Filippi 4 - NEAJEEDA EESH BEA BUUNEESSEAN

Gichchea eabeanda

¹ Asi, orjoogiyya, abwariinyi nea geagasayi, was hooseaneegeasu ea shiipka amiinaada nea goomajeegichchi aba jeeda Ng'uttamiideanyu, fugeasu abwariinyi.

² Geamuschi Eudiya ak geamuschi Sintikke gideaba aduupcheena aba jeeda Ng'uttamiida.

³ Ak geamuscheey earang'iing'i, siideanyu bea huumwa eaduupchcheewi, aniyean weada gadeemsu, aba gideaba gagadiyi sea aniini aba iitta giijasta miy sea Glemeenti sea fugeasu mwaatkwa eaweechcheewi, mida gheawunga nyaawa jeeda gittabooda eaweega.

⁴ Ahoosana aba jeeda Ng'uttamiida galagasean; ak geabiikti dayi, Ahoosana.

⁵ Anung' ghwanal buuneeda sean milikghteadeang'wa. Ng'uttamiida nineekkiit.

⁶ Adootteawiichchi geat aba ng'asheanda wassean, geaghus aba mooshta Aseetta nea ghoamwaschi ghawooda, nea ghoabwachchi Aseetta ak ghwanal Aseetta gidoogasayi wassean.

⁷ Nea hoyyooyda Aseetta, adaraam fughareenga sean, gaygafur jeesingeagwa ea fughareengeagwa aba jeeda Gristo Yeesu.

⁸ Asi oorjoogiyya gidahuydean jea otteemsheesiina nii, ng'asheega sean was gea huumwa, ea gea mideawa mureeda, ea gea doobiiweadi, ea gea miyaasi, ea gea subwariiyi, ea dagheerjeandumeeda iimida miyinda wassean, ghana giigheambiitta miy wassean, otteemsheesiina ng'asheesu.

⁹ Ng'asheega ghayi sinnalleagwa leabu heedeanyu ak ghoong'ng'waanyi nea ghoayinyi nea goodeaksi heedeanyu, asna suuh, ak Aseetta mideawa hoyyoo gaygoobiida heedeang'wa.

Badiischooda aba haleanjeeda siittayda

¹⁰ Aniini neahoosannyi muuchchi aba jeeda Ng'uttamiida, aba gideaba huydeanda iiduw ea noobiikti otteemsheesiina badaydeanyu, gawuurji gidaghayi otteemsheesiindi gideawuurjeewi ak eamwonyasi gheatta.

¹¹ Ak ea mii gideaba geargu ng'asheesu nea gwanda gideagasayi, aba gideaba aniini nanalli aba damannyoojiga sean gideawuurjeewi ak ghoahiidan gideandeawi.

¹² Ghaanalli hing'eanooda, ak ghaanalli nyasooda haleanjeeda; aba gheatkweakka sean, sinnaalan lang'uudadeeda ea jalooda, dandeawa haleanjeeda ghanea meandeawani.

¹³ Ghammuuschi dasin haleanjeessean aba siitta goonan uurdean.

¹⁴ Ak eanoosinnyi ng'asheanda miy aba damanda sindeayeesi jeeda sawanadeedeanyu.

¹⁵ Nea agooga fuga Filippi, ghoanali gideaba aba damandida bea ging'eatta Giijasta miyiin, damanda ealeapni Makkedoniya, manda ganiiseeda eaweechcheewi aba ng'asheanji bea giidaydeayda ea ging'ng'ooydean geaghus agooga;

¹⁶ ak eara aba damanda eandeewi Desalonikke imiisean gooyeanean haleanjeeda eagasayi ak ea mabeachchi eaweechchanjagi.

¹⁷ Mii gideaba geagasayi haleanjeeda jea agoonean gil; geagasayi haghweega jea ghoahaada aba monneedeang'wa.

¹⁸ Ak ea naanyaschi haleanjeesean, ea ghwanaawda, aba seang'ayda; was gea ghayi eanean Epaforodittoyda leabu heedeang'wa, was haleanjeeda ogoonnyi, was shearooda nagheeda ng'andit, ea haleanjeeda sisapa geadi bea ghadoweeda biissa ghabwariiy Aseetta.

¹⁹ Nea Aseetteanyu gaygagooneegwa haleanjeessean oogasayi aba dagheerjeandumeedaannyi aba gigheambiitta mida jeeda Gristo Yeesu.

²⁰ Asi eakghambiida Aseetta was Ghweandeanya, ea ghoaw damanda manda mudeanooda. Amin.

Giighachcheekka huydean

²¹ Oakghada fuga ghaydidi sean mida jeeda Gristo Yeesu. Ghoaghadeagwa oorjoogiyya eandeawi aba hiji.

²² Ghoaghadeagwa fuga ghaydidi sean, ghwaraanya gea abiitta gheeh Gaysaari.

²³ Dagheerjeandumeeda Ng'uttamiida was Yeesu Gristo gagasa goobiida jeeda gurooruunatkeagwa.