Efeeso 4 - NEAJEEDA EESH BEA BUUNEESSEAN

Gidaguuyeatta saseeda

¹ Asi aniini, geawoschi siida ghealooniga appadayda Ng'uttamiida, geamuscheegwa gideaba oattoabiiwa eaweega deeschi sea gurnooda ghayi suguurneegwa,

² nea gooyeadayi geat ng'eanyi ak goowooschi garbappi, nea ghoahhang'waannyi nea goomilikkideaysi geat aba barinyeega,

³ agassa gideaba gajaguyeena aba Gurorooda nea gearadaneagwa hoyyoo.

⁴ Saseeda aagi, ea Guroroonagi, gidaghayi siguursiindaneegwa,

⁵ Ng'uttamiinagi, masaweega ea agi, giibattiisanda aagi,

⁶ Aseetta aagi was Ghweandeanya easassean, ak ghang'attaawa sean ak gagadiiyi aba jeedeaba sean ak gwanda jeeda buuneessean.

⁷ Nea dagheerjeandumeeda gaba siisi siittaw aba aseesa aba gitteenna gidaguh Gristo.

⁸ Hean geeyi, “Iiduw nea gwadiyeada ea gawa humng'eeda heeshsheagi godeayi fuga ng'utta, ak ghoadaw buuneeda haleanjeeda.”

⁹ (Aba rukunooni ayi, “Gwadiyeada,” gideabeadaannyi naaha iimiih gideaba earada ghwararang'an ea ghwahidu heeda hiing'aada aba jeeda ng'eanyiida.

¹⁰ Dea ghayi rarang'aan dea earada diyeada gwasheagiit ea ghwalaabwa hoowa humng'eeda seani, ak abeeda ghoannyiit haleanjeesean.)

¹¹ Hean gageanu mwaatkwa ghoaw giijasoodiga, nea mwaatkwa ghoaw sibanga, nea mwaatkwa ghoaw fuga jea gwarukkwiida giijaasta miy, mwaatkwa ghoaw haghweadoodiga ea ginealshoodiga,

¹² ak ghoadaw fuga ghaydidi uurda jea gwasna gadiyeeda Aseetta ak geemajeek saseeda Gristo,

¹³ ea eeyi bwak ea eanyasa masaweega siguuyeesi ea fughareeda Balleanda Aseetta ak geehittiisi heeda eahuwa headiga, aba gideenda gitteenna hidooda Gristo;

¹⁴ aba gideaba adeebiikti gichcha eahuuwa diibiga, ak geejakseasa hoowa ea hoowa, nea ghwadeasa gilinyoo ea jeammeeda bea ginealshooda fughareenga, aba milmilanda buuneeda ea seechmeeda nea geayaachchi naweedinga reengani buuneeda.

¹⁵ Asi, eang'ng'waanya humeanda aba barinyeega nea geeheettu ea eahitta heedeaba niny aba haleanjeesean, ninnyeeda was uhuuda aba jeeda Gristo,

¹⁶ niny googuuyi saseessean ak ghwanung' ghoang'ng'waay geat robuutka, ak ghoadaw gilinyoo ea roobadeeda gil gichchea gwasinda gadiyeadaannyi muuchchi ak aba sareani gwaheedu saseessean nea ghwadeas geaw aba barinyeega.

Giibindeesh aba jeeda Gristo

¹⁷ Asi gearukneegwa ng'asheanji, aba appadayda Ng'uttamiida, gideaba adoappideatti gidabiideatta fuga Emooji, saawa gootteemsheesa ng'asheega mwadaagha mwahida.

¹⁸ ak fughareenga nyaawa ea sunung' gamisaniidi, ak ea sihheelli sea eaweega Aseetta, aba leendeeda mida jeanyaawa nea gwasin hang'ooynachcheeka jeesinga nyaawa;

¹⁹ Iiduw nea nideang'suusi ghoobutta geat jeeda ririnnyeanda ak abeeda gwasin gilinyoo ea ng'asheega munyas gil.

²⁰ Ak agooga ea mii gissinnaaldaneegwa appadayda Gristohi.

²¹ abeeda ghayi iyoayiinyi ak geannaleagwa appadaydaannyi, humeanda mida jeeda Yeesu.

²² Oappuuda searoojigeagwa bea garayi bea giibinda biissa eamuy aba haleanjeeda sigaseadayyi reengani fih,

²³ asna geat gaweeriidi guroruunatgeagwa ea giitteemshoodeang'wa.

²⁴ Ak daba siisi mideawa guroroodeesh, sisin gawurji Aseetta aba doobiiwnatta huumwa ea ghaydiidanda.

²⁵ Asi anung'waada ng'uyyeega, daba siisi abaloola gischeewochcheandaannyi humeanda, aba gideaba aseasa geewoschi fuga weechchi.

²⁶ Anyareasa ak ea adiidu goosinnyi ring'eeda; ak ea adagamikta nea gudawosa nyareeseadi,

²⁷ ak eadoottawji meang'nyeandeenda gheatta.

²⁸ Mareanghweanda danung'waada gwadishta, dang'eada ghuutta gadiyeeda miy aba geattingaaschi, ak ghwanyas gichchea ghoadaw fukka gassean.

²⁹ Adagwarinna ghuusigeagwa ng'asheega munyas, inyeessa goobalooli gaamiyaas jea ghaweat gilinyoo ea siida gil, ak ghoadaw dagheerjeandumeeda fuga aleeyseegwa iit.

³⁰ Ak ea adoong'udi gurheamiida Gurorooda Ghaydit bea Aseetta, aba headaannyi sirrooreegwa aba eaweeda ghuhooda.

³¹ Asi ageandeana geat ng'asheega sean ng'weani was mukkunooda ea nyarasta ea gijuureanda ea nappooda ng'uyyeega nea gooshsheagiidi geat gea munyas sean,

³² asi awosa innyeani jeesin aba heedabuuneeda suurja, bayyiida buuneeda, sammiisa geat, gawuurji gidasamsiindaneegwa Aseetta aba jeeda Gristo.