Filippi 2 - NEAJEEDA EESH BEA BUUNEESSEAN

Eattoodeaba geaw bea ng'eanyi ea hawunda Gristo

¹ Nea iimida gimajeekta jeeda Gristo, ghana gichchea goomajeek bariinyeega, ghana gidasuguyeesa aba jeeda Gurorooda, ghana iimida bariinyeega ghana baydeayda,

² oahhiida hooseaneegeasu nea gobeayi fughareanagi, nea gawuurji bariinyeegeagwa, nea ghoang'ng'waay geat ng'asheegeagwa, nea gobeayi fughareanagi.

³ Adisni ng'asheanda aba shidoodeaba ghaang' ghana aba ghwarjeeda, sina aba eatteaba geaw bea ng'eanyi nea ginung' ghoaw buuneeda suurja fuga miyaas ea ghang'alleagwa.

⁴ Adagaba siisi ng'ula gidagasa niny akghwahit, daba siisi ng'ula gidagasa buneesuurja.

⁵ Andeawana ng'asheesu aba jeesingeagwa, ghayi ondeawi aba jeeda Gristo Yeesu,

⁶ earappeadi niny ghayi uurji sea Aseetta, ea mwanung' ghoaw gil uurjeatta bea Aseettean ak ghoaw gichchea ghoang'ng'waay.

⁷ Ak gwahinda geaw siida mandeawana gil, nea gawuurji sea soomjeanda, ak geeji nea gawuurji buuneeda.

⁸ Iiduw nea geadaah nea gawuurji siida, ghwaat geaw ng'eanyi nea gwasin mureeda ea ghwahitta miyeeda, eara miyeeda uhuuda beehiida.

⁹ Aba sareani ghoaw gida ading'deawa Aseetta humng'eeda muuchchi ak ghoadaw gheawunga laabwa hoowa gheawunga suurja,

¹⁰ aba gideaba aba gheawunga Yeesu giliwas gudung'uda gaygwatkuy, gea fuga mida humng'eeda ghana gea mida ng'eanyiida, ea gea mida uutta ng'eanyiida,

¹¹ ak gaygaba siisi rukuna ghuutaannyi gideaba Yeesu Gristo Ng'uttamiida gil, aba gigheambiitta Aseetta was Ghweanda.

Weeshinda uurji gheaboonyanga aba jeeda ng'eanyiida

¹² Asi fugeasu abwariinyi, aba gideajusu ondeayeatti mureeda galagasean, asi ghamneawa, ea adoosinnyi gideaballi ghwaraanya muuchchi iimeandani hiji, agadiyeesiina lealeanoodeang'wa aba muwda nea ghoabwadannyi;

¹³ aba gideaba Aseetta gagadiiyi aba jeesingeagwa, ak gagooneegwa gassooda ea sinooda ng'asheega miyaas gasa niny.

¹⁴ Asna ng'asheega sean nea adagwarinnaneegwa ginikghta ghana sheangnyeeda,

¹⁵ ak ea meerukunana badaydahuukkeagwa ng'asheega munyas nea ghoahuyi fuga manda giidinyeanda, diibiga Aseetta meerukunana badahuukka ng'asheega munyas mida bugusta seaygeeda gwaneadi bea ng'ooweatta, ak ghoayeatti weeshinda, aba jeannyaawa aba jeeda ng'eanyiida,

¹⁶ nea ghoong'ng'waay muuchchi ng'asheanda eaweega, ammuuchchu eaweeda Gristo ghammuuschi daghwar geaw aba gideaba mwaafwaji mwadaagha ghana dagadiyi mwadaagha.

¹⁷ Eara eayiinan uhuuda haleanjeeda sisappa geadi bea ghadooweeda appadayda masaweegeagwa, aniini geahoosannyi nea geang'weelayi sea agoogeeni seaniin.

¹⁸ Gwasnu earagooga ang'weella nea gohoosannnyi sea aniini.

Dimotteo sea Epafraditto

¹⁹ Ak ghaararji aba jeeda Ng'uttamiida was Yeesu gideaba gaydeajeagu Dimotteo gabean ghwahidu heedeang'wa, ak abeeda geegwarsean aba iitteang'wa.

²⁰ Aniini meandeawani sii nuut uurji niny, bea huumwa nea gwahirbaban aba ng'asheega badahuukkeagwa.

²¹ Saawa gaba siisi ng'ula gidabwariiy, nea mii fukka bea Yeesu Gristohiini.

²² Dimotteo ghamneawa ghwaloat gil aba headaang'u, gawuurji balleanda ea ghwaan niny geaweechcheewi aba gadiyeeda giijasta miy.

²³ Ghaararji gideaba gaydabean deajeagu iyadaayi gichchea gawuurji ng'asheegeasu;

²⁴ ak ghaamwaschi aba heeda Ng'uttamiida gideaba earaniini gaydabean dahidu.

²⁵ Geagasayi deajeagu heedeang'wa Epafraditto, was oorjeediyya, easnudayeewi gadiyeeda, was shirikkarajeanda uurjeewean, nea giijasoochcheandeang'wa gil, nea weedaneeda gil aba haleandeanyu eagasayi.

²⁶ Nea niny abeeda gagasa ghwadaheang'wa oagasean, ak ghang'ut giseaneega aba gideaba noayinyi gideaba niny ghamnyaan.

²⁷ Aba huumwa ghamnyaan, ea ghwariikghta ghami. Iiduw ghabwayda Aseetta niny, ak ea meakghusa niny, earappadaydeanyu, amaduw ea moawa aba heedeanyu sawanadeeda naawda.

²⁸ Aniini geagasayi muuchchi deajeagu niny, ak abeeda gohoosannyi aba iyoobiikti adaaha gichcha, ak abeeda ghwasuunya ng'asheegeasu.

²⁹ Asi adeapta niny aba hooseaneega sean aba naweeda Ng'uttamiida, ak fuga uurji nii gammiisa gideaba gajeattaw mureeda,

³⁰ aba gideaba gwaramagu ghami aba gadiyeeda Gristo, nea gwaramagu gabeagu eaweegaaschi ak ghoahiit gadiyeedeang'wa aba heedeanyu.