandi gittaabooda mwanang' aba geattinda malaykajeanda ak ghaayaaji; ak ea inyaanda maleeda aba ghuutteanyu, hean iyaahiichchi agitta ghang'waaniit aba jeedeanyu.

¹¹ Geyeeshinean, “Gammiiseey rukuta gichcha ramooranga appadayda fuga saang'a ea emoojiga ea iitta ea sugoodiga.”