Galattiya 2 - NEAJEEDA EESH BEA BUUNEESSEAN

Baulo ea Giijasoodiga suurja

¹ Hean ng'atta gweanyeew damwana ang'wan geabiikti dascheeng'da gichcha dawa Yerusaleemu nea geadeayeewi Barnaba, ak eara Ditto geadeayeewi.

² Hean ghascheang'di aba giidaheachta; ak ghayiinnyi madeennyaawa (ak ghayiinnyi aba makcheameeda madeedeaba fukka siiwwal gheanyangean) giijasta miy earukwiidi aba jeeda eemoojiga, amaduw ea mwafwaji ghana dafwach mwadaagha.

³ Ak eara Dittoyda eadeayeewi earappeadi siida emeeda Yunaani gil, ea miyeeding'sa eaditta ghasmeahooda.

⁴ Iiduw appadayda oorjoogiyya bea ng'uyyeega siyeanna makcheameeda, ahuudaan ak ghamwaal giibaldeanya bea geat aba jeeda Gristo Yeesu, ak gagasa ghwaadeasa jeeda soomjeandumeeda,

⁵ dukku aseasa eameamwasi itta nyaawa eara gilimwanang, aba gideaba geegasayi goobiida heedeang'wa humeanda gijasta miy.

⁶ Nea ng'asheega leabu heeda fuga siiwwal gheanyangean nea geanung' ghoaw giliin (aba heedeanyu mwayamwa gil; aba gideaba Aseetta mashiitta buuneeda) fukka eayeennyi, fuga siiwwal gheanyangean manda gichchea gooheannean aniini;

⁷ hean iiduw gwajeeng'u saawa gideaba sugoonan darukkwiida giijasta miy aba heeda fuga meayada ghasmeahooda, gawuurji Betro gwarukkwiida giijasta miy aba heeda fuga siyaat ghasmeahooda

⁸ (aba gideaba siitta gadiyi sea Betro aba gadiyeeda ghasmeahoodean gagadiyi eara niny aba heedeanyu appadayda Emoojiga),

⁹ iiduw nea ghwanyas dagheerjeandumeeda ghayi sugoonan, Yakkobo ea Geefa ea Yohaana, siiwwal gheanyangean, gagoonan sea Barnaba geattinda dugwa bea weechcheeda, bea gideaba gajeeweaya heeda fuga Emoojiga nea gaweay saawa heeda fuga ghasmeahooda;

¹⁰ ak goopkanneasa gideaba eepkaada fuga barbari, was gitta easawani aba gasooda sinoodean.

Baulo goowoowsa Betro aba Antiyokkiya

¹¹ Iiduw nea ghwahidu Geefa ng'eanyiida Antiyokkiya, geawoowsi niny aba gideaba niny ghamiinaada nea niidiiyi.

¹² Damandida mii ghapkaana fiisu ng'ay ajeagu Yakobo, abeeda goombuuchchi sea fuga Emoojiga; ama iiduw nea ghapka hean ghwanung'waada gimbuchcheeda ak gabiikta bwadaw ak gooheeli geaw aba gideaba ghwoawal fuga siyat ghasmeahooda.

¹³ Ak eara fuga mwaatkwa bea Yahuudi ghwayamgeat sea niny, eara Barnaba iiduw ghwaat geeshta nyaawa aba gimmiinoodeaba geat.

¹⁴ Iiduw nea ghadaayi gideaba fukka madoobiiwsiina giijasta miy bea huumwa, geayeeshshi Gefa aba madeeda buuneessean, “Earappeadi uwosi siida Yahuudi, ak gibiideatti siida Emoojiga nea muwuurjeewani siida Yahuudi, gayding'siindaan siida Emoojiga gideaba gaygobiideatta siida Yahuudi?”

Fuga Yahuudi ea fuga Emoojiga gajeelealu aba masaweega

¹⁵ Aseasa, bean eewosa fuga Yahuudi aba jeatta ak ea meewasi fuga Emoojiga bea ring'eega,

¹⁶ nea geanalli gideaba siida majeattaw doobiiwnatta aba sinnooda deaweeda, geaghus aba masaweega Yeesu Gristo, aseasa ghayi geamwaschi Gristo Yeesu ak abeeda geegoaneasa doobiiwnatta aba masaweega Gristo, nea mii aba sinooda deaweeda, aba gideaba aba sinooda deaweeda manda siida jea eattaw doobiiwnatta.

¹⁷ Ak aseasa isigakkiisi geat doobiiwnatta aba madeeda Gristo, geadaa gideaba geebea ring'a, heappi Gristo niiw siida gadiyeeda bea ring'eeda? Manda!

¹⁸ Aba gideaba iyaadeaschi gichcha ng'asheekka ghayi eanyarjiin, ghahiimu gideaba aniineessean geandeawi gidinyeanda.

¹⁹ Aba gideaba aniini aba naweeda deaweeda geameewsi deaweeda, ak abeeda geandeawi Aseetta.

²⁰ Geengooran sea Gristo, ak geawoschi majeek ak ea mii aniini gil, Gristo eamajeek aba jeedeanyu, ak majeeknatta eandeawi ghamneawa aba saseeda, geandeewi aba masaweega Balleanda Aseetta, dea bwarinyan ak gabeagu eaweegaaschi aba badaydeanyu.

²¹ Meagassi daheawa dagheerjeandumeeda Aseetta; ak doobiiwnatta iisinyasa naweeda deaweeda, asi Gristo ghami mwadaagha.