Giidaheechta 1 - NEAJEEDA EESH BEA BUUNEESSEAN

¹ Nii giidaheachta Yeesu Gristo gil, ghayi adaw Aseetta niny gohiimsa soomjoagaaschi ng'asheega jea gabay ghwahidu; ak ghwanung' eanal aba gijeakteayda malaykajeandaannyi gaweesa soomjeandaannyi was Yohaana,

² amaduw gamuuwwu Yohaana iitta ng'asheanda Aseetta ea muwwunooda iitta Yeesu Gristo, ea iitta haleanjeessean ghayi daa.

³ Ghang'wana siida assoamwa aba ghuutta haw ng'asheega was ramoorangeasu, ak ghang'wana fukka iiyiin, ea dea ang'ng'waay ng'asheega sung'oorsa jeedean; aba gideaba damanda nineekiit.

Giighachcheekka weesa ganiisajeega assispwa

⁴ Yohaana heeda ganiisajeega assispwa mida Asiya: Gagasa anyasa dagheerjeandumeeda ea hoyyooyda leabu heeda dea mida ea dea bean gwanda dea jea ghwahidu, leabu heeda guroruunat ispwa mida madeeda hoorgeadaannyi bea sugoochcheandumeeda,

⁵ biissa gwaleabu heeda Yeesu Gristoyda was muushoochcheanda doabiiwaat, was duweachcheeda fuga nimeewa, ak goombal sugoodiga mida ng'eanyiida. Heedeaba ninnyeeda bwariinyeasa ak gottineasa ehelleewana ring'eegaasa aba foojeandaannyi

⁶ ak gagoaneasa sugoochcheandumeeda, ak geahuuyi ashoohoodiga aba heeda Aseettannyi ea Ghweanda, giigheambiitta daannyi ea sugoochcheandumeeda ea ghoaw damanda manda mudeanooda. Amin.

⁷ Ng'ulla, ghwaan nea godeana shamooghuutka, ak gayghwadaa niny giliwas gheang'da, ea giliwas sii ghayi ng'ut niny; ea emoojiga sean bea ng'eanyiida gaygaguuttu heareagaaschi. Asaha. Amin.

⁸ “Aniini geawoschi Alfa ea Omeega,” dea madeeda ea dea huydean, aba ginnyaa Ng'uttamiida was Aseetta, dea mida ea dea bean gwanda ea dea jea ghwahidu, was Aseetta mideawa uurda.

⁹ Aniini geawoschi Yohaana, oorjeeda giyeang'wa deaghayi oppareannyeewi sawanadeeda ea sugoochcheandumeeda ea milikghteayda nea ghoahhangng'waanyi, nea gwanda ng'eanyiida neaweesa beega suguura Batmo appadayda ng'asheanda Aseetta ea muwuunooda ng'asheega Yeesu.

¹⁰ Muchchu geandi jeeda Gurorooda eaweeda Ng'uttamiida, hean ghayiinyi nyeashta haw appadaydeanya, nyaashta giguuleanda nea gwayi,

¹¹ “Ngoorsiina haleanjeeda idaahi jeeda gittaabu ak giyeassi ganiisajeega assispwa, dea Efeeso ea Smirna ea Bergamo ea Diyattira, ea Sardi ea Filadelfiya ea Laodekkiya.”

¹² Hean ghayamnyi geaw dadaah nyeashttida abaloolaniin, hean ghaadaayi gheaboonyan ispwa meang'meang'i mida deageaw,

¹³ ak ghaadaayi aba dang'adgeaba hoorgajeegiga siida uurji balleanda siida, nea nishuup hang'da gulng'eanyi, ak ea nirassa daghattaannyi inyeashta sisna lagheanga meang'meang'i;

¹⁴ uhuudaannyi ea budeagaaschi ea eashish ea ghawaar gea gisilleanda eesh, ea eashish ea ghawaar gapkeanda; nea gheanyangaaschi ghawaar ng'ushapta beasta,

¹⁵ ak geeshangaaschi gawuurji gharinnyeanda mur sisiy muuchchi ea gawuurji gilisihhuuna duwayda beasta, nea fuydaannyi ghwanyaashta dea beega saang'a;

¹⁶ ak ghoang'ng'waanya miin ispwa aba geattindaannyi bea dugwa, ak gwarinna ghuuttaannyi bwangeeda shidaat meadajeega sean, ak gheamamdaannyi gawuurji aseetta dagu muuchchi.

¹⁷ Iiduw nea ghaadaayi niny, geabeedeasi geshangaaschi ea dawuurji siida nimi. Hean ghwayiin geattidaannyi bea dugwa uhuudeanyu nea gwayi, “Adibeali, Aniini geawoschi dea madeeda ea dea huydean ea dea majeek;

¹⁸ ghayi ghameayi, ak ging'ulayi geawoschi majeek; ghayi ghaameayi, asi ng'ulla geawoschi majeek damanda manda mudeanooda, ak geandeawi gissiittinna gidaghuutta Miyeeda ea Gheeda maloonghajeega.

¹⁹ Asi ng'waara haleanjeeni idaahiin, ea gea ghamneawa mida, ea gea iiduw jea gabassa iing'atta suh.

²⁰ Makcheameedeaba miingiga as ispwa ideaksi geattindeanyu bea dugean, ea hoorgajeekka as ispwa meang'meang'iin, miingiga as ispwaan, malaykajeega ganisajeekka as ispwaani ak eara hoorgajeekka as ispwa meang'meang'iin ea ganiisajeekka assispwaan gil.