Galattiya 4 - NEAJEEDA EESH BEA BUUNEESSEAN

¹ Ak ng'asheanda jea darukuneegwa ea nihi, siida jea gwahearaniischi iiduw ea jeepta gil, amwang'alla ging'ng'oonyaneeda, earappeadi haleanjeesean gaaschi gil;

² niny aba damani gwanda geattinga fuga sitteaga gadiyeeda ea fuga furiischi ea ghwahitta damandida ghayi rugu ghwaaniin.

³ Eara aseasa; ghayi nea geawaschi diibiga geewoschi ging'ng'oonyanga ak geegadiyeesi meang'nyeandeenda ambaliischi aba ng'eanyiida.

⁴ Iiduw nea ghwahitta damanda, hean goojeagu Aseetta Balleandaannyi, jiilu gatmooda, aba jeeda deaweeda,

⁵ ak goottin fukka mida jeeda naweeda deaweedean, ak geenung' eewosa balloojiga.

⁶ Iiduw inoawoschi balloojigaaschi hean goojeagu Aseetta Gurorooda Balleandaannyi jeesingaasa, ayeawda nea gwayeena, “Aba! nea gideaba Bwaabwa gil!”

⁷ Asi aba heeda Aseetta muduwosa ging'ng'oonyaneeda muwosi balleanda, ama muwosi balleanda abeeda eamuwoosi siida jea gwahearaniischi.

Gidagasa Baulo aba badayda fuga Galattiya

⁸ Ak aba damandida ghayi mii analana Aseettean, abeeda googadiyeesi fuga mawosa aseechcheekka.

⁹ nea ghamneawa iinoanalli Aseetta, ghana ghwanaleagwa Aseetta, gajabiiktaydaan bwadaw gichcha jeeda haleanjeeda ng'arng'ari was meangeenda, ak googasayi abiikta jeeda ging'ng'oonyaneandumeeda gichcha?

¹⁰ Agooga gong'ng'oonyayi eawoojiga ea sheega ea damanda ea gweannyeekka!

¹¹ Aniini ghaabealli aba agooga ghaghanyi gideaba gadiyeeda easinnyi aba badahuukkeagwa niiw mwadaagha.

¹² Oorjoogiyya, geamuscheegwa awuurjeewaneani, aba gideaba aniini geawuurjeewaneegwa. Ea manda gilmuy noosinean;

¹³ Ak ghamneawa ghoanalli gideaba aba munyinda saseeda gearukuneegwa giijasta miy dea madeeda;

¹⁴ ak earappeadi amyaannyi ea mii afoolean ghana aheawaan ak ghoadeaptaydanaan malaykajeanda Aseetta, gawurji Gristo Yeesu.

¹⁵ Gwandeenu abeeda ng'wanaweega oyeenniisi geat geendeawi? Aba gideaba geamuwwuneegwa gideaba aba damandida inyeeda ea gilijaaghamwas gil gajallootta gheanyangeagwa ak googoonnyean.

¹⁶ Heappi! Ghamneawa ea neawoschi weajoochcheandeang'wa aba gideaba gearukuneegwa huumeanda?

¹⁷ Fiisu gagasseegwa, ak ea magasseewaneegwa naweeda miy, saawa gagasa gwajapseegwa jarooda, ak abeeda agooga googasayi saawa.

¹⁸ Galagasean amiy gideaba geedeawiissa buuneeda suurja aba ng'asheega miyaas, ea mii gideaba damanda sindeayi gil gabeachchi.

¹⁹ Ea diibigeasu manang'i, geasawani muuchchi aba badahuukeagwa, ea eeyibwak ea ghwadaajiit Gristo aba jeesingeagwa!

²⁰ Gideaballi gwachchi geendeayi sea agooga ghamneawa ak ghwayamwa seareedeanyu, aba gideaba nung'udan muuwda appadahuukkeagwa.

Gissigala Hagaari ea Sara

²¹ Asi rukunean, ang'iing'eeda gasa gawa jeeda deaweeda, neada ea niyiinyi deaweeda?

²² Ghayi geang'waar gideaba Abrahaamu gwandeawa ballooji iyyeenya, agi gaba datmooda was ging'ng'oonyaneeda, niirja gaba gatmooda aabal geaw.

²³ Nea balleanda ging'ng'oonyaneeda geejiilda gideajusu bea saseeda, ak balleanda gatmooda abal geaw geejiila heelleesiinda.

²⁴ Asi nii giweaghanda gil: gadeemsu neajuut iyyeenya. Akkalealla gwaleabu Gijeeda Sinaayi, ak gwaji diibiga was ging'ng'oonyanga; nea Hagaari.

²⁵ Aba gideaba Hagaari gawuurji gijeeda Sinayi mida ng'eanyiida Araabiya; ak gwandeawa iitteaba geat sea Yerusaleemooni bea ghamneaweani, aba gideaba gwanda jeeda ging'ng'ooyda sea diibigaaschi.

²⁶ Ak mujineeda Yerusaleemeeda mida humng'eeda goobal geaw, ak niny ea iyya gil.

²⁷ Geeng'waar aba jeeda ng'ooruut gideaba, “Hoosana ang'iing'eeda was sonooda nyajeat majiilla; ajuura muuchchi nea giyyeawdi ang'iing'eeda ghayi ninyasa sawanadeeda jeatta; aba gideaba diibiga gatmooda mandeawana siyeeda asaang'a ea ghang'al gatmooda mideawa siyeeda.”

²⁸ Ak ghamneawa oorjoogiyya geewuurjeewi Isakka aba gideaba goowoschi diibiga heelleeda.

²⁹ Ak aba damandida ghayi sijiilda gea eawoojusu bea gealaniin, inyeesa goodeawiit diita ghayi sijiilla Gurorooda, ak eara ghamneawa ea gidurji gil.

³⁰ Ak gwayiin ng'ooruut? “Gwayi hoana ging'ng'oonyaneeda ea balleandaannyi; aba gideaba balleanda ging'ng'oonyaneeda maygwahearaniischi sea balleanda gatmooda abalgeaw.”

³¹ Asi oorjoogiyya, aba sareani aseasa meawasi diibiga ging'ng'oonyaneeda, geawaschi diibiga gatmooda abal geaw.