Galattiya 5 - NEAJEEDA EESH BEA BUUNEESSEAN

Ofra gibaldeang'wa bwaa geat

¹ Aba giibaldeaba geat ninung' Gristo eeppala geat; asi amiinaada nea goomilmiliidayi, ak ea adagudoomwaschi gichcha gideaba gajeerassa gheatkweakkeagwa jokkeeda soomjeandumeeda.

² Aniini Baulo gil, ak geayeeshshiineegwa iisiyadeagwa ghasmeahooda abeeda Gristo ea maygwalooseegwa gil.

³ Ak geamuwwiisi ng'asheanji gichcha gili wassih eayaat ghasmeahooda gammiisa gideaba gayghoang'ng'waay deaweedajeega sean.

⁴ Asi silealneegwa aba Gristo, agoogeeda jea egooneegwa doobiiwnatta aba deaweeda; noappeadi ak gooritteawi jeeda dagheerjeandumeeda.

⁵ Aba gideaba aba gurorooda aba naweeda masaweega geammuughu gissirarji aba doobiiwnatta.

⁶ Aba gideaba siida iimiida jeeda Gristo Yeesu gawa ghasmeahooda ghana ea mawa ghasmeahooda aba headaannyi mii gili, gidahaw masaweega mideawa bariinyeega gil.

⁷ Asi agalleadi muuchchi; ak ea ng'eaha weadaneegwa gideaba gajasissiina mureeda huumeanda?

⁸ Ghurghuri maleapna heeda siida ghayi guurneegwa.

⁹ Hamiireeda mwanang'i gayghwanung' ghaghuut geat murmurjeanda sean.

¹⁰ Aniini ghaaghuschi Ng'uttamiida ea gideaba mwajayamwana mwajadaakta ng'asheega gidadaakti aniini; nea siida adeawiideegwa agooga gayghwanyas girgweaksiindaannyi, siida wassean.

¹¹ Ak earaniini oorjoogiyya iyearukwiidi ng'asheega ghasmeahooda, abeeda ghwasaan anda gudeesawanan? Abeeda aba hiji russooda beehiida ea sigeanda.

¹² Aniini gideaballi fukka nung' ea mooppidi ng'eanyiin ghwalajaada geat!

¹³ Aba gideaba geeguurneegwa anyasa giibaldeaba geat, oorjoogiyya; ak ea adoanung' ghoaw giibaldeang'wa bea geat nyasitta gheatta ng'asheega gasa saseeda, nea aba barinyeega ea daba siisi huuw soomjeamba nuut.

¹⁴ Aba gideaba deaweedajeega sean geemmajeek aba jeemba ng'asheanjagi, “Nea nii gil, bea gideaba, bwariyda gischeewoochchandaang'u gidibwariydi geaw.”

¹⁵ Asi iighanyaadi nea ghoanyeannyeahaadi geat gooshageachchi adagaba siisi ak nuut.

Gurorooda ea saseeda

¹⁶ Asi geayeeshshineegwa, Aweayeena aba guroorooda nea ghanyea majaduulni haleanjeeda gasa saseeda.

¹⁷ Aba gideaba saseeda gagasa gitta magassa Guroroodean, ak eara Gurorooda gagasa gitta magassa saseedean; aba gideaba suu gwasheang'nyi ak ea mwajoammuusa asna gidoogasayi.

¹⁸ Ak iyoonung' goobaleegwa Guroorooda maygoobaleegwa deaweeda.

¹⁹ Ak ng'asheega munyas sina saseeda aadaach nea suhu; hiseadayeandumeeda, ririnnyeanda, ng'asheega munyas,

²⁰ mealuuleega, benetkweandumeeda, furjeeda, jaliida, geawunda gheangda, nyarasta, shidoodeaba ghaang', dardeayda, nabitta ng'uyyeega,

²¹ ng'ullooda siida aba gheang'da muy, booktuumeeda, leeshooda, ea ng'asheega uurji suh. Neabean damiin gheang'deang'wa gawuurji gidaghayi eareekusiindi gideaba fuga sina ng'asheega sunu maygaweay jeeda Gheambalmeeda Aseetta.

²² Ak haghweega Gurorooda ea barinyeega, hooseaneega, hoyyoo, milighteayda, inyeanda jeeda, miyinda, ea doobiiwnatta,

²³ Garbabanda, ging'ng'ooydeaba geaw, appadaydeaba ng'asheesu manda deaweeda.

²⁴ Fukka was gea Yeesu Gristohiin ningoorda saseeda ea ng'asheagaaschi munyas bwariiy nea gagasa.

²⁵ Iisippideewi gurorooda gagasa eweaya nea geandeawi gurorooda.

²⁶ Adeegwaray geat mwadaagha, ak ea adeesadayi geat, nea adeeng'ulli geat gheanyanga munyas.