Filippi 3 - NEAJEEDA EESH BEA BUUNEESSEAN

Doobiiwnatta huumwa

¹ Asi aba huydeanda, oorjooga giyeenya, ahoosana aba jeeda Ng'uttamiida. Ak geang'oorneegwa ng'asheega uurji gikka nea meapri, ak abeeda gaygwaleaneegwa.

² Ashageada gudajeega, ashageada fuga gadiyeeda munyas, ashageada fukka iissa ghwalajaada saseedean.

³ Aba gideaba aseasa geewoschi ghasmeahooda huumwa, gadoowan Aseetta aba gurorooda, ea gheambalmeeda aba jeeda Gristo Yeesu, fuga mwarara ng'asheega saseeda.

⁴ Earappeadi eandeawi gichchea darara saseeda. Siida wassean iimideawa gichchea ghwarara saseeda gharaanyi aniini:

⁵ Geayadan ghasmeahooda eaweedeaba sis, ak geawoschi siida emeeda Isaraeeli, bea dooshta Benjamin, ak geawoschi siida Ebraniya jih fuga Ebraniya; nea aba ging'ng'ooyda deaweeda geawoschi Farisayajeanda,

⁶ ak geasinnyi badiida muuchchi dasawan ganiisa, appadayda doobiiwnatta sinyasa deaweeda majeerukuna badaydeanyu ng'asheega munyas.

⁷ Nea haleanjeetta sean ghayi anung' ghoaw gidahuumwa aba heedeanyuun ghamneawa ghanung' gawuurji roodaweega appadayda Gristo.

⁸ Aba huumwa ghaanung' ghoaw haleanjeesean gil nirooda aba gitta naawda aba nalooda Gristo Yeesu was Ng'uttamiideanyuun. Appadaydaannyi naanung' gwarooda haleanjeessean, ak ghanung' ghoaw haleanjeeda mwadaagha, ak abeeda ghaanyaschi Gristo

⁹ ak geanyasan aba jeadaannyi, ak ea meandeawani doobiiwnatteanyu, mida jeeda deaweeda, geaghus diitta sinyassa naweeda masaweega aba jeeda Gristohiin, doobiiwnattida leabu heeda Aseetta sinyas aba masaweegean;

¹⁰ ak abeeda ghaanalli niny ea uurda duunnoadaannyi, ak geawujeewi niny aba jeeda miyeadaannyi.

¹¹ Ak abeeda iijea ghoaw ghaanyaschi duunnooda miyeeda.

Fachsiinda gidamida mwadi

¹² Ak ea mii gideaba naanyaschi ghana gideaba neawoschi hidaat gil; geamajeekchi badiida danyas ak ghoaw deanyu, aba gideaba ninung' Gristo Yeesu doaw siidaannyi.

¹³ Oorjoogiyya, aniini meaguureewani geaw siida ninyas; ak geasinnyi ng'asheanjagi, ghaanung' gwaroossean ng'sheega mida bwadaw ak geamiriikchi beatteaba mwadi heeda mida gittasiyiin mwadiin.

¹⁴ Geamajeekchi beatta dagal heeda gidabuurbuuji jea danyasa gimear jea gwaleabu gurnooda leabu heettiyeada bea Aseetta aba jeeda Gristo Yeesu.

¹⁵ Anung'waada fukka ikkasa nihittiisa heedean gwasnu fughareenga nyaawa; nea aba jeedeang'wa iimida gidagasa eerada gayghoahiimneegwa Aseetta.

¹⁶ Anung' eakghusa ging'ng'ooyda huumeanda aba gitta sinyaschiin.

¹⁷ Oorjoogiyya, oang'ng'waanya searoojigeasu, nea gorroorji fukka abiideatta gidoowuurjeewiin nea googalaneasa.

¹⁸ Aba heeda fuga saang'a, nearukuneegwa ak ghamneawa gearukuneegwa nea ghabuudu dabeakka, anungwaada gawuurji weajoodiga beehiida Gristo.

¹⁹ Mudeanoodeaba fiisu nyariida gil, ak aseetta nyaawa ea jeeda gil, ak ng'asheega aghambiida geat ea gea baspaseega gil, mideawa fughareenga ng'asheega ng'eanyiida.

²⁰ Aba gideaba aseasa ng'eang'deanya gwanda humng'eeda, ak ghamneawa geammuughu lealnoochcheanda, nea Ng'uttamiida was Yeesu Gristoohi,

²¹ jea ghwayam sasanuukkaasa nyeauuriin, ak ghwanung' gawuurji sea saseadaannyi ghambiidaat, aba uurda iissa ghoommu gwasin ghapka haleanjeessean headaannyi.